Salmo 37:4—“Sapulem iti APO ti Pagragsakam”

“Agragsakka unay ken Jehova, ket itednanto kenka dagiti tarigagay ti pusom.”—Salmo 37:4, Baro a Lubong a Patarus.

“Sapulem iti APO ti pagragsakam, ket itednanto ti tartarigagayam.”—Salmo 37:4, Ti Baro a Naimbag a Damag Biblia.

Kaipapanan ti Salmo 37:4

Iparparegta ti salmista kadagiti agdaydayaw iti Dios nga agragsakda gapu iti nasinged a pannakigayyemda Kenkuana. Masigurado ti amin a gayyem ni Jehovaa a Dios nga ipaayna dagiti umiso a tarigagayda.

“Agragsakka unay ken Jehova.” Mabalin met a maipatarus dagitoy a sasao kas “agragsakka iti napalalo ken Jehova,” “agragsakka iti panagserbim iti APO,” wenno “agragsakka iti inkari kenka ti APO.” Iti ababa a pannao, masapul nga ‘agragsaktayo unay’ iti panagdaydayawtayo iti pudno a Dios. (Salmo 37:4) Apay?

Dagidiay agdaydayaw ken Jehova kitaenda dagiti bambanag sigun iti panangmatmatna nga ipakita ti Biblia. Saanda laeng nga am-ammo ti Dios no di ket ammoda pay a pagsayaatanda no agtulnogda kenkuana. Kas resultana, mataginayonda ti nadalus a konsiensia ken maliklikanda ti adu a kamali a desision. (Proverbio 3:5, 6) Kas pagarigan, saanda nga agpungtot wenno umapal no kasla rumang-ay ti biag dagiti naagum wenno di napudno a tattao. (Salmo 37:1, 7-9) Naragsak dagiti adipen ti Dios ta ammoda nga asidegen a pagpatinggaenna ti amin a di kinahustisia ken bendisionanna dagiti matalek gapu kadagiti nasayaat nga ar-aramidenda. (Salmo 37:34) Maragragsakanda met unay ta ammoda nga ap-aprobaran ida ti nailangitan nga Amada.—Salmo 5:12; Proverbio 27:11.

“Itednanto kenka dagiti tarigagay ti pusom.” Mabalin met a maipatarus dagitoy a sasao kas “sungbatannanto dagiti kararagmo” wenno “itednanto dagiti tartarigagayam unay.” Siempre, saan la a basta ited ni Jehova ti aniaman a kiddawentayo. Kas iti nasayaat a nagannak, ammo ni Jehova ti kasayaatan para kadagiti annakna. Kasta met, dagiti kiddawtayo ken ti panagbiagtayo ket masapul a maitunos kadagiti estandarte ken pagayatanna. (Proverbio 28:9; Santiago 4:3; 1 Juan 5:14) Iti kasta, mabalintayo ti umasideg iti “Managdengngeg iti kararag” ken agtalek a denggennatayo.—Salmo 65:2; Mateo 21:22.

Konteksto ti Salmo 37:4

Ti Salmo 37 ket pinutar ni Ari David ti nagkauna nga Israel. Insuratna ti salmo iti alphabetical, wenno acrostic nga estilo.b

Nakapasar ni David iti adu a di kinahustisia. Isu ket kinamkamat ni Ari Saul ken ti dadduma pay ta kayatda a papatayen. (2 Samuel 22:1) Ngem kanayon a naan-anay a nagtalek ni David iti Diosna. Ammona a dusaento met laeng ni Jehova dagiti managdakdakes. (Salmo 37:10, 11) Uray no kasla rumang-ayda a kas iti “kattubo a ruot,” mapukawdanto.—Salmo 37:2, 20, 35, 36.

Pinagduma ti Salmo 37 ti pagbanagan dagidiay mangsursurot kadagiti estandarte ti Dios iti pagbanagan dagidiay mangilaksid kadagita. (Salmo 37:16, 17, 21, 22, 27, 28) Makatulong kadatayo ti salmo tapno maaddaantayo iti sirib ken agbalintayo a kita ti tao nga aprobaran ti Dios.

Buyaem daytoy ababa a video tapno makitam ti pakabuklan ti libro a Salmo.