Nainsiriban a Pammagbaga ti Maysa nga Ina

“Anakko, denggem ti pannursuro toy amam, ket dika bay-an ti linteg ni inam.”​—Proverbio 1:8.

DAGITI nagannak kadatayo​—da ama ken inatayo​—mabalin a napategda a gubuayan ti pammaregta, pannaranay, ken pammagbaga. Saritaen ti libro ti Biblia a Proverbio ti maipapan iti maysa nga agtutubo nga ari a ni Lemuel, nga immawat iti ‘nadagsen a mensahe’ ti ‘pannursuro’ ni nanangna. Naisurat dagitoy a sasao iti Proverbio kapitulo 31, ket mabalin met a magunggonaantayo iti nainsiriban a pammagbaga daytoy nga ina.​—Proverbio 31:1, NW.

Pammagbaga a Maitutop iti Maysa nga Ari

Nangrugi ti ina ni Lemuel babaen ti sumagmamano a saludsod a mangparayray iti interestayo: “Ania, anakko? Ket ania, O anak toy tianko? Ket ania, O anak dagiti karkarik?” Ipasimudaag ti namitlo a panangulitna iti pakaasina ti kasta unay a pannakaseknanna nga ipangag koma ti anakna ti pammagbagana. (Proverbio 31:2) Ti pannakaseknanna iti naespirituan a pagimbagan ti anakna ket nagsayaat nga ehemplo kadagiti Kristiano a nagannak iti kaaldawantayo.

Maipapan iti pagimbagan ti anakna, adda kadi pay nakarkaro a pakadanagan ti maysa nga ina no di dagiti naariwawa a panagragragsak ken pannakaigamer iti arak, babbai, ken kanta? Direkta iti punto ti ina ni Lemuel: “Dika itden ta pigsam kadagiti babbai.” Dineskribirna ti nalulok a kababalin a “makadadael kadagiti ari.”​—Proverbio 31:3.

Nadakamat met ti nalabes a panaginum. “Saan a maipaay kadagiti ar-ari, O Lemuel, saan a maipaay kadagiti ar-ari ti panaginum iti arak,” impakdaarna. No kanayon a nakainum ti maysa nga ari, kasano a makaaramid iti nasimbeng ken nasin-aw a pangngeddeng ken saan a ‘makalipat iti linteg ken killuenna ti kinahustisia iti siasinoman a mapaldaangan’?​—Proverbio 31:4-7.

Iti kasumbangirna, no awanan iti kakasta a bisio, kabaelan ti ari ti ‘mangukom a sililinteg ken mangsalimetmet iti kinahustisia kadagiti napanglaw ken nakurapay.’​—Proverbio 31:8, 9.

Nupay saan nga “ar-ari” dagiti Kristiano nga agtutubo kadagitoy a panawen, naintiempuan latta, no saan man nga ad-adda a kasapulan ita, ti nainsiriban a pammagbaga ti ina ni Lemuel. Iti kaaldawantayo, nasaknap ti nalabes a panaginum, panagsigarilio, ken seksual nga imoralidad kadagiti agtutubo, ket nasken nga ipangag dagiti Kristiano nga agtutubo no adda ‘nadagsen a mensahe’ nga isuro dagiti nagannak kadakuada.

Natalunggadingan nga Asawa a Babai

Natural laeng a maseknan dagiti inna kadagiti agbalinto nga assawa ti agmatmataengan nga annakda. Isu nga inturong ti ina ni Lemuel ti atensionna kadagiti saguday ti maikari nga asawa a babai. Awan duadua a pagimbagan unay ti maysa nga agtutubo a lalaki no usigenna ti panangmatmat ti maysa a babai maipapan iti daytoy napateg a banag.

Iti Pr 31 bersikulo 10, mayarig ti ‘natalunggadingan nga asawa a babai’ kadagiti natakkon ken nangina a korales, nga idi panawen ti Biblia ket magun-odan laeng babaen ti dakkel a panagregget. Iti umasping a wagas, ti panagsapul iti natalunggadingan nga asawa a babai kalikagumanna ti panagregget. Imbes nga agdarasudos a mangasawa, nasayaat no mangiwaya pay laeng ti maysa nga agtutubo a lalaki iti umdas a panawen nga agpili. Iti kasta, ad-adda nga ipategnanto ti nasudi a masarakanna.

