Simmaruno a binalakadan ti masirib nga ari dagiti agtutubo: “Anakko, denggem ti pannursuro toy amam, ket dika bay-an ti linteg ni inam. Ta isudanto ti balangat ti saniata dita ulom, ken kalangkang [“kuentas,” NW] a mayukkor dita tengngedmo.”​—Proverbio 1:8, 9.

Kinapudnona, iti intero a Biblia, ti pamilia ti pangrugian a pangisuruan. (Efeso 6:1-3) No agtulnog dagiti annak kadagiti manamati a dadakkelda, kasda la naadornuan iti makaay-ayo a balangat ti kinaimnas ken kuentas ti dayaw.