“Sao a Maitutop ti Pannakaisaona”

“Ti sao a maitutop ti pannakaisaona kasla mansanas a balitok a nabungon iti iniket a pirak,” kuna ti Proverbio 25:11. Dagiti sasaotayo a mabuyogan ti panagpanunot ken dagiti naasi nga ar-aramid ti mabalin a nakalamlamuyot a manggutugot iti puso ti nalinteg a tao iti dalan iti pananganamong ni Jehova. Maysa a banag a naisaotayo wenno naaramidtayo, uray pay adu a tawtawenen a napalabas, ti mabalin a malaglagip pay laeng ti sabali a tao. Kas pangarigan, bayat iti panagbisitana iti maysa a kongregasion, maysa a manangaywan iti sirkito ken ti asawana ti sinangaili ti maysa a kabbaro a nabautisaran a kabsat a babai. Ti asawa ti manangaywan ti sirkito nangipatulod iti surat ti panagyaman kas panangapresiar iti naipakita a kinamanagpadagos. Nasurok a pito a tawenen a napalabas, isut’ nakaawat iti sumaganad a surat:

“Mariknak a masapul nga agsuratak ket ibagak kadakayo a nakatulongkayo iti nagdakkelan kaniak bayat dagiti adu a tawtawen a dikay pagaammo. Sinangailikayo ken ni Jim iti maysa a pangngaldaw, ket nangipatulodkayo iti nagpintasan a kard ti panagyaman. Nakabarbara dayta, ngem ti kasuratan ti nangtignay ti pusok, ta pulos a diak malipatan. Daytoy ket napasamak idi 1976. Sisiak iti pamiliami nga interesado iti kinapudno. Nakipagadalak kadagiti annakko a babbai ket pinadasko ti agbalin a naimbag nga asawa a babai. Ngem no dadduma tarigagayak ti agikkat, agikkat iti kinapudno, mangpanaw iti rebbengen​—basta agikkat. Ngem dayta kasuratan nga insuratyo ti nangtignay iti pusok, ket kunaek iti bagik, ‘Anian a nagagumak,’ ket agtuloyakon.

“Awanen ti banag kadagidiay amin a walo a tawen ti addaan iti kasta unay nga epekto kaniak, ket tarigagayak nga ibaga dayta kadakayo. Malaksid ti kasuratan, no panunotek anian a nagsayaatan ta adda maysa nga okupado unay a kas kadakayo a mangipaay iti tiempo nga agyaman kaniak iti panangaramidko iti banag a rebbeng nga aramidek.

“Ay, wen​—ti kasuratan​—2 Juan 8.

“Sandra”

Itatta, ti asawa ni Sandra nabautisaranen ket kaduanan kas manangibunannag iti naimbag a damag. Maysa kadagiti dua nga annakna a babbai ti regular payunir, ket ti sabali nga anak a babai nag-auxiliary payunir nanipud idi nabiit pay a panagraduarna iti high school.

Kamaudiananna, ania ti kunaen ti 2 Juan 8? “Igagayo dagiti bagbagiyo, tapno dikay koma mapukaw dagiti bambanag nga inaramidtayo, no di ket awatenyo koma ti maysa a gunggona a naan-anay.”