Proverbio 22:6—“Sanayem ti Ubing iti Dalan a Rumbeng a Papananna”

“Sanayem ti ubing iti dalan a rumbeng a papananna; uray inton lumakay saannanto a panawan dayta.”—Proverbio 22:6, Baro a Lubong a Patarus.

“Iruammo ti ubing iti umno a dalan ket uray inton lumakayen dinanto panawan.”—Proverbio 22:6, Ti Baro a Naimbag a Damag Biblia.

Kaipapanan ti Proverbio 22:6

Dagiti nagannak a mangisursuro kadagiti annakda a mangayat iti Dios ken mangsurot kadagiti lintegna ekspektarenda a nasayaat ken manayon ti epekto ti kasta a panangsanayda.

“Sanayem ti ubing iti dalan a rumbeng a papananna.” Mabalin met a ti kaipapanan dagita a sasao ket “iruammon ti ubing iti umiso a dalan.” Mamin-adu nga imparegta ti libro a Proverbio kadagiti nagannak nga isurodan kadagiti annakda ti umiso ken di umiso bayat nga ubbingda pay. (Proverbio 19:18; 22:15; 29:15) Ngem bigbigen dagiti naayat a nagannak a dagiti annakda ket kas kadagiti adulto nga addaan iti wayawaya nga agpili. Isu nga imbes nga ibagada laeng kadagiti annakda ti aramidenda, ilawlawagda dayta ken tulonganda dagiti annakda nga agbalin a manakem ken responsable nga adulto a makaaramid iti umiso a desision a bukbukodda.—Deuteronomio 6:6, 7; Colosas 3:21.

Ibaga ti dadduma nga eskolar ti Biblia a dagitoy a sasao kaipapananna ti “sanayem ti ubing sigun iti nakaisigudanna,” wenno sigun iti natural a kababalinna. Kasla husto met ti interpretasionda, ngem ti Hebreo a sasao a naipatarus kas “iti dalan a rumbeng a papananna” ket mabalin a tumukoy iti nasayaat ken nalinteg a panagbiag. Ipakita ti libro a Proverbio ti dua a dalan a mabalin a pagnaan ti maysa a tao. Ti maysa ket naawagan iti “dalan ti naimbag a tattao,” “dalan ti sirib,” ken “umiso a dalan.” (Proverbio 2:20; 4:11; 23:19) Ti sabali ket naawagan iti “dalan ti dakes a tattao,” dalan ti maag, ken “di umiso a dalan.” (Proverbio 4:14; 12:15; 16:29) Ti ngarud dalan a ‘rumbeng a papanan’ ti ubing ket tumukoy iti “umiso a dalan”—ti dalan ti biag nga isursuro ti Sao ti Dios, ti Biblia.—Salmo 119:105.

“Uray inton lumakay saannanto a panawan dayta.” No isursuro dagiti nagannak iti anakda dagiti moral nga estandarte ti Dios, dakdakkel ti posibilidadna nga agtalinaed iti umiso a dalan iti intero a panagbiagna. Ngem dina kayat a sawen dayta a ti ubing a nasanay a naimbag saannan a “panawan” ti umiso a dalan wenno sukiren dagiti linteg ti Dios. Kas pagarigan, no ti maysa ket kanayon a makikadkadua kadagiti mangim-impluensia iti dadduma nga agaramid iti dakes, mabalin a panawanna ti “nalinteg a dana” ket agaramid iti dakes. (Proverbio 2:12-16; 1 Corinto 15:33) Uray no kasta, no sanayen dagiti nagannak ti annakda a sumurot iti estandarte ti Dios, ik-ikkanda ida iti oportunidad nga agballigi iti biag.—Proverbio 2:1, 11.

Konteksto ti Proverbio 22:6

Naglaon ti Proverbio kapitulo 22 kadagiti ababa a pagsasao a mangipakita iti sirib ti Dios maipapan iti nagduduma a kasasaad iti biag. Ipaganetget dagitoy a sasao a nakapatpateg ti maaddaan iti nasayaat a reputasion ken Jehova,a ket maadda laeng dayta iti maysa a tao no napakumbaba, naparabur, ken nagaget. (Proverbio 22:1, 4, 9, 29) Iti sabali a bangir, ipakita ti dadduma a bersikulo a dagidiay di mangikabilangan kadagiti estandarte ti Dios ken mangirurumen kadagiti napanglaw ket saanto a nasayaat ti pagtungpalanda.—Proverbio 22:8, 16, 22-27.

Uray no kaaduan a bersikulo ti Proverbio kapitulo 22 ket saan a tumukoy iti panangsanay iti ubing, deskribirenda ti dalan ti biag nga agresulta iti anamong ti Dios ken pudpudno a kinaragsak. (Proverbio 22:17-19) No sansanayen dagiti nagannak ti annakda maitunos iti dayta a dalan ti biag, ipakpakitada a kayatda ti kasayaatan para iti annakda.—Efeso 6:1-3.

Buyaem ti ababa a video tapno maammuam no ania ti pakabuklan ti libro a Proverbio.