“Iruammo ti Ubing”
TI NABALLIGI a panaghardin, saan nga umdas ti basta panangipuruak kadagiti bukel sa sublian no panagaapit kalpasan ti sumagmamano a bulan. Adu a trabaho ti kasapulan iti panangisagana iti pagmulaan, panangitukit kadagiti bukel, ken panangsibug ken panangtaraken kadagiti mula tapno makadakkelda.
Maitutop daytoy a mangiladawan iti kinapudno ti Proverbio 22:6, a kunana: “Iruammo ti ubing iti dalan a rebbengna a papanan, ket uray inton lakayen saannanto a pagpanawan.” Wen, ti panangsanay dagiti nagannak ket dakkel ti maitulongna iti naballigi a panangpadakkel iti anak.
Ngem iti napanuynoy a lubong ita, adu a nagannak ti di mangipangpangag iti daytoy a balakad. No surotenda ti kadawyan a kapanunotan a nasken a sursuruen dagiti ubbing a risuten dagiti bukodda a problema, masansan a mabaybay-an dagiti annakda nga agbiag nga agbukbukod. Iti kasta, nalaka a maaringan dagiti ubbing iti dakes nga impluensia dagiti awanan prinsipio ken rinuker a tattao.
Anian a nasaysayaat nga amang no masapa nga itukit dagiti nagannak dagiti Nakristianuan a prinsipio kadagiti annakda babaen ti nadiosan a pannursuro! Kasano kasapa? “Manipud kinamaladaga,” kuna ni apostol Pablo. Pudno dayta ken ni agtutubo a Timoteo. Intukit da Eunice nga inana ken ni Loida nga apongna “dagiti nasantuan a sursurat” ken Timoteo ket ‘nakasursuro’ ken ‘naguyugoy a mamati.’ Ania ti resultana? Nagpateg ti paset ti kasta a pannursuro iti panagbalinna a ‘masirib maipaay ti pannakaisalakan.’—2 Timoteo 1:5; 3:14, 15.
Kasta met ita, dagiti nagannak a ‘di sumuko iti panagaramid ti nasayaat’ agapitdanto kadagiti nabaknang a gunggona no ‘saanda a mabannog.’ (Galacia 6:9) Kuna ni masirib nga Ari Solomon: “Ti ama ti nalinteg agragrag-onto unay.”—Proverbio 23:24.