JEDUTUN
[mabalin a nagtaud iti sao a kaipapananna ti “idayaw”].
1. Levita a musikero. Mabalbalin a ni Jedutun maawagan idi iti Etan, ta sakbay ti isasangpet ti Lakasa idiay Jerusalem, ni “Etan” ket nainaig kadagiti dadduma a musikero, da Heman ken Asaf, idinto ta kalpasan dayta, adda ni “Jedutun” iti daytoy met laeng a timpuyog. (1Cr 15:17, 19; 25:1) Awan ti nadakamat a kapuonan ni Jedutun; adda no ni Etan. (1Cr 6:44-47) Ket awan dagiti nadakamat a kaputotan ni Etan; adda no ni Jedutun. (1Cr 9:16) Ti pannakabalbaliw ti nagan manipud Etan [kaipapananna ti “Patinayon; Kanayon nga Agay-ayus”] a nagbalin a Jedutun [mabalin a nagtaud iti sao a kaipapananna ti “idayaw”] ket pudno unay a maitunos iti annong a naited kenkuana.—1Cr 16:41; kitaenyo ti ETAN Num. 3.
Ni Jedutun ken ti pamiliana a buklen dagiti musikero nakipasetda iti nadumaduma a rambak no mayurnos ti “panagyaman ken panangidaydayaw ken Jehova” (1Cr 25:3); kas pagarigan, idi a ti lakasa ti tulag naipan idiay Jerusalem. (1Cr 16:1, 41, 42) Kadagiti 24 a benneg a nakapaglalasinan dagiti musikero ti santuario idi inorganisar manen ni David, ti maika-2, maika-4, maika-8, maika-10, maika-12, ken maika-14 a pannaka-bunot naitumpong iti innem nga annak ni Jedutun, nga aminda ket nagtartrabaho iti sidong ti panangiwanwan ni amada. (1Cr 25:1, 3, 6, 7, 9, 11, 15, 17, 19, 21) Ti panagkakadua da Jedutun, Asaf, ken Heman kadagitoy nga annongen kaipapananna a ti tunggal maysa kadagiti tallo a kangrunaan a sanga dagiti Levita (Merari, Gersom, ken Cohat sigun iti kasta a panagsasaganadda) ket naibagian kadagiti musikero ti templo. (1Cr 6:31-47) Amin dagitoy a tallo a grupo indaydayawda ni Jehova babaen iti musika idi inaguraran ni Solomon ti templo. (2Cr 5:12, 13) Nadakamat dagiti kaputotan ni Jedutun bayat ti panagturay ni Ezekias ken karamanda pay kadagiti destiero a nagsubli manipud Babilonia.—2Cr 29:1, 12, 14, 15; Ne 11:17.
Kadagiti paulo ti tallo kadagiti salmo, nadakamat ti Jedutun. Iti dua kadagita (Sal 39, 62), ti mabasa ket “Iti mangiwanwanwan ti Jedutun” (“maitunos iti wagas [ti koro ni] Jedutun,” Ro ftn iti paulo ti Sal 39), idinto ta iti maikatlo (Sal 77), ti mabasa ket “Iti mangiwanwanwan iti Jedutun.” (NW; Ro; AT) Iti tunggal kasasaad, ti pannakaputar ti salmo ket naikuna a gapuanan ti sabali pay, a ti umuna a dua ket gapuanan ni David, ket ti maikatlo gapuanan ni Asaf; gapuna, awan ti pasimudaag a ni Jedutun ti nangputar kadagita, nupay adda paset ti Kasuratan nga isu naawagan iti “managsirmata ti ari” ken naikuna met nga isu “agipadpadto nga addaan iti arpa.” (2Cr 35:15; 1Cr 25:1, 3) Gapuna, dagiti paulo dagitoy tallo a salmo ket nalawag a pammilin no kasano a maiparang dagita, nalabit tukoyenda ti maysa nga estilo wenno uray pay ti maysa a pagtokar iti musika a mabalbalin a nainaig ken Jedutun, a dayta a pagtokar ket mabalin a pinartuatna wenno dagiti annakna, nga isuda ti nangyam-ammo, nangparang-ay, wenno namagbalin a pagaammo iti dayta babaen iti naynay a pannakausar.
2. Maysa a Levita a ti anak wenno kaputotanna a ni Obed-edom ket agay-aywan iti ruangan idi tiempo nga impaipan ni David ti Lakasa idiay Jerusalem.—1Cr 16:1, 37, 38.