Apay nga “Inka ken Koton”?
NI MASIRIB nga Ari Salomon iti nagkauna nga Israel ket nangbalakad iti kastoy: “Inka ken koton.” Apay a naikunana daytoy? Aniat’ maadaltayo kadagiti koton?
Innayon ni Salomon: “Utobem dagiti daldalan [ti koton] ket sumiribka. Isu nga idinto nga awan pangulona, mangaywan man wenno agturay, saganaenna ti kanenna iti kalgaw; agurnong iti taraonna iti panagani.” (Proverbio 6:6-8) Ipalgak dagita a sasao idi ugma dagiti kinapudno a natakkuatan dagiti naturalista itatta.
Kinuna ti managputar iti proverbio a ni Agur a dagiti koton ket “nainkasigudan a masiribda.” (Proverbio 30:24, 25) Siempre, ti kinasiribda ket saan a bunga ti intelihente a panagrasrason no di ket resulta ti nainkasigudan a saririt nga inted ti Namarsua kadakuada. Gapu iti nainkasigudan a saririt, kas pangarigan, agurnong dagiti koton iti taraonda iti umiso a panawen.
Nakaskasdaaw ti pannakaorganisar dagiti koton. Mannakitunos ken maseknanda unay kadagiti padada a trabahador. Tulonganda dagiti nasugatan wenno napaksuyan a kakaduada nga agsubli iti balayda. Nainkasigudan a saganaanda ti masanguanan ken aramidenda ti amin a kabaelanda a mangiringpas iti trabahoda.
Ti kasta a naisigud a kababalin dagiti koton ipasimudaagna a dagiti tao masapul nga agplanoda a nasakbay ken agbalin a nagaget a trabahador. Maiyaplikar daytoy idiay eskuelaan, iti pagtrabahuan, ken kadagiti naespirituan nga aktibidad. No kasano a magunggonaan dagiti koton iti kinaanepda, kasta met a kayat ti Dios a dagiti tao ‘agrag-oda iti kinaimbag iti amin a pagbannoganda.’ (Eclesiastes 3:13, 22; 5:18) Kas kadagiti nagaget a koton, dagiti pudno a Kristiano igaedda ti agtrabaho nga agmalmalem. ‘Aramidenda iti kabaelanda ti aniaman a masarakan ti imada nga aramiden,’ saan a gapu ta agsipsiput ti amoda, no di ket gapu iti kinamapagtalkan ken ti tarigagay nga agbalin a nagaget, naserbi a trabahador.—Eclesiastes 9:10; idiligyo ti Proverbio 6:9-11; kitaenyo met ti Tito 2:9, 10.
Pudno nga agbalintayto a naragsak no ‘intay ken koton’ ket ipakat ti maadaltayo iti dayta. Ken sagrapentayto ti kadakkelan a ragsak no igaedtayo nga aramiden ti pagayatan ni Jehova a Dios, kas naipalgak iti Biblia.