Nadisenio Kadi?

Kapet ti Tekka

◼ Agamanga dagiti sientista iti abilidad ti tekka nga agkarayam kadagiti naparanas a banag, a kas iti sarming ken bobida, a saan a pulos a matnag! Kasano a maaramidan dayta daytoy bassit a parsua?

Kuna ti Biblia a ti tekka “kumpet babaen kadagiti bukodna nga ima.” (Proverbio 30:28) Ti saka ti tekka talaga nga umaspingda iti ima, ket nakaskasdaaw ti napartak a panagkapetda kadagiti naparanas wenno nagalis pay ketdi a banag. Adda ngamin rinibu a kasla muldot iti tunggal ramayna. Ket iti tunggal muldot, addaan iti ginasut a nagpino a buok. Dagiti puersa iti nagbabaetan dagiti molekula (a maawagan iti van der Waals) nga agtaud kadagitoy a nagpino a buok umdasen a mangtengngel iti kadagsen ti tekka, uray pay no agkarayam a pabalinsuek iti sarming!

Kayat dagiti managpartuat ti mangaramid iti pigket a kas iti kakapet ti saka ti tekka, a mabalin a kumpet iti nagalis a banag.a Malaksid iti dadduma a pakausaranna, mabalin nga adda “nagduduma a pakausaranna iti medisina,” kuna ti magasin a Science News, “manipud kadagiti bedbed a saan a maikkat uray no mabasa agingga kadagiti tape a mabalin a kasukat dagiti pagdait iti sugat ti operasion.”

Kalpasan daytoy nga ababa a panangusig, ania ti makunam? Naiparna laeng kadi a timmaud ti kapet ti tekka wenno nadisenio?

[Footnote]

[Ladawan iti panid 26]

Nakabaliktad a tekka a tokay

[Ladawan iti panid 26]

Dagiti nagbabassit a muldot iti saka ti tekka

[Picture Credit Lines iti panid 26]

Tekka: Breck P. Kent; napadakkel a ladawan ti muldot: © Susumu Nishinaga/​Photo Researchers, Inc.