Dagiti Pagimbagan ti Natalna a Puso

NABAYAGEN nga ammo ti moderno a medikal a siensia a ti di makontrol a pungtot adda pagdaksanna iti bagi ti tao. Nasurok a sangagasut a tawenen ti napalabas, kinuna ti The Journal of the American Medical Association (JAMA): “Natay ti maysa a lalaki iti nakaro a pungtot, ket naikuna, nalabit, a nakapuy ti pusona, a dina naanduran ti pakaburiboran ti panunotna. Agparang nga awan mangipapan a maigapu daytoy iti epekto ti agsasagadsad a pungtot, a dagitoy a mismo ti nangpakapuy iti pusona.”

Dagiti sasao iti ngato saanen a pagsiddaawan dagiti estudiante ti Sao ti Dios, ti Biblia. Agarup 29 a siglo sakbay a dinakamat ti JAMA dagiti peggad ti dakes a panagpungtot, napaltiingan ni Ari Solomon a mangisurat: “Ti natalna a puso isu ti biag ti lasag.” (Proverbio 14:30) Kaskasdi a pudno dagitoy a sasao ita.

Babaen ti panangtaginayon iti kalmado a kababalin, mailikliktay iti adu a sakit a masansan a nainaig iti pannakasikor, kas ti ingangato ti presion ti dara, sakit ti ulo, ken parikut iti panaganges. Ngem malaksid pay iti nasaysayaat a salun-at, adda pagimbaganna iti relasiontayo kadagiti sabsabali no ikagumaantayo a ‘sardayan ti pungtot ken lipaten ti gura.’ (Salmo 37:8) Talaga a naguyugoy ken Jesus dagiti tattao gapu iti kinaalumamayna ken naimpusuan a pannakaseknan kadakuada. (Marcos 6:31-34) Umasping iti dayta, agbalintayo a pakabang-aran dagiti sabsabali no patanorentayo ti natalna a puso.​—Mateo 11:28-30.