“Makapungtot unay idi. Siguro, gapu ta nakitana a bassitak, kayatnak a kabilen. Bayat nga agsansanudak, kinunak: ‘Agurayka biit! Agurayka biit! Agurayka biit! Apay a kayatnak a kabilen? Awan ti dakes nga inaramidko kenka. Diak pay ketdi ammo no apay a makapungtotka. Mabalin kadi a pagsaritaanta dayta?’”​—16 anyos a ni David.

Kastoy ti nainsiriban a pammagbaga ti Biblia: “Ti maysa a sungbat, no naalumamay, pagbaw-ingenna ti pungtot, ngem ti sao a makapasakit parnuayenna ti unget.” (Proverbio 15:1) Wen, no sungbatam ti makapungtot iti “sao a makapasakit,” lalo a kumaro ti kasasaad. Nupay kasta, ti naalumamay a sungbat masansan a pagkalmaenna ti kasasaad ken mangpakalma iti narikut a kasasaad.

Lagipem ti nadakamat itay a ni David. Nabaelanna a kinasarita ti naasing ket naammuanna no apay a nakapungtot. Adda gayam nangtakaw iti pangaldaw ti naasing, ket ipappapasna laeng ti sakit ti nakemna iti umuna a nasabatna. “Saan a maisubli ti pangngaldawmo no kabilennak,” inrason ni David. Kalpasanna, insingasingna a mapanda a dua idiay kapeteria. “Yantangay am-ammok ti kahera sadiay,” malagip ni David, “sinukatak ti natakaw a pangngaldawna. Inalamanonak, ket nanipud idi, nainggayyemanen ti panangtratona kaniak.” Makitam kadi no kasano ti bileg ti naalumamay a sasao? Kas kuna ti maysa a proverbio, ti “naalumamay a dila maburakna ti tulang.”​—Proverbio 25:15.