Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • w89 3/15 pp. 4-6
  • Ituloyyo a Biruken kas Nalmeng a Gamgameng

Awan video-na ti napilim.

Pasensiakan, adda problema iti pannakai-load ti video.

  • Ituloyyo a Biruken kas Nalmeng a Gamgameng
  • Ti Pagwanawanan Mangibumbunannag iti Pagarian ni Jehova—1989
  • Subtitulo
  • Umasping a Material
  • Apay nga Ituloy a Biruken?
  • Naballigi a Panagbiruk iti Gameng
  • Aglaplapusanan dagiti Naespirituan a Napapateg a Batbato
  • Ituloyyo a Biruken!
  • “Ni Jehova a Mismo ti Mangted iti Sirib”
    Ti Pagwanawanan Mangibumbunannag iti Pagarian ni Jehova—1999
  • “Naragsak ti Tao a Nakasarak iti Sirib”
    Ti Pagwanawanan Mangibumbunannag iti Pagarian ni Jehova—2001
  • Umaw-awag ti Pudno a Sirib
    Ti Pagwanawanan Mangibumbunannag iti Pagarian ni Jehova (Pagadalan)—2022
  • Maiparparangarang Aya iti Biagmo “ti Sirib Manipud Ngato”?
    Umadanika ken Jehova
Kitaen ti Ad-adu Pay
Ti Pagwanawanan Mangibumbunannag iti Pagarian ni Jehova—1989
w89 3/15 pp. 4-6

Ituloyyo a Biruken kas Nalmeng a Gamgameng

ANIAN a kinasudi dagiti napateg a batbato iti kinasirib a masarakan iti Sao ti Dios, ti Biblia! Dagitoy nga alahas ipalgakda ti nadiosan a panggep ken ti makaparagsak a namnamatayo iti masanguanan. Liwliwaendatayo ken ipakitada no kasano nga ay-ayuentayo ti Dios. (Roma 15:4) Dagitoy a napapateg a batbato tulongandatayo nga agtignay a nainsiriban iti pannakilangentayo kadagiti dadduma. Kinapudnona, ti kinasirib nga aggapu iti Dios tulongannatayo a magna “iti dalan ti biag” nga addaan ti pannakapnek ken kinaragsak.​—Salmo 16:11; 119:105.

Yantangay adu dagiti gunggona iti kinasirib, masapul nga ipatpategtay unay dayta. “Amin dagiti sasao ti ngiwatko addada iti kinalinteg,” kuna ti napagbalin a persona a kinasirib. “Awan aniaman a kiwer wenno naulpit kadakuada. Bin-igda a nabatad iti makaawat, ken nalintegda kadagiti makasarak iti pannakaammo. Awatenyo ti pannursurok a saan ketdi a ti pirak, ken ti pannakaammo a nangnangruna ngem ti balitok a napili. Ta ti sirib napatpateg ngem dagiti rubrubi, ket amin dagiti kukua a mabalin a tarigagayan saanda a maipadpad kenkuana.”​—Proverbio 8:8-11.

Apay nga Ituloy a Biruken?

Gagangay, ti panagsapul iti naikali a gameng, balitok, wenno pirak ket awan ti ibungana. Daytoy ket saan a pudno iti panagsapul iti nadiosan a kinasirib. Ngem kasano nga agballigitayo iti daytoy a panagsapul? Bueno, ti balligi agpannuray iti no kasano ti kinapasnek ti panagtarigagaytayo iti daytoy a gameng ken no kasano ti panangikagumaantayo a mangbiruk iti dayta. No bigbigentayo ti pudno a pategna, ipatpategtayo dayta ngem kadagiti amin a dadduma a napapateg a bambanag. Ta, “anian a kinasayaat ti pananggun-od iti kinasirib ngem ti balitok! Wen, ti pananggun-od iti pannakaawat ad-adda a pilien ngem iti pirak.”​—Proverbio 16:16.

Mamaregta ti Proverbio 2:1-6: “Anakko, no awatemto dagiti sasaok, ket ipempenmo kenka dagiti bilinko, iti kasta iyallingagmo dagiti lapayagmo iti kinasirib, ken ikapetmo ita pusom iti pannakaawat; wen, awagam ti kinasaririt ket idir-im ta timekmo a maipaay iti pannakaawat, no isu birukem a kas pirak, ken tontonem a kas nalmeng a gamgameng, iti kasta maawatamto ti panagbuteng ken ni Jehova, ken masarakamto ti pannakaammo iti Dios. Ta ni Jehova mangted iti sirib; agtaud iti ngiwatna ti pannakaammo ken pannakaawat.”

