Panangtimbeng iti Trabaho ken Panagaliwaksay

“NAPINTAS a kawes ti panagaliwaksay, ngem di mabalin a dayta la a kanayon ti usarem.” Babaen kadagitoy a sasao, siuumiso nga inladawan ti di nainaganan a mannurat ti pateg ti panagaliwaksay. Nupay kasta, impakitana a matimbeng koma dayta iti nabunga a trabaho.

Dinakamat met daytoy ti napaltiingan a mannurat iti Biblia a ni Solomon. Impatuldo daytoy masirib nga ari ti dua a panaglablabes a nasken a liklikan. Umuna, kinunana: “Ti maag pagakkubenna dagiti im-imana ket ibusenna ti lasagna met laeng.” (Eclesiastes 4:5) Wen, ti kinasadut papanglawenna ti maysa a tao. Kas bungana, mabalin a pagpeggadenna ti salun-at ken uray ti biag ti tao a nasadut. Iti sabali a bangir, adda dagidiay trabaho laeng ti sangsanguenda uray maliwayandan ti amin. Kinuna ni Solomon a ti di agsarday a panagbannogda ket “kinaubbaw ken maysa a panagagawa iti angin.”​—Eclesiastes 4:4.

Adda ngarud naimbag a rason nga insingasing ni Solomon ti kinatimbeng: “Naim-imbag ti maysa a petpet a napno a buyogen ti kinatalna, ngem ti dua a petpet a napno a buyogen ti bannog ken panagagawa iti angin.” (Eclesiastes 4:6) Ti maysa a tao ‘pagrag-oanna koma ti kararuana iti kinaimbag ti nagbannoganna’​—kayatna a sawen, iwayaanna koma a tagiragsaken sagpaminsan ti nagbannoganna. (Eclesiastes 2:24) Ket adda dadduma pay koma a banag iti biag malaksid iti sekular a trabaho. Rumbeng nga ipaayantayo iti panawen ti pamiliatayo. Impaganetget ni Solomon a saan a ti sekular a trabaho ti kangrunaan nga obligasiontayo no di ket ti panagserbi iti Dios. (Eclesiastes 12:13) Maysakay kadi kadagidiay mangtagtagiragsak iti natimbeng a panangmatmat iti trabaho?