KAYAW, II
Ti Hebreo a sao nga ʼit·timʹ naaramat iti Isaias 19:3 a tumukoy kadagiti “manangkayaw” ti Egipto. Ti Hebreo a sao a cheʹver (naipatarus a “pagilabeg”) tumukoy iti maysa a pormula ti salamangka a naisawang, nakanta, wenno naisurat kas pagilabeg tapno “mangkayaw” iti maysa a tao. (Sal 58:5; Isa 47:9, 12) “Ti arkos nga umaw-aweng a kulkulintipay” nga ik-ikutan ken awan duadua nga inyaruat ti annak a babbai ti Sion ket nabatad a kaykayaw. Ti Hebreo a sao a tumukoy kadagita (lecha·shimʹ) ket nagtaud iti sao a kaipapananna ti “arasaas; kayaw.” (Isa 3:20; idiligyo ti 2Sm 12:19; Sal 58:5.) Ti kakasta nga espiritistiko nga ar-aramid ket karaman “kadagiti nakarimrimon a banag” nga imparit ni Jehova a pakaigameran ti ilina. (De 18:9-11) Nagdindinamag dagiti kadaanan a taga Babilonia, Egipcio, ken dadduma pay gapu iti panagtalekda kadagiti kayaw ken kadagiti panagilabeg.—Isa 19:3; 47:9, 12.
Panangkayaw iti Uleg. Ti makunkuna a panangkayaw iti uleg mabalin a porma ti espiritismo ken nabatbati nga elemento ti kadaanan a kulto dagiti managdaydayaw iti serpiente. Maipagarup a ti manangkayaw mangaramid iti panangilabeg iti serpiente, masansan a maysa nga agberkakak a kobra, iti kasta agparang a nakayawan babaen ti pannakatokar ti musika, gagangay nga iti maysa a plauta wenno pagtokar a pito. Saan a tuleng dagiti uleg, saanda met a marigatan a dumngeg, kas mabalin a pagarupen ti dadduma, no di ket kas ipasimudaag ti Salmo 58:4, 5, kabaelanda a denggen ti timek dagiti manangkayaw kasta met ti musika. Mabalin a pagarupen ti maysa a dayta ket nasigo laeng a panangsanay iti uleg kas no ti maysa mangsanay iti animal wenno tumatayab, babaen ti panangikabilna iti alludan nga addaan kalub, ken panangtokar iti naalumamay a musika. Ngem no aggandat nga aglibas, sidadaras nga itakkabna ti kalub agingga a kamaudiananna masursuro ti uleg ti tumangwa a sililinteg kas panagtulnog iti musika, a saanna a padpadasen ti aglibas. Nupay mabalin a pudno daytoy iti sumagmamano a kasasaad, nalawag a masansan nga adda pannakairaman dagiti espiritistiko a puersa iti panangkayaw iti uleg.
Ti mangpasingked nga addan daytoy nga espiritistiko nga aramid idi pay un-unana isu ti pannakadakamatna iti Biblia.—Sal 58:4, 5; Ec 10:11; Isa 3:3; Jer 8:17.