Yantangay nalmeng dagiti naikali a gameng, nasken ti panangsapul kadakuada. Bayat ti panagkali, dadduma ti mangisakripisio iti tiempo ti panaglinglingay, taraon ken turog. Ngem ti kasta a panangikagumaan ket maibilang a napateg no nasarakan ti gameng. Masapul a mangaramidtayo iti umasping a panagsakripisio iti panangsapul iti nadiosan a kinasirib. No kasano a ti panangsapul iti naikali a gameng kasapulanna ti makabannog a panagkali, kasta met ti panagsapul iti kinasirib kasapulanna ti panagtalinaed. Saan nga umdas a parparawpaw laeng ti panangbasatayo iti Biblia ken dagiti Nakristianuan a publikasion. Ti tiempo, panagsirarak, ken panagmennamenna ket kasapulan tapno mabirukan dagiti naespirituan a napapateg a batbato. Ngem anian a ragsak no makagun-odtayo iti pannakaawat iti Kasuratan!​—Nehemias 8:13.

Naballigi a Panagbiruk iti Gameng

Wen, ti kinaragsak agtaud iti panangkali iti Sao ti Dios ken ti panangbiruk kadagiti napapateg a batbato iti kinasirib. (Proverbio 3:13-18) Maigapu iti dayta, nasiribtayo no mangibangontayo iti nasayaat a personal a libraria wenno libraria ti pamilia. Ngem ania koma ti linaonna? Malaksid iti nasayaat a diksionario, dagiti Saksi ni Jehova nasarakanda a makatulong ti maaddaan kadagiti nadumaduma a patarus iti Kasuratan, agraman dagiti Nakristianuan a publikasion iti Biblia, agraman ti tinawen a kopia iti Ti Pagwanawanan ken ti kaduana a pagiwarnak nga Agriingkayo! Siempre, masapul nga umiso ti panangusar iti libraria no dayta ti tumulong kadatayo kas managbiruk iti gameng.

Iti panagbiruktayo iti kinasirib, mabalintayo ti agkonsulta iti tema ken Kasuratan a paspaset ti Watch Tower Publications Index wenno dagiti indese iti likudan dagiti liblibro wenno bound volumes dagiti magasin ti Watch Tower Society. Dagitoy dagiti kangrunaan nga alikamen iti panangsapul iti nadiosan a kinasirib. Kinapudnona, dagitoy ket kas iti maysa a mapa a makaiturong kadatayo iti “nalmeng a gamgameng” iti nadiosan a kinasirib. (Proverbio 2:4) No awan kadatayo dagiti kasapulan a publikasion a maipaay iti panagsukimat, mabalin a dagitoy ti magun-odan idiay lokal a Kingdom Hall dagiti Saksi ni Jehova.

Itan, iyilustrartayo ti naballigi a panagsapul iti gameng. Iti panagbasatayo ti Biblia, mabalin a masdaawtayo no kasano a natay ni Judas Iscariote kalpasan ti panangliputna ken ni Jesu-Kristo. Kunaen ti Mateo 27:5 a “pimmanaw ket napan ket nagbitay.” Ngem kunaen ti Aramid 1:18: “Ket idi a natnag nga immuna ti ulona bimtak a naguddua ket naiwara dagiti amin a bagisna.” Gapuna kasano a natay ni Judas? Ti sungbat masarakan babaen ti panangsukimat iti listaan dagitoy a teksto iti “Scripture Index” iti publikasion nga Insight on the Scriptures. Ibagana kadatayo: “Ni Mateo ket kasla tamtamingenna ti kasasaad iti panangikagumaan nga agbekkel, ngem ti Aramid deskribirenna ti nagbanaganna. No pagtiponen dagiti dua a salaysay, agparang a pinadas ni Judas nga ibitay ti bagina met laeng iti maysa a rangkis, ngem ti tali wenno sanga ti kayo naspak ket isut’ natnag a bimtak a naguddua kadagiti batbato iti baba. Ti kasasaad ti lugar iti aglawlaw ti Jerusalem ti mamagbalin iti kasta a pasamak a nakapapati.” (Tomo 2, panid 130) No maipapan iti Insight on the Scriptures, pangngaasiyo ta kitaenyo ti panid 10 daytoy a magasin.

