Ti Kadi Masanguananyo Ikeddeng ti Gasat?

NO NALISIANYO ti makapapatay nga aksidente, ipagarupyo kadi a kinanunongannakayo ti gasat? Wenno imbes ketdi maragsakankayo gapu ta naiparna laeng nga addakayo iti umiso a lugar iti umno a tiempo?

Ti masirib a tao a ni Salomon kunana: “Nagbaw-ingak ket nakitak iti baba ti init a ti lumba saan nga agpaay kadagiti nasiglat, wenno ti bakal kadagiti napigsa, uray pay ti tinapay iti masirib, uray pay dagiti kinabaknang kadagiti tattao a mannakaawat, uray pay ti parabur kadagiti tattao a nalaing; ngem ti panawen ken di napakpakadaan a pasamak maaramid kadakuada amin.” (Eclesiastes 9:11) Anian a masansan a mapasamak ti di napakpakadaan! Maysa a manamnama iti panangabak nga atleta ket madunor, ket mangabak ti nakapkapsot. Ti maysa a karkarna nga aksidente mangipaay pinansial a pannakarba iti nasingpet a negosiante, a mangipalubos a bumaknang ti nakusit a kakumpitensiana. Ngem impagapu kadi ni Salomon dagitoy a karkarna iti gasat? Saan a pulos. Dagitoy ket epekto laeng ti “panawen ken di napakpakadaan a pasamak.”

Nangaramid ni Jesu-Kristo ti umasping a kapaliiwan. Iti panangibatayna iti maysa a pasamak a nalawag a gagangay laeng a pannakaammo kadagiti managimdengna, insaludsod ni Jesus: “Dagiti sangapulo ket walo a natupakan ti torre sadi Siloe, ket pinatayna ida, pagarupenyo nga ad-addada a nakautang ngem dagiti isuamin a tattao nga agnaed sadi Jerusalem?” (Lucas 13:4) Saan nga impabasol ni Jesus ti pannakatay dagitoy iti nalmeng a gasat wenno iti pagayatan ti Dios, ket dina met pinati a kasla ad-adda a mapabasol dagiti biktima ngem kadagiti sabsabali. Ti nakas-ang nga aksidente ket sabali laeng nga ehemplo ti panagkurri ti panawen ken di napakpakadaan a pasamak.

Awan paset ti Biblia a mangkanunong ti kapanunotan nga inkeddeng ti Dios ti panawen ti ipapataytayo. Pudno a kunaen ti Eclesiastes 3:1, 2: “Maipaay iti tunggal banag adda nakedngan a tiempo, ket maysa a tiempo maipaay iti tunggal panggep iti baba ti langit: panawen ti pannakaiyanak ken panawen ti pannakatay; panawen ti panagmula ken panawen ti panagparut iti naimula.” Ngem isarsarita laeng ni Salomon ti agtultuloy a panagtayyek ti biag ken ipapatay a mangparparigat iti imperpekto a sangatauan. Maiyanaktayo, ket inton umay ti panawen, inton ti gagangay a kaatiddog ti biag ket nadanonen​—kaaduanna kalpasan 70 wenno 80 a tawen​—mataytayo. Nupay kasta, ti eksakto a kanito ti ipapatay ket saan a pulos nga inkeddeng ti Dios a kas met iti di pannakaikeddeng ti maysa a mannalon iti kanito inton “agmula” wenno “agparut iti naimula.”

Kinapudnona, idi agangay impakita ni Salomon a mabalin a matay a nasakbay unay ti maysa a tao, a kunkunana: “Dika agdangkok a napalalo, dika met agmaag. Apay a matayka koma sakbay ti tiempom?” (Eclesiastes 7:17) Aniat’ mamaay daytoy a balakad no ti tiempo ti ipapatay ti maysa ket naikeddengen a din mabaliwan? Ilaksid ngarud ti Biblia ti panamati iti gasat. Dagiti apostata nga Israelitas a nangabrasa iti daytoy a pagano a kapanunotan ket kinondenar unay ida ti Dios. Kunaen ti Isaias 65:11: “Ngem dakayo a nangidian ken Jehova, a nanglipat iti nasantuan a bantayko, a nangisagana iti maysa a lamisaan a maipaay ken Gasat ken mangpunno iti naggampor nga arak ken Signo.”

