Umadanika iti Dios
Liwliwa Kadagiti Masmasnaayan
‘DINAKTON pulos ayaten ni Jehova.’ Kasta ti imbaga ti maysa a babai a Kristiano a nabayagen nga addaan iti depresion. Pagarupna nga adayo kenkuana ni Jehova. Talaga kadi nga adayo ni Jehova kadagidiay maup-upay nga adipenna? Masarakan ti makaliwliwa a sungbat iti naipaltiing a sasao ni salmista David, kas nairekord iti Salmo 34:18.
Ammo ni David ti epekto ti nakaro a panagleddaang iti matalek nga agdaydayaw ken Jehova. Idi agtutubo pay, nagbalin a pugante ni David gapu ta kayat a papatayen ti agim-imon nga ari a ni Saul. Nagkamang ni David iti lugar a pagarupenna a saan a pangbirokan kenkuana ni Saul—idiay siudad ti Gat iti teritoria dagiti kabusorda a Filisteo. Ngem gistay di nakalibas idi nailasinda, imbag laengen ta nagpammarang nga agmauyong. Binigbig ni David a ti Dios ti nangisalakan kenkuana, ket insuratna ti Salmo 34 maibatay iti daytoy a kapadasanna.
Impagarup kadi ni David nga adayo ti Dios kadagidiay a makarikrikna iti kinaawan serserbi, nga epekto ti nakaro a leddaangda? Insurat ni David: “Ni Jehova asideg kadagidiay nadunor ti pusoda; ket dagidiay a naidagel iti espiritu isalakanna.” (Bersikulo 18) Kitaentayo no kasano a makaliwliwa ken makaited iti namnama dagitoy a sasao.
‘Asideg ni Jehova.’ Kuna ti maysa a reperensia a daytoy a sasao ket “pangipaganetget nga atentibo ken agbambantay ti Apo, a kanayon a sisasagana a tumulong ken mangisalakan iti ilina.” Makaliwliwa a maammuan a bambantayan ni Jehova ti ilina. Makitkitana dagiti problemada kadagitoy “napeggad a tiempo,” ken ammona ti rikriknada.—2 Timoteo 3:1; Aramid 17:27.
“Dagidiay nadunor ti pusoda.” Iti dadduma a kultura, tumukoy ti “nadunor a puso” iti napaay nga ayat. Ngem tumukoy ti sasao ti salmista iti “gagangay a leddaang ken ladingit,” kuna ti maysa nga eskolar. Wen, uray dagiti matalek nga adipen ti Dios mabalin nga agsagabada iti nakaro a rigat a mamagsennaay iti pusoda.
“Dagidiay a naidagel iti espiritu.” Adda dagidiay maup-upay a nakababbaba ti panangmatmatda iti bagida nga uray la maawananda iti namnama no dadduma. Sigun iti maysa a libro para kadagiti agipatpatarus iti Biblia, daytoy nga ebkas mabalin a maipatarus a “dagidiay awan namnamaenda a naimbag.”
Ania ti aramiden ni Jehova kadagidiay “nadunor ti pusoda” ken “dagidiay a naidagel iti espiritu”? Umadayo kadi kadakuada, nga ibilangna ida a saan a maikari iti ayat ken atensionna? Saan! Kas iti naayat nga ama a mangan-andingay iti malmalday nga anakna, asideg met ni Jehova kadagiti agpatpatulong nga adipenna. Magagaran a mangliwliwa ken mangbang-ar kadagiti masmasnaayan ken maup-upay. Maipaayanna ida iti sirib ken bileg tapno madaeranda ti aniaman a pakasuotanda.—2 Corinto 4:7; Santiago 1:5.
Paregtaendaka a mangammo no kasano a makaadanika ken Jehova. Inkari daytoy naasi a Dios a makipagnaed kadagidiay ‘nailupitlupit ken napakumbaba ti espirituna, tapno paungarenna ti espiritu dagidiay napakumbaba ken tapno paungarenna ti puso dagidiay mailupitlupit.’—Isaias 57:15.
Singasing a basaen iti Biblia iti Hunio: