PANNAKABAEL NGA AGPANUNOT
Ti Hebreo a termino a mezim·mahʹ ket naaramat a pangawag iti pannakabael nga agpanunot, wenno ti pannakabael a mangusig a sisisirib ken sipapasnek iti maysa a banag, naibatay iti naan-anay a pannakaammo (Pr 5:2; 8:12); dagiti gandat, pamuspusan, ken minamaag a kapanunotan ti nadangkes a tattao (Sal 10:2, 4; 21:11; 37:7; 139:19, 20; Pr 12:2; 24:8; Jer 11:15); wenno dagiti napnuan panggep a “kapanunotan” ni Jehova a Dios wenno ti “pusona” (Job 42:2; Jer 23:20; 30:24; 51:11).
Ti maysa a nakairantaan ti Proverbio ket tapno ti maysa nga agtutubo maipaayan iti pannakaammo ken pannakabael nga agpanunot. (Pr 1:1-4) Ti impormasion a linaon ti Proverbio ket tumulong iti maysa a tao a mangbukel kadagiti makagunggona a kapanunotan ken ideya a makaipaay iti napnuan panggep a panangiturong iti biagna. Ti pannakabael nga agpanunot saluadanna dayta a tao tapno saan a sumurot iti di umiso a dana ken saan a makitimpuyog kadagidiay mangimpluensia kenkuana nga agbalin a dakes, ta tumulong dayta kenkuana a makakita iti pagbanagan ti kasta a tignay. Mangibunga daytoy iti bendision iti dayta a tao. Ti sirib ken pannakabael nga agpanunot saluadanna dayta a tao tapno saan a makinamin iti ar-aramid nga agturong iti didigra ket ngarud agbalin a biag iti kararuana ti sirib ken pannakabael nga agpanunot. Natalged ti riknana, a saan a masapul nga agbuteng nga isu ket kamaten ti hustisia gapu ta amangan no adda nagbasolanna.—Pr 3:21-25.
Nupay kasta, mabalin a guraen met ti dadduma dagidiay pudpudno a mangar-aramat iti pannakabael nga agpanunot. Nalabit daytoy ti kayat a sawen ti Proverbio 14:17: “Ti tao nga addaan kadagiti pannakabael nga agpanunot magurgura.” Masansan a dagiti saan nga agpampanunot a tattao karurodda dagidiay mangar-aramat iti panunotda. Kasta met, no alaen ti prinsipio dayta a teksto, magurgura dagidiay mangar-aramat kadagiti panunotda iti panagaramid iti pagayatan ti Dios. Kas kinuna ni Jesu-Kristo: “Agsipud ta saankayo a paset ti lubong, no di ket pinilikayo manipud iti lubong, gapu iti daytoy guraennakayo ti lubong.” (Jn 15:19) Siempre, mabalin met a karaman ti makadangran a panagpampanunot iti daydiay termino a naaramat iti orihinal a pagsasao maipaay iti “pannakabael nga agpanunot” iti Proverbio 14:17. Gapuna, mabalin met a ti kayat a sawen dayta a teksto ket magurgura ti tao nga aggandat iti dakes, isu a maitunos iti dayta ti mabasa iti sumagmamano a patarus: “Ket ti tao a dakes dagiti gandatna magurgura.”—JP, Ro.