Anian a kinamaag, ngarud, nga ipagapu dagiti aksidente ken kinadaksanggasat iti gasat wenno, nakarkaro pay, iti Dios a mismo! “Ti Dios isu ti ayat,” kunaen ti Biblia, ket ti panangpabasol nga isut’ gubuayan ti pagtuokan ti sangatauan suppiatenna la unay daytoy a pamunganayan a kinapudno.​—1 Juan 4:8.

Dagiti Panggep ti Dios para iti Masanguanan

Ania ngay, nupay kasta, ti maipapan kadagiti namnamatayo para iti pannakaisalakan? Ti kadi kinapudno nga awan ti di maliklikan a gasat a mangtengtengngel iti biagtayo kaipapanna a rebbeng a busbusentayon ti biagtayo nga awanan panggep? Saan a pulos, ta inkeddeng ti Dios ti masanguanan ti pakabuklan ti sangatauan. Isasao ti Biblia ti pannakaparsua ti “maysa a baro a daga” a “pagtaengan ti kinalinteg.”​—2 Pedro 3:13.

Tapno maibanag daytoy, naan-anay a makibiang ti Dios kadagiti ar-aramid ti tao. Diyo ipagpagarup, mabalin a naikarkararagyon a maaramid daytoy babaen ti panangiyebkas ti kararag nga agkunkuna: “Umay koma ti pagariam. Maaramid koma ti pagayatam, kas idiay langit, kasta met ditoy daga.” (Mateo 6:10) Daytoy a Pagarian ket napaypayso a gobierno a naipasdek kadagiti langlangit. Babaen panangikararag nga umay daytoy, idawdawatyo a dayta a Pagarian ti sumukat iti panangituray iti daga manipud agdama-aldaw a gobgobierno.​—Daniel 2:44.

Pananggun-od ti Bukodyo a Masanguanan

No kasano a dagitoy a dramatiko a pasamak apektaranda ti masanguananyo agpannuray, saan nga iti gasat wenno uray iti panawen ken di napakpakadaan a pasamak, no di ket iti kurso a pilienyo a suroten. Lagipenyo ti didigra iti torre ti Siloam. Inusar ni Jesus dayta a nakas-ang a pasamak tapno isurona ti nauneg a leksion. Dagiti biktima dayta a pannakarsuod ti torre dida nalisian ti nangtupak kadakuada. Iti sabali a bangir, dagiti managimdeng ni Jesus malisianda ti pannakadadael nga ibunga ti nadiosan a di pannakaay-ayo. Pinakdaaran ida ni Jesus: “Ngem no dikayto agbabawi, mapukawkayto amin iti kasta.” (Lucas 13:4, 5) Nalawag unay, mapilida ti bukodda a masanguanan.

Isu met laeng a gundaway ti maiyaw-awat met kadatayo ita​—ti panangaramid iti bukodtayo a pannakaisalakan. (Filipos 2:12) Pagayatan ti Dios nga “isuamin dagiti tattao . . . dumtengda iti pannakaammo ti pudno.” (1 Timoteo 2:4) Ket nupay tunggal maysa kadatayo ket apektado ti natawid ken nalikudan iti sumagmamano a rukod, impaayannatayo ti Dios ti wayawaya nga agpili​—ti kabaelan a mangilasin no kasanot’ kayattayo a panangusar iti biagtayo. (Mateo 7:13, 14) Maaramidtayo ti umiso ken di umiso. Maalatayo ti naparaburan a takder ken Jehova ket magun-odantayo ti biag, wenno mabalintayo ti tumallikud kenkuana ket mataytayo.

Adu ti mangpili nga agbiag a naisina manipud iti Dios. Ipaayda dagiti biagda iti panagsapul kadagiti material a bambanag, ragsak, wenno pannakaidayaw. Ngem impakdaar ni Jesus: “Kitaenyo ket agaluadkayo iti amin nga agum, ta ti biag ti tao saan nga adda iti kaadu dagiti gameng a kupkupikupanna.” (Lucas 12:15) Iti ania, ngarud, ti pagpannurayan ti biagtayo? Idiay 1 Juan 2:15-17, ilawlawag ti Biblia: “Dikay ayaten ti lubong uray dagiti bambanag nga adda ditoy lubong. . . . Ta isuamin nga adda ditoy lubong​—ti derrep ti lasag ken ti derrep dagiti mata ken ti kinapalangguad ti panagbiag​—saanda nga aggapu iti Ama, no di iti lubong. Ket ti lubong aglabas, ken ti dakes a tarigagayna, ngem ti agaramid iti pagayatan ti Dios mataginayon.”