Ti panangusar iti konkordansia tulongannatayo tapno masarakan dagiti teksto ti Biblia. Siempre, no salaysayenyo ti maysa a kasuratan, paliiwenyo ti kontekstona. Tapno iyilustrar daytoy, usigentayo ti Salmo 144:12-14. Dagitoy a bersikulo irepresentarda ti dadduma a tattao a kas kunkunaenda: ‘Intono dagiti annakmi a lallaki arigda la mulmula a nakadakkelen iti kinabumaroda, ket dagiti annakmi a babbai arigda la bato a pasuli a natiktikanen a kas pangpapintas iti palasio, no dagiti kamaligmi napnodan a maipaaydan ti aniaman a kita ti pempen, ket dagiti karneromi pasngayendan ti rinibo ken pinullo a ribo kadagiti aw-awaymi, no dagiti bakbakami namuseksekdan.’ Mabalin a panunotenyo a dagitoy a sasao agaplikarda iti ili ti Dios, ngem ipakita ti konteksto a saan. Iti Sal 144 bersikulo 11 dumawdawat ni David iti pannakaisalakan manipud kadagiti naulbod. Pagtangsitda dagiti annakda a lallaki, dagiti annakda a babbai, dagiti karneroda, ken bakbakada. Sigun iti Sal 144 bersikulo 15, dagita a managbasol kinunada: “Naragsak ti umili a kastoy ti kasasaadna!” Maisupadi iti dayta, nupay kasta, indir-i ni David: “Naragsak ti tao a ti Diosna isu ni Jehova!”

Aglaplapusanan dagiti Naespirituan a Napapateg a Batbato

Ti kinaragsak pudno a bunga ti naballigi a panagsapul iti kinasirib. Ket dagiti naespirituan a napapateg a batbato a mabalin a masarakan babaen iti panagsukimat iramanna dagiti makapnek a sungbat dagiti salsaludsod iti Biblia. Anian dagiti sungbat a masarakantayo no ituloytayo ti agsukimat! Kas pangarigan, sadino ti nangalaan ni Cain iti asawana? Kinuna Ti Pagwanawanan (Abril 1, 1982): “Ibaga ti Biblia kadatayo a da Adan ken ni Eva adu ti annakda, saan laeng a duddudua [da Cain ken Abel]. ‘Dagiti al-aldaw ni Adan kalpasan ti panangputotna ken ni Set [sabali pay nga anak a lalaki] ket walo gasut a tawen. Kabayatanna pinutotna dagiti annak a lallaki ken annak a babbai.’ (Genesis 5:4) Babaen iti dayta nga impormasion, sadino ti kunaenyo a nangalaan ni Cain iti asawana? Wen, mabalin nga inasawana ti maysa kadagiti kakabsatna a babbai. Itatta mabalin a daytoy ket napeggad iti aniaman nga annak a maipasngay iti kasta a nasinged unay a relasion. Ngem idi asideg pay iti punganay ti natauan a historia, idi ti sangatauan asideg pay iti kinaperpekto, dayta ket saan a parikut.”

Kas pangarigan basbasaentayo ti libro ti Biblia a Proverbio. No paliiwentayo ti naikuna idiay Proverbio 1:7, mabalin nga agsiddaawtayo: ‘Ania “ti panagbuteng ken ni Jehova”?’ Ti panagsukimat mabalin nga iturongnatayo iti Ti Pagwanawanan a Mayo 15, 1987, isu a nagkuna: “Isu dayta ti panagammanga, ti aglaplapusanan a panagraem, ken makaay-ayo a panagamak a mangsair kenkuana agsipud ta apresiarentayo ti naayat a kinamanangngaasi ken kinaimbagna. Ti ‘panagbuteng ken ni Jehova’ kaipapananna ti panangbigbig nga isu ti Kangatuan nga Ukom ken ti Mannakabalin-amin, nga addaan ti kalintegan ken pannakabalin a mangyeg ti dusa wenno ipapatay kadagidiay sumukir kenkuana. Kaipapananna met ti panagserbi ti Dios a simamatalek, nga agkammatalek kenkuana a naan-anay, ken pananggura iti dakes iti imatangna.”

Ituloyyo a Biruken!

Naipablaak Ti Pagwanawanan tapno tulonganna dagiti napasnek nga agsapsapul iti kinasirib a makabiruk iti nasudi a naespirituan a napateg a batbato. Datay amin kasapulantayo ti kinasirib ken pannakaawat iti Sao ti Dios. Kuna ti Proverbio 4:7, 8: “Ti sirib isu ti kangrunaan a banag. Gun-odem ngarud ti sirib; wen kadagiti amin a gungun-odem, gun-odem ti pannakaawat. Itantan-okmo, ket isu ipangatonakanto. Ipannakanto iti kinadayaw intono isu arakupem.”

Babaen laeng ti pananggun-od iti pannakaawat iti Kasuratan ken ti panangusar a siuumiso iti kinasirib a mabalin a mabirukantayo ti pudno a kinaragsak. Wen, ket babaen laeng ti panangsurot iti nadiosan a kinasirib a mabalintayo nga ay-ayuen ni Jehova a Dios. Gapuna awan koma ti palubosantayo a manglapped kadatayo iti panangbiruk iti kinasirib a kas nalmeng a gamgameng.

[Dagiti ladawan iti panid 4, 5]

Ti panangbiruk kadagiti naikali a gamgameng sapulenna ti makabannog a panagkali. Ditay kadi ngarud agtalinaed iti panagbiruktayo iti nadiosan a kinasirib?

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share