Nalipatan Kadin ti Pakalaglagipanda?

NAKASARUNGKARKAYO kadin iti daanen a tanem, kas ti adda idiay Tewkesbury, England, ket nadlawyo ti marmarban a nitso a ngangngani marunoten ti nagnagan a naisurat kadakuada? Masansan a dagiti natay a tallo a kaputotanen wenno nasursurok pay, dagiti appo ken dagiti appo ti tumeng, ket nalipatanen. Kinapudnona, kunaen ti Biblia: “Ta dagiti sibibiag ammoda a mataydanto; ngem dagiti natay dida ammo ti aniaman, isuda awananda iti gunggona, ta ti pakalagpagipan kadakuada nalipatanen.” Dayta kadi kaipapananna nga uray ti Dios nalipatannan ida?​—Eclesiastes 9:5.

Impakita ni Jesus a saan a kastoy ti kaipapananna idi kinunana: “Dikay pagsiddaawan daytoy, ta umay ti oras a dagiti amin nga adda kadagiti tanem mangngegdanto ti timekna ket rummuardanto, dagiti nagaramid ti naimbag iti panagungar ti biag, ken dagiti nagaramid ti dakes iti panagungar ti pannakaukom.” Gapuna, dagiti natay agungardanto tapno maaddaan iti gundaway iti biag nga agnanayon iti nadalusanen a paraiso a daga.​—Juan 5:28, 29; Apocalipsis 21:3, 4.

Pudno unay, ni Jehova a Dios, ti Gubuayan ti dinamiko a bileg, a makainagan kadagiti binilbilion a planeta, bitbituen, ken dagiti galakxy, dinto marigatan a manglagip iti personalidad ken wagas ti panagbiag dagiti binilion a tattao a natayen iti intero a historia ti tao. Ngarud, dagiti natay, nupay no nalipatanen dagiti kaputotanda, ket saan a nalipatan ti Dios.​—Isaias 40:26.