Panangpili iti Biag

Kasanokayo a makasigurado a pudpudno nga ar-aramidenyo ti pagayatan ti Dios? Inyebkas ni Jesus: “Ket daytoy ti biag nga agnanayon, a maammuandaka koma, a maymaysa a pudno a Dios, ken ni Jesu-Kristo, nga imbaonmo.” (Juan 17:3) Ti umiso a pannakaammo manipud Biblia ipaayna ti pakaibatayan ti pammati. “Ngem no awan ti pammati saan a mabalin nga ay-aywen, ta masapul a ti umadani iti Dios patienna koma nga adda ket gunggonaanna dagiti mangsapsapul kenkuana.” (Hebreo 11:6) Ti pannakaammo a masapul a gun-odenyo ket madadaan a maala. Minilion ti natulonganen dagiti Saksi ni Jehova tapno magun-odanda dayta babaen ti regular a panagadal iti Biblia.a

Tapno maay-ayo ti Dios, kasapulanyo ti mangaramid iti adu a panagbalbaliw. Mabalin nga adda dagiti dadduma a dakes nga ugali a rebbeng a maparmek wenno uray pay dagiti imoral nga ar-aramid a rebbeng a maisardeng. Dikay sumuko, a kas ket tay diyo mabalin ti agbalbaliw. Ti kapanunotan a saanen a mabalbaliwan dagiti bambanag ket agtaud pay manipud ulbod a doktrina ti panamati iti gasat. Babaen tulong ni Jehova, mabalin ti uray siasinoman ti ‘agbalbaliw’ ken gumun-od “ti baro a personalidad.” (Roma 12:2; Efeso 4:22-24) Dagiti panagreggetyo a mangay-ayo iti Dios saanto a di madlaw. Isut’ sidadaan a mangbendision kadagidiay mangar-aramid ti pagayatanna.

Pudno, ti panagadal ti Biblia dina risuten amin dagiti parikutyo. Dagiti pudno nga adipen ti Dios ket maipasangoda kadagiti aksidente ken kadagiti narigat a kasasaad, kas met kadagiti sabsabali. Nupay kasta, maipaay ti Dios kadatayo ti sirib tapno malasatantayo ti pakarigatan. (Santiago 1:5) Adda met ti rag-o iti pannakaammo nga addaan ti maysa iti naimbag a pannakirelasion iti Dios. “Naragsak ti siasinoman nga agkammatalek ken Jehova,” kunaen ti Proverbio 16:20.

Idiayto naisublin a Paraiso iti sidong ti Pagarian ti Dios, dinatayto butbutngenen ti panawen ken di napakpakadaan a pasamak. Talaga, ikkatenton ti Dios amin dagiti bambanag a madama a mangdaddadael iti kinaragsak ti tao. “Punasennanto ti amin a lulua kadagiti mata[tayo], ket awanton ni patay, ket awanto metten ti sasaibbek wenno sangsangit wenno rigrigat,” ikari ti Biblia. (Apocalipsis 21:4) Dagiti di mabilang a biktima iti aksidente mapasarandanto ti panagungar.​—Juan 5:28, 29.

Matawidyo kadi daytoy a nagdayag a masanguanan? Idi sumreken dagiti Israelitas iti Naikari a Daga, imbaga kadakuada ni Moises: “Inkabilko iti sangom ti biag ken ti patay, ti bendision ken ti lunod; isu ti gapuna a piliem ti biag tapno agbiagka, sika ken ti putotmo, babaen ti panagayat ken Jehova a Diosmo, ti panagtungpal iti timekna ken ti idedekket kenkuana; ta isu ti biagmo ken ti kaatiddog dagiti al-aldawmo.”​—Deuteronomio 30:19, 20.

Saan, saantayo nga awan gawayna nga adipen iti ima ti awan asina a gasat. Ti masanguanan a kinaragsakyo, ti ngarud agnanayon a masanguananyo, ket adda kadagiti imayo. Gutugotendakayo a pilienyo ti biag.

[Footnote]

[Blurb iti panid 5]

Dagiti apostata nga Israelitas a nangabrasa iti daytoy a pagano a kapanunotan iti gasat ket kinondenar unay ida ti Dios