Rumbeng Kadi nga Agbalinkayo nga Aleng-aleng?

NALABIT ipagarup ti kaaduan a tattao a mapadayawanda no maibilangda a kalmado, natanang, ken naanus. Nupay kasta, mabalin nga agtungpal iti kinaaleng-aleng ti kasta a kababalin. Kuna ti Biblia: “Ti kinaaleng-aleng ti maag isunto ti mangdadael kadakuada.” (Proverbio 1:32) Ania ti kayat a sawen dayta?

Dagiti dadduma a patarus ti Biblia impaulogda ti orihinal a Hebreo a sao kadagiti ebkas a kas iti “naliway a nam-ay” (Ti Biblia, PBS Edition), ken “di panangikankano” (Naimbag a Damag Biblia). Iti daytoy nga anag, nainaig ti kinaaleng-aleng iti kinasadut ken kinaliway ket ngarud, iti kinanengneng wenno kinamaag.

Idi umuna a siglo, dagiti Kristiano iti kongregasion sadi Laodicea dida inkankano wenno dida pakaseknan dagiti naespirituan a pagkuranganda. Impannakkelda a ‘saanda a pulos kasapulan ti aniaman a banag.’ Inlinteg ida ni Jesu-Kristo, nga indagadagna a pabaruenda ti regtada kas Kristiano.​—Apocalipsis 3:14-19.

Aleng-aleng met dagiti tattao idi kaaldawan ni Noe. Makumikomda kadagiti gagangay a bambanag iti biag, “a mangmangan ken umin-inumda, mangas-asawa dagiti lallaki ken mayas-asawa dagiti babbai . . . , ket saanda a nangikankano agingga nga immay ti layus ket inyanudna amin ida.” Kalpasanna, innayon ni Jesus: “Kastanto ti kaadda ti Anak ti tao.”​—Mateo 24:37-39.

Ipakita dagiti matungtungpal a padto ti Biblia nga agbibiagtayon iti panawen “ti kaadda ti Anak ti tao,” ni Jesu-Kristo. Pulos a ditay koma agbalin nga aleng-aleng, awanan annad, ken naliway.​—Lucas 21:29-36.