Makangngeg iti Uni Dagiti Kobra Idiay Sri Lanka
“Kasda la kobra a tuleng a rinekpanna ti lapayagna, a dina mangngeg dagiti manangkayaw.”—Salmo 58:4, 5.
Iti The New York Times, Enero 10, 1954, iti paulo nga “Are Snakes ‘Charmed’ by Music?” (‘Makayawan’ Kadi ti Musika Dagiti Uleg?) nasarakan ti sumaganad a report a naadaw iti Salmo 58:4, 5: “Ni Dr. David I. Macht, managsirarak a parmacologo ti Mount Sinai Hospital idiay Baltimore [E.U.A.], ket maysa kadagiti kalaingan nga autoridad iti lubong maipapan iti gita ti uleg a kobra. (Maawaten kas agas ti gita ti kobra, kas pangarigan, kadagiti sakit ti dara.) Impadamag ni Dr. Macht nga iti panagadalna kadagiti kobra ken gitada, nabalinanna ti nakilangen kadagiti sumagmamano a Hindu a doktor, edukado unay, ken naggapu iti nadumaduma a paset ti India. Umanamongda amin a dagiti kobra agtignayda iti dadduma a tono ti musika, manipud plauta wenno torotot. Impadamag dagiti doktor nga adda kita ti musika a pakaallukoyan dagiti ayup ngem iti dadduma a kita. Napakdaaran payen dagiti ubbing nga agay-ay-ayam no sarsardam kadagiti away a dida agkanta di la ket ta maallukoy dagiti kobra iti timekda, kinunana. Imbaga ni Dr. Macht a ni Shakespeare, a maulit-ulit a nangtukoy kadagiti karasaen kas tuleng . . . ti nangulit laeng iti kadawyan a kamali. Iti sabali a bangir, kinuna ni Dr. Macht nga umiso ti salmista a nagkuna iti Salmo 58, Bersikulo 5, a makangngeg dagiti uleg.”
Kasta met a kunaen ti autor iti maysa nga artikulo a naipablaak iti magasin maipapan ti ayup idiay Alemania a Grzimeks Tier, Sielmanns Tierwelt (Grzimek’s Animal, Sielmann’s Animal World), Hulio 1981, panid 34 ken 35, nga adda kobra nga agtataeng iti bunton ti anay iti dagana idiay Sri Lanka. Kiniddawna iti maysa a manangkayaw kadagiti uleg a tiliwenna ti nagita a kobra sana pagsalaen dayta. Ipadamag ti autor: “Kalpasan nga impasigurok iti bisitak nga adda a talaga kobra nga agtataeng sadiay, nagtugaw iti sanguanan ti bunton ti anay sana pinuyotan ti plautana. Kalpasan ti nabayag a tiempo—diak patienen nga adda pay laeng mapasamak—timman-aw ti kobra iti sumagmamano a centimetro. Sakbay a nagnganga ti kobra, dagus a ginammatan ti manangkayaw ti ulona babaen ti tangan ken dua a ramayna.” Idi agangay, talaga a napagsala ti Indian ti kobra.
Gapuna, adda pammaneknek a talaga a “dumngeg [ti kobra] iti timek dagiti manangkayaw.”—New World Translation of the Holy Scriptures—With References, Appendix 7A, panid 1583.