Agkamangkayo ken ni Jehova
“Kenka, O Jehova, agkamangak.”—SALMO 31:1.
1. Kasano nga iyebkas ti Salmo 31 ti panagtalek iti kabaelan ni Jehova a mangipaay iti taklin?
NUPAY napaksuyan iti isip ken bagi, buyogen ti nasam-it a timek, inkanta ti maysa a lalaki ti panagtalekna ken ni Jehova. Agballigi ti pammati, kuna ti liriko dayta sagrado a kanta. Kadagiti madadaan a takkiag ti Mannakabalin-amin, nasarakan daytoy a lalaki ti kinatalged manipud kadagiti manangidadanes a mangan-anup kenkuana. “Kenka, O Jehova, agkamangak,” kuna ti salmona. “O diak kad maibabain uray kaanoman. Ispalennak ita kinalintegmo.”—Salmo 31:1.
2. (a) Makapagtalektayo ken ni Jehova kas sarikedkedtayo maibatay iti ania a dua a sadiri? (b) Ania a kita ti Dios ni Jehova?
2 Addaan ti salmista iti taklin—ti kasayaatan! Uray pay no mapagduaduaan dagiti dadduma a banag, agtalinaed daytoy a kinapudno: Ni Jehova ti salindegna, ti sarikedkedna. Naibatay ti namnamana iti dua a nalagda a sadiri. Umuna, ti pammatina, a saanto nga ibabain ni Jehova, ket ti maikadua, ti kinalinteg ni Jehova, a kaipapananna a saanna a baybay-an ti adipenna uray kaano. Saan nga ibabain ni Jehova a Dios dagiti matalek nga adipenna; saanna nga ibabawi ti karina. Imbes ketdi, isu ti Dios ti kinapudno ket gunggonaanna dagiti sipapasnek nga agtalek kenkuana. Iti kamaudiananna, masupapakanto ti pammati! Dumtengto ti pannakaisalakan!—Salmo 31:5, 6.
3. Kasano nga indaydayaw ti salmista ni Jehova?
3 Iti panangputarna iti musika nga umallo-allon ti ayugna, a mangiyeb-ebkas iti ladingit ken sennaay ken panagtalek, narikna ti salmista ti kinatalged. Indaydayawna ni Jehova gapu iti nasungdo a panagayatna. “Madaydayaw koma ni Jehova,” inkantana, “ta imparangarangna kaniak ti nakaskasdaaw a naayat a kinamanangaasina iti maysa nga ili a natibker.”—Salmo 31:21.
Napigsa a Koro Dagiti Agibumbunannag ti Pagarian
4, 5. (a) Ania a napigsa a koro ti mangidaydayaw ken ni Jehova ita, ket kasano ti panangaramidda iti dayta iti napalabas a tawen serbisio? (Kitaenyo ti tsart iti pinanid 12-15.) (b) Kasano nga ipakita ti timmabuno iti Memorial nga adu pay dagiti madadaan a makidanggay iti koro dagiti manangiwaragawag ti Pagarian? (Kitaenyo ti tsart.) (c) Ania a grupo iti kongregasionyo ti mabalin a makidanggay iti koro?
4 Iti kaaldawantayo, nanayonan ti kaipapanan ti sasao dayta a salmo. Saan a mapasardeng ti aniaman a kabusor, aniaman a natural a didigra, wenno aniaman a krisis iti ekonomia dagiti kanta a pagdayaw ken ni Jehova; pudno la unay, ti naayat a kinamanangaasi ni Jehova nagbalin a nakaskasdaaw iti ilina. Iti intero a lubong iti napalabas a tawen serbisio, inkanta ti maysa a napigsa a koro, nga agdagup iti 4,709,889 iti 231 a pagilian, ti mensahe ti Pagarian ti Dios. Ti nailangitan a gobierno ni Jehova babaen ken Kristo Jesus ket maysa a taklin a saan a mangpaay kadakuada. Idi napan a tawen, agdagup iti 1,057,341,972 nga oras ti nabusbos dagitoy a manangiwaragawag ti Pagarian manipud iti 73,070 a kongregasion iti trabaho a panagebanghelio. Nagresulta daytoy iti 296,004 a tao a nangisimbolo iti dedikasionda iti Dios babaen ti bautismo iti danum. Ket anian a nakaskasdaaw a sorpresa ti tinagiragsak dagiti amin a timmabuno iti Nadiosan a Panangisuro a Kumbension Internasional a naangay idiay Kiev, Ukraine, itay napan nga Agosto. Naimatanganda ti kadakkelan a bautismo dagiti pudno a Kristiano a nairekord iti pakasaritaan dagiti Saksi ni Jehova! Kas naipadto idiay Isaias 54:2, 3, umadu la nga umadu dagiti tattao ti Dios.
