Adigi iti Baybay

◼ Nakakitakayo kadin iti alipugpog a danum? Manipud iti kosta ti Tahiti, adda ti kasta a timmaud idi Disiembre 25, 2005. Dayta nga alipugpog iti nagbaetan ti tangatang ken baybay ket nagpaut iti agarup 30 a minuto. Kalpasanna, in-inut a pimmuraw sa nagpukaw.

Dagiti alipugpog a danum ket masansan a nakapkapuy ngem kadagiti allawig. Gagangay nga agpautda iti sangapulo a minuto, nupay adda dagiti agpaut iti maysa nga oras. Gapu ta tumaudda iti baybay, masansan a maiparna laeng ti pannakakita kadagita. Dayta ti makagapu a marigatan dagiti meteorologo a mangtarus a naan-anay. Sigun kadagiti damag, agungorda a kas iti tren.

Iti panangdeskribirna iti nariribuk a riknana, insurat ti maysa a salmista iti Biblia idi nagkauna a panawen: ‘Ti nadanum a yuyeng umaw-awag iti nadanum a yuyeng iti uni dagiti pussuak ti danummo.’ (Salmo 42:7) Nupay ditay ammo no daytoy a kita ti pussuak ti danum (alipugpog a danum) ti tuktukoyen ti salmista, mabalin a ti riknana ket mailadawan babaen iti dayta a karkarna a pasamak. Kinunana a ‘maup-upay’ ti riknana ken ‘naariwawa’ ti unegna. Kaskasdi, nakagun-od iti liwliwa manipud iti Diosna. “Urayem ti Dios,” kinunana iti bagina, “ta isu idayawkonto pay kas ti naindaklan a pakaisalakanan ti kinataok ken kas ti Diosko.”—Salmo 42:11.

Kas iti salmista, mabalin a makapasartayo kadagiti arig allawig iti baybay a pakarigatan. Ngem no agtalektayo iti Dios, isalakannatayto.