Dadduma ti mangiruprupir pay iti saanen a panaginum. Ti naadaw iti ngato a klero a taga Nigeria ti nagkuna: “Espesipiko a kuna ti Proverbio 20:1 a dagidiay aginum ti arak saanda a masirib.” Ket kuna pay ti sabali a manangasaba: “Ti Nasantuan a Kasuratan ilunodna ti alkohol idiay Libro ni Isaias,” a tuktukoyenna dagiti teksto idiay Isaias 5:11, 12, ken Isa 5:22.

“Saan a Masirib”​—Agpaay ti Siasino?

Kaipapanan kadi daytoy a ti alkohol ti maiparit a naan-anay kadagiti Kristiano? Ania met ngay no maipapan ti panagkuna ti klero, a nadakamat iti immuna nga artikulo, a kunana a naibatay iti Proverbio 20:1, a “dagiti tattao a mamasirib saanda nga umin-inum a pulos ti arak.” Kastoy ti panangipaulog ti King James Version iti daytoy a bersikulo: “Ti arak managrabrabak, ti naingel nga inumen managringringgor: ket siasinoman a mailaw-an kenkuana saan a masirib.” Ditoy manen, saan a dusaen ti Biblia dagidiay aginum ti arak no di ket, dagidiay mailaw-an iti dayta! “Dagiti agtalinaed a napaut iti arak” ken “dagiti mangnginum iti arak”​—dagitoy dagiti “saan a masirib.”