“Pakapaimbagan ta Pusegmo”

MAKUNA nga adu kadagiti sakit dagiti tattao ti maigapu iti emosional a pannakariribuk kas iti buteng, ladingit, apal, sakit ti nakem, gura, ken pannakakonsiensia. Gapu iti daytoy, anian a makaliwliwa ti kuna ti Biblia a ti ‘panagbuteng ken Jehova’ ket “pakapaimbagan ta pusegmo ken pakapabang-aran dagita tulangmo”!​—Proverbio 3:7, 8, NW.

Dagiti tulang ti pannaka-estruktura ti bagi. Gapuna, inaramat ti Biblia ti sasao a ‘dagiti tulang’ iti piguratibo a pamay-an a mangiladawan iti kinatao​—nangnangruna no apektaran ti nasged a rikna ken emosion. Ngem kasano a “pakapaimbagan ta pusegmo” ti panagbuteng ken Jehova?

Agduduma ti kapanunotan dagiti eskolar ti Biblia no maipapan iti pannakausar ti “puseg” iti daytoy a teksto. Kuna ti maysa a komentarista nga iladladawan ti “puseg” ti amin a napateg nga organo gapu ta masarakan dayta iti “katengngaan a paset ti bagi.” Kuna ti sabali nga eskolar a ti literal a puseg ti kayat a sawen dayta a sao, kas pannakaaramatna iti Ezequiel 16:4. No kasta, mabalin nga ipagpaganetget ti Proverbio 3:8 a masapul a naan-anay nga agpannuraytayo iti Dios​—no kasano a ti awan gawayna a sikog ket naan-anay nga agpannuray iti inana para iti taraon. Ngem adda met ti agkuna a dagiti piskel ken pennet ti bagi ti mabalin a kayat a sawen ti “puseg.” Iti konteksto daytoy a bersikulo, mabalin a naaramat dagitoy a paset tapno maigidiat kadagiti “tulang”​—ti natangtangken a paset ti bagi.

Aniaman ti eksakto a kaipapananna, maysa a banag ti sigurado: Nainsiriban ti panagbuteng ken Jehova gapu iti panagraem kenkuana. Makapasalun-at ti panangsurot kadagiti pagalagadan ti Dios. Nangnangruna iti dayta, magun-odtayo ti anamong ni Jehova a mangiturong iti biag nga agnanayon iti perpekto a salun-at​—pisikal ken emosional​—iti umad-adani a baro a lubongna.​—Isaias 33:24; Apocalipsis 21:4; 22:2.

[Picture Credit Line iti panid 32]

Dr. G. Moscoso/SPL/Photo Researchers