Maipapan iti natalunggadingan nga asawa a babai, naibaga ken Lemuel: “Ti puso ti asawana sitatalek kenkuana.” (Pr 31 Bersikulo 11) Iti sabali a pannao, saan nga ipapilit ti asawa a lalaki a dawaten ni baketna ti anamongna iti tunggal banag. Siempre, rumbeng nga aginnuman ti agassawa sakbay nga agaramidda iti napapateg a desision, kas kadagidiay mainaig iti pananggatang iti nangingina a banag wenno ti panangpadakkel iti annakda. Makatulong ti komunikasion kadagitoy a benneg tapno nasingsinged ti relasionda.

Siempre, adu ti aramiden ti natalunggadingan nga asawa a babai. Iti Pr 31 bersikulo 13 agingga iti 27, nailista dagiti pammagbaga ken prinsipio a mabalin nga usaren dagiti assawa a babbai iti aniaman a panawen a pagsayaatan dagiti pamiliada. Kas pagarigan, gapu ta nguminngina ti kawes ken kagawaan, sursuruen ti natalunggadingan nga asawa a babai ti agbalin a nasigo ken nasalimetmet tapno adda umdas ken presentable a pagkawes ti pamiliana. (Pr 31 Bersikulo 13, 19, 21, 22) Tapno makissayan ti gastos ti pamilia iti taraon, agmulamula ken siaannad a makitienda.​—Pr 31 Bersikulo 14, 16.

Nabatad a daytoy a babai saan a mangan “iti tinapay ti kinasadut.” Nagaget ken kitaenna a naimbag ti trabaho ti sangakabbalayanna. (Pr 31 Bersikulo 27) “Bariksanna dagiti lomona iti kinabileg,” kayatna a sawen, sisasagana a mangaramid kadagiti nadagsen a trabaho. (Pr 31 Bersikulo 17) Nasapa a bumangon tapno rugianna ti agtrabaho, ket sigagaget nga agtrabaho agingga iti rabii. Kas man la kanayon a nakasindi ti pagsilawan a manglawag iti trabahona.​—Pr 31 Bersikulo 15, 18.

Kangrunaanna, ti natalunggadingan nga asawa a babai ket naespirituan a tao. Agbuteng iti Dios ken agdaydayaw kenkuana buyogen ti nauneg a panagraem ken nadayaw a panagbuteng. (Pr 31 Bersikulo 30) Kanayonanna, tulonganna ni lakayna a mangsanay kadagiti annakda a mangaramid met la iti kasta. Kuna ti Pr 31 bersikulo 26: “Buyogen ti kinasirib” nga isurona dagiti annakna, ket “ti linteg ti kinamanagayat adda iti dilana.”

Natalunggadingan nga Asawa a Lalaki

Tapno maatrakar ni Lemuel ti natalunggadingan nga asawa a babai, masapul a tungpalenna dagiti rebbengen ti natalunggadingan nga asawa a lalaki. Ti ina ni Lemuel ipalagipna iti sumagmamano kadagitoy.

Ti natalunggadingan nga asawa a lalaki makaawat iti nasayaat a damag “kadagiti panglakayen iti daga.” (Proverbio 31:23) Kaipapananna nga isu ket makabael, napudno, mapagpiaran, ken managbuteng iti Dios. (Exodo 18:21; Deuteronomio 16:18-20) No kasta, “mabigbig kadagiti ruruangan,” a pagtitiponan dagiti prominente a lallaki a mangas-asikaso kadagiti aktibidad ti siudad. Tapno agbalin a ‘mabigbigbig’ kas managbuteng iti Dios a lalaki, masapul nga agbalin a nainkalintegan ken makitunos kadagiti panglakayen ti “daga,” nalabit maysa a distrito wenno rehion ti kayatna a sawen.

Awan duadua a tangay agsasao ti ina ni Lemuel maibatay iti bukodna a kapadasan, palpalagipanna ti anakna maipapan iti kinapateg ti panangipakitana iti apresasion iti agbalinto nga asawana. Para kenkuana, awanen ti napatpateg pay a tao ditoy daga. Isu a panunotenyo ti kinapasnek ti timekna idi impakaammona iti amin: “Adu nga inanak a babbai nagaramidda a maikari unay, ngem sika atiwem amin ida.”​—Proverbio 31:29.

Nabatad nga inapresiar ni Lemuel ti nainsiriban a pammagbaga ni nanangna. Makitatayo, kas pagarigan, nga iti Pr 31 bersikulo 1, tinukoyna ti sasao ni nanangna kas sasaona a mismo. Impapusona ngarud ti “insuro” ni nanangna ken nagunggonaan iti pammagbagana. Sapay koma ta magunggonaantay met iti daytoy ‘nadagsen a mensahe’ babaen ti panangyaplikar iti prinsipiona iti biagtayo.

[Dagiti Ladawan iti panid 31]

Ti natalunggadingan nga asawa a babai saan a mangan “iti tinapay ti kinasadut”