5 Nupay kasta, adu pay dagiti iturayan ti Pagarian ti Dios a madadaan a makidanggay iti koro. Idi napan a tawen, agdagup iti 11,865,765 ti dimmar-ay iti Panglaglagip iti ipapatay ni Jesus. Mainanama nga adu kadagitoy ti makakualipikarto a mangkansion iti kanta ti Pagarian iti binalaybalay iti daytoy a tawen serbisio. Napalaus la ketdi ti pungtot ti kabusor ti kinapudno, ni Satanas a Diablo, gapu iti dayta mainanama nga irarang-ay!—Apocalipsis 12:12, 17.
6, 7. Ilawlawagyo no kasano a napagballigian ti maysa nga interesado a tao ti panangriribuk dagiti demonio babaen ti tulong ni Jehova.
6 Sigurado nga ikagumaan ni Satanas a lapdan dagiti dadduma a makidanggay iti dayta napigsa a koro. Kas pangarigan, idiay Thailand adu a tattao a rirriribuken dagiti demonio ti masarsarakan dagiti agibumbunannag. Nupay kasta, adu a napasnek a tattao ti naruk-atanen babaen ti tulong ni Jehova. Manipud iti daydi isasarungkarna iti maysa a mangkukulam iti ayatna nga agusisa, naipasidong ti maysa a lalaki iti pannakabalin dagiti demonio iti sangapulo a tawen. Inkarigatanna ti rumuk-at iti pannakabalinda iti tulong ti maysa a klero, ngem saan a simmayaat ti kasasaadna. Rinugian ti maysa nga amin-tiempo a ministro dagiti Saksi ni Jehova nga inyadalan iti Biblia daytoy a lalaki ket insurona kenkuana manipud iti Biblia ti kakaisuna a pamay-an tapno makaruk-at iti pannakabalin dagiti demonio—gumun-od iti umiso a pannakaammo iti kinapudno, mamati ken ni Jehova a Dios, ken umararaw kenkuana iti kararag.—1 Corinto 2:5; Filipos 4:6, 7; 1 Timoteo 2:3, 4.
7 Iti karabiyanna kalpasan daytoy a panagsarita, natagtagainep ti lalaki daydi amana a namutbuteng kenkuana no saan nga agsubli iti kinaespiritistana. Nangrugi nga agsagaba ti pamiliana. Ngem saan a mabaw-ing ti pangngeddengna. Intuloyna ti nagadal iti Biblia ket rinugianna ti makigimong. Iti maysa kadagidiay a panagadal, inlawlawag ti payunir a, no dadduma, dagiti banag a mausar kadagiti espiritistiko a ritual ikkanda dagiti demonio iti gundaway a mangriribuk kadagiti tao a mangikagkagumaan a rumuk-at iti pannakabalinda. Nalagip ti lalaki nga adda iduldulinna a lana nga us-usarenna idi kas anting-anting. Naamirisna a masapul nga ibellengna dayta. Nanipud daydi panangibellengna iti dayta, saanen a rirriribuken dagiti dakes nga espiritu. (Idiligyo ti Efeso 6:13; Santiago 4:7, 8.) Nasayaat ti irarangayda nga agassawa iti panagadalda ken regular a tumabtabunoda kadagiti gimong a pakasursuruan iti Biblia.
8, 9. Ania dagiti dadduma pay a lapped a napagballigian dagiti dadduma a manangiwaragawag ti Pagarian?
8 Mabalin a pakapsuten dagiti dadduma pay a lapped ti uni ti naimbag a damag. Gapu iti nakaro unay a krisis iti ekonomia idiay Ghana, adu ti napukawan iti panggedan. Ngimmina iti kasta unay ti gatad dagiti gagatangen, ket pudno a narigat a paaddaen dagiti kangrunaan a kasapulan iti biag. Kasano ti panangsaranget dagiti tattao ni Jehova? Babaen ti panagtalekda, saan nga iti bagbagida, no di ket ken ni Jehova. Kas pangarigan, iti maysa nga aldaw, nangibati ti maysa a lalaki iti seliado a sobre iti reception desk ti sanga nga opisina. Naglaon ti sobre iti $200, wenno ti kababaan a sueldo a masapulan iti tallo a bulan. Naggapu ti sobre iti maysa a naparabur a tao a di nainaganan, ngem iti balkot, kastoy ti naisurat: “Napukawanak iti trabaho, ngem impaayannak ni Jehova iti sabali. Agyamanak kenkuana ken iti Anakna, ni Jesu-Kristo. Kas tulongko iti pannakaisaknap ti naimbag a damag ti Pagarian sakbay a dumteng ti panungpalan, nangisapitak iti nanumo a kontribusion.”—Idiligyo ti 2 Corinto 9:11.
