RUMSA

[Heb., cha·ghavʹ].

Di masigurado no ania nga insekto ti naawagan iti Hebreo a termino a cha·ghavʹ. Nupay kasta, yantangay ti nakadakkelen, nagpayaken a dudon (Heb., ʼar·behʹ) ket nadakamat a kadua ti cha·ghavʹ iti Levitico 11:22 (kas nadalus a pagtaraon), ti cha·ghavʹ mabalin a tumukoy iti aglagto nga insekto imbes nga iti agtayab.​—Kitaenyo ti Rbi8 ftn.

Ti awag a “rumsa” mayap-aplikar iti aniaman kadagiti adu nga aglagto nga insekto kadagiti pamilia nga Acrididae (a pakairamanan dagiti agakar-akar a dudon ken dagiti rumsa nga addaan ababa a rungo) ken Tettigoniidae (a pakairamanan dagiti rumsa nga addaan atitiddog a rungo).

Malaksid iti pannakailanadna kas insekto a nadalus a pagtaraon ken dagiti pannakatukoy dayta kas manangdadael iti mulmula (2Cr 7:13), ti rumsa agparang met iti Kasuratan kas mangiladladawan. Dagiti di matalek nga Israelita a managsimisim impadamagda a kasla rumsa laeng ti kadakkelda no idilig kadagiti agnanaed iti Canaan. (Nu 13:33) Dagiti tattao, nangnangruna dagidiay bumusbusor iti Dios, kaslada laeng rumsa no iti imatang ni Jehova ken no idilig iti kinanaindaklanna. (Isa 40:22) Iti panangiladawanna kadagiti pakarigatan iti kinalakay, ti manangummong inaramatna ti langa ti maysa a rumsa a mangguy-guyod iti bagina, iti kasta iladladawanna ti lakayen a tao kas kubbon ken nasikkil, a nakaunnat ti imana iti likud.​—Ec 12:5; kitaenyo ti DUDON.