PANAGTIBBI
Ti proseso a panangbennat ken panangtabid kadagiti linabag ti mula wenno animal, kas iti lino, kapas, delana, ken dutdot ti kalding, tapno pagbalinen a sinulid wenno sag-ut. Dagiti natibbi a sinulid wenno sag-ut ket maaramat iti panagabel, panagdait, panagborda, wenno iti aramiden a tali.
Kadagiti Hebreo ken dadduma pay a tattao, ti ungkal ken takbian ti ar-aramatenda idi iti daytoy a proseso. Naikuna maipapan iti makabael nga asawa a babai: “Dagiti imana inyunnatna iti ungkal, ket dagiti bukodna nga ima iggamanda ti takbian.” (Pr 31:19) Ti ungkal ket maysa a bislak a silulukay a nakaipulipolan dagiti linabag a nadalusanen ken nasagaysay wenno nawakray (Isa 19:9). Nagduduma dagiti pamay-an, ngem ti maysa kadagitoy ket ti panangiggem iti ungkal iti makannigid nga ima. Maguyod manipud iti dayta dagiti linabag agingga iti kalalainganna a kaatiddog a nayusok iti takbian. Ti takbian ket maysa nga ab-ababa a bislak nga addaan iti abut iti maysa nga ungto a pakaisulbongan dagiti linabag ken maysa a pannaka-kararet (naaramid iti nadagsen a banag kas iti bato wenno buli) iti asideg ti bangir nga ungto. Usaren ti agtibtibbi ti makannawan nga ima a mangpatayyek iti nakabitin a takbian, iti kasta matabid dagiti linabag a mapagbalin a sinulid. Iti sumaganad, daytoy natibbi a sinulid ket maipulipol iti ungkay ti takbian sa maisiglot. Kalpasanna maulit daytoy a proseso agingga nga amin dagiti linabag iti ungkal mapagbalin a maysa nga atiddog a sinulid.
Iti kadaanan nga Egipto, agpadpada a nagtibbi iti sinulid dagiti lallaki ken babbai, ngem kadagiti Hebreo agparang a ti panagtibbi ket nangnangruna nga inaramid dagiti babbai. Idi a maibangon ti tabernakulo, naaddaan dagiti Israelita a babbai iti pribilehio nga agtibbi ken mangted kadagiti material kas kontribusion.—Ex 35:25, 26.
Tinukoy ni Jesu-Kristo ti panagtibbi idi indagadagna kadagiti adalanna a saanda unay a maringgoran no ania ti ikawesdanto, no di ket agtalekda iti Dios a mangkawes kadakuada. Kinuna ni Jesus: “Paliiwenyo a nalaing no kasano a dumakkel dagiti lirio; saanda nga agbannog wenno uray mambi; ngem ibagak kadakayo, Uray ni Solomon iti isuamin a dayagna saan a nakawesan a kas iti maysa kadagitoy.”—Lu 12:27, 28; Mt 6:28-30.