9 Ti itatabuno kadagiti gimong makatulong a mangsanay kadagidiay makidanggay iti napigsa a koro a pagdayaw ken ni Jehova. (Idiligyo ti Salmo 22:22.) Kas pangarigan, iti makin-abagatan a paset ti Honduras, adda maysa a kongregasion a maaw-awagan El Jordán. Aniat’ naisangsangayan unay iti daytoy bassit a grupo? Ti matalek nga itatabunoda kadagiti gimong. Kadagiti 19 nga agibumbunannag, 12 ti masapul a bumallasiw iti nalawa a karayan tapno makatabunoda kadagiti gimong iti tunggal lawas. Saan unay a parikut daytoy no kalgaw, yantangay mabalinda a ballasiwen ti karayan babaen ti panangusar kadagiti bato kas pagtalaytayan. Nupay kasta, no panawen ti tudtudo, agbaliw ti kasasaad. Pumegges ti karayan ket yayusna amin a masalaponna. Tapno mapagballigianda daytoy a lapped, masapul a sursuruen dagiti kakabsat a lallaki ken babbai ti agbalin a nalaing a lumalangoy. Sakbay a bumallasiwda, ikabilda dagiti kawes a pakigimongda iti tina (batia a metal) sada abbongan iti supot a plastik. Pagpataw ti kapigsaan a lumangoy ti tina ket idauluanna ti grupo a bumallasiw. No nakaballasiwdan, agpunas ken agpellesda, ket sumangpetda iti Kingdom Hall a nakaragragsak ken sumilsilap ti kinadalusda!—Salmo 40:9.
Maysa a Sarikedked a Mabalintay a Pagtaengan
10. Apay a mabalintay ti agkamang ken ni Jehova iti tiempo ti pakarigatan?
10 Rirriribukendakay man dagiti demonio wenno marigrigatan gapu iti nadumaduma a parikut, mabalinyo ti agkamang ken ni Jehova. Umawagkayo kenkuana iti kararag. Timudenna uray dagiti di mayebkas nga asug dagiti tattaona. Napaneknekan ti salmista a pudno dayta ket insuratna: “Yallingagmo kad ta lapayagmo kaniak. Ispalennak daras. Sika kadi ti natibker a bato kaniak, balay a pagsalakniban a mangisalakan kaniak. Ta sika ti batok ken pagsalindegak; anansata gapu iti naganmo idalannak ket iturongnak kadi. Alut-otennak kadi iti bateng nga impakatda a sililimed kaniak, ta sika ti napigsa a pagtaklinak.”—Salmo 31:2-4.
11. Ilawlawagyo no apay a ti sarikedked ni Jehova ket saan a maysa a temporario a lugar.
11 Mangipaay ni Jehova iti saan laeng a temporario a pagtaklinan no di ket iti natibker a sarikedked a mabalintay a pagtaengan a sitatalged. Ti panangidalan ken panangibagnosna dina paayen dagiti tattaona. Ti pannakabalin ti Dios pagbalinenna nga awan serserbi amin a pangallilaw ni Satanas ken dagiti kapponna. (Efeso 6:10, 11) No agtalektayo ken Jehova iti amin a puso, yadayonatayo kadagiti silo ni Satanas. (2 Pedro 2:9) Iti napalabas nga uppat a tawen, naluktanen ti trabaho a panangasaba dagiti Saksi ni Jehova iti 35 a pagilian. Kasta met, kadagiti paset ti lubong a narigat nga ikasaba ti naimbag a damag gapu kadagiti sosial, ekonomiko, wenno politikal a kasasaad, immakar dagiti dadduma a kimmarnero a tattao kadagiti lugar a nalaklaka ida a madanon. Ti Japan ket maysa kadagita a lugar.
12. Kasano a pinagbalin ti maysa a payunir idiay Japan ni Jehova a sarikedkedna?
12 Idiay Japan, nagadu dagiti ganggannaet a temporario a mangmangged, ket adu a ganggannaet-pagsasaona a kongregasion ti naipasdek. Ipakita ti kapadasan ti maysa a kabsat a lalaki iti kongregasion a Hapones no kasano kabunga daytoy ganggannaet-pagsasaona a tay-ak. Kayatna ti agserbi iti lugar a dakdakkel ti pakasapulan. Nupay kasta, addan sangapulo a yad-adalanna iti Biblia idiay lugarda. Siaangaw a kinuna ti maysa kadagiti gagayyemna: “No mapanka iti lugar a dakdakkel ti pakasapulan, nasken a makaikonduktaka iti 20 a panagadal iti Biblia sadiay!” Naawatna ti pakaitudinganna ket napan idiay Hiroshima. Kalpasan ti uppat a bulan, nupay kasta, maymaysa laeng ti yad-adalanna iti Biblia. Iti maysa nga aldaw, isut’ simmarungkar iti maysa a lalaki a taga-Brazil a Portugues laeng ti ammona a pagsasao. Yantangay saanda nga agkinnaawatan iti lalaki, gimmatang ti kabsat iti libro maipapan iti pagsasao a Portugues. Idi nakasursuro iti sumagmamano a simple a balikas, sinarungkaranna manen ti lalaki. Idi kinablaawan ti kabsat iti pagsasao a Portugues, nasdaaw ti lalaki ket limmapayag ti isemna a nangilukat iti ridaw ken nangpastrek kenkuana. Nairugi ti panagadal iti Biblia. Di nagbayag, 22 ti yad-adalanen ti kabsat, 14 iti Portugues, 6 iti Español, ken 2 iti Hapones!
Panangasaba a Buyogen ti Panagtalek
13. Apay nga awan ti rumbeng a mangpilit kadatayo nga agserbi ken ni Jehova babaen ti panangpabain?
13 Situtured nga ikankansion ti ili ni Jehova ti kanta ti Pagarian a buyogen ti naan-anay a panagtalek a ni Jehova isu ti taklinda. (Salmo 31:14) Saanda a mabain—saan nga ibabain ni Jehova ida, ta tungpalenna ti saona. (Salmo 31:17) Maibabainto ti Diablo ken dagiti demonio a pasurotna. Yantangay nabilin dagiti tattao ni Jehova a mangikasaba iti mensahe a saan a nakababain, saanda a mapilpilit a mangasaba babaen ti panangpabain dagiti dadduma a tao. Saan a kasta ti panangtignay ni Jehova, wenno ti Anakna, kadagiti tattaona nga agdayaw Kenkuana. No napno ti puso dagiti tao iti pammati ken panagyaman iti kinaimbag ken naayat a kinamanangaasi ni Jehova, ti nasayaat a kasasaad ti pusoda ti mangtignay kadakuada nga agsao. (Lucas 6:45) No kasta, makaay-ayo, saan a nakababain, ti aniaman a panawen a mabusbostayo iti serbisio iti tunggal bulan, nangruna no itakderan dayta a panawen ti amin a kabaelantayo. Di met aya inapresiar unay ni Jesus ken ti Amana ti sinsilio daydi balo a babai?—Lucas 21:1-4.
14. Ania ti makunayo maipapan iti trabaho a panagpayunir? (Kitaenyo met ti tsart.)
14 Para iti dumakdakkel a bilang dagiti agibumbunannag, ti panagdayawda iti amin a kararua ramanenna ti panagserbi kas payunir—890,231 ti kangatuan a bilang idi napan a tawen! No mamantener ti irarang-ay iti napalabas a tawen, daytoy a bilang mabalin a lab-awanna ti 1,000,000. Ipakita ti sumaganad a kapadasan no kasano a nagbalin a payunir ti maysa a sister idiay Nigeria. Insuratna: “Idi dandaniakon agturpos iti sekundaria, timmulongak a nagluto iti taraon dagiti agad-adal iti pioneer school dagiti Saksi ni Jehova. Naam-ammok sadiay ti dua a sister a bakbaket ngem ni lelangko. Idi naammuak a payunirda a karaman kadagiti agad-adal, kinunak iti unegko, ‘No makapagpayunirda, siakto pay?’ Isu nga idi nagturposak, nag-regular payunirak met.”
