Dagiti Saludsod Manipud Kadagiti Managbasa
◼ Yantangay naipatarus ti Salmo 37:29 a “Ti sililinteg tawidennanto ti daga, ket agtaengto kenkuana nga agnanayon,” tuktukoyenna kadi dayta ti panangtagikua a permanente ti Israel iti Naikari a Daga?
Saan, dayta a panangipatarus agbalin nga awan pakaibatbatayanna a limitasion iti daytoy naipaltiing a kari. Ipaspasimudaag ti Salmo 37 iti sanguanan dagiti nalinteg ti namnama nga agbiag nga agnanayon ditoy dagatayo.
Ti makingngato a panangipaulog ti Salmo 37:29 ket naggapu iti King James Version. Kas met laeng pudno kadagiti dadduma a bersion, inyulogna ti Hebreo nga ’eʹrets kas “daga.” Mabalin a tukoyen ti ’eʹrets ti maysa a masinunuo a disso wenno teritoria ti maysa a nasion, kas “ti daga ti Sinar” wenno “ti daga ti Egipto.”—Genesis 10:10; 21:21; Salmo 78:12; Jeremias 25:20.
Gapuna kasla ipampamatmat ti Salmo 37:11, 29 a mabalin a rebbeng koma a dagiti Israelitas ti nagtaeng a permanente idiay Naikari a Daga. Maitunos iti tulag ti Dios ken Abraham, nabalinanda koma ti nagtalinaed iti dayta a teritoria nga inted ti Dios kadakuada, a ti agsasaruno a kaputotan ti mangtagiragsak kadagiti bendisionna sadiay. Ngem, saan met a nagbalin a kasta, ta dagiti Israelitas dida nagmatalek iti Dios.—Genesis 15:18-21; 17:8; Deuteronomio 7:12-16, 22; 28:7-14; 31:7; Josue 21:43-45.
Nupay kasta, awan Nainkasuratan a rason a limitaran ti ’eʹrets idiay Salmo 37:11, 29 nga agpaay laeng iti daga a naited kadagiti Israelitas.
Sigun iti A Hebrew and English Lexicon of the Old Testament (Gesenius, Brown, Driver, and Briggs; 1951) ti ‘eʹrets kaipapananna ti: “1. a. ti daga, ti intero a daga ([kas maibusor] iti maysa a paset) . . . b. ti daga, [kas maibusor] iti langit, tangatang . . . c. ti daga=dagiti agtataeng iti daga . . . 2. daga=a. pagilian, teritoria . . . b. distrito, disso . . . 3. a. ground, rabaw ti daga . . . b. soil, kas nabunga.” Kuna ti Old Testament Word Studies ni William Wilson maipapan iti ’eʹrets: “Ti daga iti kadadakkelan a kaipapananna, agpadpada ti mapagtaengan ken di mapagtaengan a pasetna; babaen iti sumagmamano a maipakuyog a sasao a makaikeddeng, daytat’ nausar iti dadduma a paset ti rabaw ti daga, ti maysa a benneg wenno pagilian.” Gapuna ti umuna ken kangrunaan a kaipapanan ti sao a Hebreo isu ti planetatayo, wenno ti globo, ti daga.
Nasken unay, nga idi naipatarus ti Salmo 37:11, 29 iti Griego idiay Septuagint, naipaulog ti Hebreo nga ’eʹrets babaen iti Griego a ge, a “mangipampamatmat ti daga kas maysa a matalon a daga.” Ti ge isut’ sao a nausar iti nagpateg a padto ni Jesus idiay Mateo 5:5: “Naragsak dagiti naemma, ta tawidendanto ti daga.”
Pudno unay, nga idi inadaw ni Jesus ti kari idiay Salmo 37:11, saanna a tuktukoyen laeng ti Naikari a Daga. Dagiti napulotan a paspasurotna agbalindanto a nailangitan nga ari-papadi a kaduana a makipagturay iti intero a naindagaan a globo. (Apocalipsis 5:10) Umasping met iti dayta, dagiti naemma a makagun-od ti biag nga agnanayon kas tattao tumulongdanto a mangisubli iti Paraiso a kasasaad iti intero a daga. (Apocalipsis 21:4; Genesis 1:28) Gapuna, mabalintay amin ti kumita iti nakaskasdaaw a masanguanan a kaitungpalan ti kari a: “Ta ti naimbag tawidennanto ti daga, ket agtaengto nga agnanayon iti rabawna.”—Salmo 37:29, Fenton.