15. Kasano a ti impormal a panangasaba ipaayanna dagiti dadduma iti gundaway nga agkamang ken ni Jehova?
15 Saan nga amin ket makapagpayunir, ngem mabalinda ti mangpaneknek. Idiay Belgium, napan gimmatang iti karne ti maysa a 82-años a sister. Nadlawna a maringgoran ti asawa ti partidor gapu iti nariribuk a politikal a kasasaad. Isu a nangiraktip ti sister iti tract nga Ania ti Pammati Dagiti Saksi ni Jehova? idi iyawatna ti bayadna. Idi nagsubli ti sister iti paglakuan ti karne, di nagalikaka ti asawa ti partidor a nagsaludsod no ania ti kunaen ti Biblia maipapan iti posible a maikatlo a gubat sangalubongan. Isut’ inyegan ti sister iti libro a True Peace and Security—How Can You Find It? Kalpasan ti sumagmamano nga aldaw, idi gumatang manen ti kabsat a baket, adu pay ti insaludsod kenkuana ti asawa ti partidor. Naasian ti sister iti daytoy a babai, isu a dinamagna kenkuana no kayatna ti payadalan iti Biblia. Immanamong ti asawa ti partidor. Ita kayatnan ti agpabautisar. Ti met ngay partidor? Binasana ti tract ket agad-adal metten iti Biblia.
‘Maysa a Gameng ti Kinaimbag’
16. Kasano a nangisagana ni Jehova iti gameng ti kinaimbag nga agpaay iti ilina?
16 Kadagitoy nariribuk a maudi nga al-aldaw, di met aya ‘ipapaay [ni Jehova] ti nakaskasdaaw a naayat a kinamanangaasi’ kadagiti agkamang kenkuana? Kas iti maysa a naayat, manangigaga nga ama, nangisagana ni Jehova iti gameng ti kinaimbag nga agpaay kadagiti annakna ditoy daga. Iburburayna kadakuada ti kinaragsak iti imatang dagiti tao, kas kunaen ti salmista: “Nagdakkelen ti kinaimbagmo, nga impempenmo nga agpaay kadagiti agbuteng kenka! Nga inaramidmo kadagiti agkamang kenka, iti sanguanan dagiti annak dagiti tattao.”—Salmo 31:19, 21.
17-19. Idiay Ghana, ania ti nasayaat a resulta ti panangipalegal ti maysa a lakay iti panagasawana?
17 Gapuna, maim-imatangan a mismo ti tattao ti lubong ti kinamapagpiaran dagiti agdaydayaw ken Jehova, ket masmasdaawda. Kas pangarigan, idiay Ghana, napan ti maysa a 96-años a lakay iti opisina ti marriage registrar tapno iparehistrona ti panagtiponda ken baketna a 70 a tawenen nga ikabkabbalayna. Naklaat ti opisial ket sinaludsodna: “Masiguradoyo kadi a dayta ti kayatyo a maaramid? Iti dayta nga edadyo?”
18 Inlawlawag ti lakay: “Kayatko ti agbalin a Saksi ni Jehova ken makiraman iti kapatgan a trabaho sakbay ti panungpalan ti lubong—ti panangikasaba iti naimbag a damag ti Pagarian ti Dios. Mangiturong daytoy a trabaho iti biag nga agnanayon. Tungtungpalen dagiti Saksi ni Jehova ti linteg sibil, agraman ti linteg a masapul a mairehistro ti panagasawa. Isu a pangngaasiyo ta irehistroyo.” Saan a nakatagari ti opisial. Inasikasona ti rehistrasion, ket siraragsak a pimmanaw ti lakay gapu ta legalen ti panagasawana.—Idiligyo ti Roma 12:2.
19 Kalpasan dayta, pinampanunot ti marriage registrar dagiti nangngegna. “Saksi ni Jehova . . . ti kapatgan a trabaho . . . ti panungpalan ti lubong . . . Pagarian ti Dios . . . biag nga agnanayon.” Gapu ta dina maawatan no ania ti kaipapanan amin dagitoy iti biag ti maysa a 96-años a lakay, binirukna dagiti Saksi ni Jehova tapno ad-adu pay ti maammuanna. Nagpayadal iti Biblia iti pagtaengan ket napartak ti panagrang-ayna. Daytoy a marriage registrar ket maysa itan a bautisado a Saksi. No kasta, no agtulnogtayo ken Jehova uray kadagiti ibilang dagiti dadduma a babassit a banag, mabalin nga agresulta dayta iti dakkel a pagimbagantayo ken dagiti makaimatang iti kababalintayo—Idiligyo ti 1 Pedro 2:12.
20. Idiay Myanmar, kasano a nangiturong iti nasayaat a pammaneknek ti kinamapagpiaran ti maysa nga agtutubo a sister?
20 Dagiti nataengan a nagbalin a mapagpiaran gapu iti panangsurotda iti kinapudno mangipapaayda iti nasayaat nga ulidan kadagiti agtutubo iti daytoy di mapagpiaran a lubong. Agnanaed idiay Myanmar ti maysa kadagiti kasta a mapagpiaran nga agtutubo a sister. Napanglaw ken nanumo a pamilia ti nagtaudanna, ket sangapuloda amin nga agkakabsat. Maysa a regular payunir ni tatangna, a maysa a pensionado. Iti maysa nga aldaw idiay eskuelaan, nakapidut ti sister iti singsing a diamante, ket impanna a dagus iti maestrana. Iti sumuno nga aldaw, imbaga ti maestra iti klasena no kasano a nasarakan ken naiyawat ti singsing tapno maisubli iti akinkukua. Sana indawat iti agtutubo a sister a tumakder iti sanguanan dagiti kaklasena ket ilawlawagna no apay nga inaramidna daytoy, ta ammona a no sabali nga ubing ti nakapidut, mabalin a saannan nga isubli. Inlawlawag ti sister nga isu ket maysa a Saksi ni Jehova ket kagura ti Diosna ti panagtakaw wenno aniaman a kita ti di kinamapagtalkan. Naipadamag dayta iti intero nga eskuelaan, ket naaddaan ti agtutubo a sistertayo iti nasayaat a gundaway a mangpaneknek agpadpada kadagiti mannursuro ken estudiante.
21. Bayat nga agtaltalek dagiti agtutubo ken ni Jehova, kasano nga aganninaw ti kababalinda kenkuana?
21 Idiay Belgium, makapainteres ti imbaga ti maysa a maestro iti klasena maipapan kadagiti Saksi ni Jehova. Napaliiwna ti kababalin ti maysa kadagiti estudiantena, a maysa met nga agtutubo a sister, ket kinunana: “Naiduma itan ti panangmatmatko kadagiti Saksi ni Jehova. Gapu iti panagil-ilem, impagarupko nga isuda ti karigatan a kalangen a tattao. Ngem napaneknekak nga isuda ti kalakaan a kalangen, no la ketdi awan maikompromiso a prinsipioda.” Tinawen a padayawan dagiti mannursuro dagiti kalaingan nga estudianteda. Malaksid pay iti dadduma a benneg, maited ti pammadayaw iti kurso nga ethics. Iti nagsasaruno a tallo a tawen, impaay daytoy a maestro ti pammadayaw kadagiti tallo nga annak dagiti Saksi ni Jehova a nakagun-od iti kangatuan a grado. Masansan a kasta ti maganab dagiti sisusungdo nga agtalek ken ni Jehova.—Salmo 31:23.
22. Ania ti naballigi a paggibusan ti Salmo 31, ket kasano a matulongannatay dayta bayat ti maudi nga al-aldaw daytoy a sistema dagiti bambanag?
22 Umaweng ti Salmo 31 iti naballigi a paggibusan: “Bumilegkayo koma, ket ta pusoyo tumured kadi, dakayo amin a mangnamnama ken Jehova.” (Salmo 31:24) Gapuna, bayat a sangsanguentayo ti maudi nga al-aldaw ti dakes a sistema ni Satanas, imbes a baybay-annatayo, agtalinaed ni Jehova a nadekket kadatayo ken papigsaennatayo. Mapagtalkan ken saan a mangpaay ni Jehova. Isu ti taklintayo; isu ti sarikedkedtayo.—Proverbio 18:10.
Malagipyo Kadi?
◻ Apay a makapagtalektayo ken ni Jehova kas taklintayo?
◻ Ania ti mangpaneknek a situtured nga ikankansion ti maysa a napigsa a koro ti kanta ti Pagarian?
◻ Apay a makapagtalektayo a saan a masiluan ni Satanas ti ili ni Jehova?
◻ Ania a gameng ti insagana ni Jehova nga agpaay kadagiti agkamang kenkuana?
[Tsart iti panid 12-15]
REPORT TI 1993 A TAWEN SERBISIO DAGITI SAKSI NI JEHOVA ITI SANGALUBONGAN
(Kitaem ti bound volume)
[Dagiti Ladawan iti panid 16, 17]
Dagiti agkamang ken ni Jehova buklenda ti maysa a napigsa a koro ti 4,709,889 a manangiwaragawag ti Pagarian!
1. Senegal
2. Brazil
3. Chile
4. Bolivia