Saludsod Dagiti Agbasbasa

Naikeddeng Kadin ti Masakbayantayo?

Ibaga ti dadduma a naikeddeng a nasaksakbay ti ipapataytayo. Adda met dagiti agkuna a ti Dios ti mangikeddeng no kaanotayo a matay. Malaksid iti dayta, ibilang dagita a tattao nga awan kontroltayo kadagiti mapasamak iti biagtayo. Kasta met kadi ti panangmatmatmo?

Nalabit a maisaludsodmo: ‘No talaga a ditay mabalbaliwan ti pagbanagantayo, ken no ti Dios wenno ti gasat ti mangikeddeng iti pagtungpalan dagiti bambanag, apay ngarud nga agkararagtayo pay laeng? Ken no naikeddeng a nasaksakbay ti pagbanagantayo, apay nga agannadtayo pay laeng? Apay nga agusartayo iti seat belt no agbiahetayo? Malaksid iti dayta, apay a liklikantayo ti agmaneho no nakainumtayo?’

Saan a panuynoyan ti Biblia ti di panangikabilangan iti kinatalged. Imbes nga agpannuray iti gasat, ti Biblia imbilinna kadagiti Israelita a sipapanunotda koma a kanayon iti kinatalged. Kas pagarigan, naibilin a mangaramidda iti bassit a barandilias iti atep ti balayda tapno awan ti aksidente a matnag iti dayta. Apay ngarud nga ibilin dayta ti Dios no gasat ti maysa a tao ti matnag manipud iti atep ken matay?​—Deuteronomio 22:8.

Dagidiay met ngay matay gapu kadagiti natural a didigra wenno trahedia a dida kontrolado? Naikeddeng kadi a nasaksakbay dayta a “pannakitulag ken patay”? Saan. Ibaga kadatayo ti mannurat iti Biblia a ni Ari Solomon a “ti tiempo ken ti di mapakpakadaan a pasamak mapagteng [kadatayo] amin.” (Eclesiastes 9:11) Gapuna, karkarna man wenno nakaro ti napasamak, saan a naikeddeng a nasaksakbay dagiti trahedia.

Ngem iti panangmatmat ti dadduma, saan a maitunos dayta iti kinuna ni Solomon: “Ta iti tunggal banag adda naituding a tiempo, ti mismo a tiempo iti tunggal aramid iti baba ti langlangit: tiempo ti pannakayanak ken tiempo ti ipapatay.” (Eclesiastes 3:1, 2) Ipagpaganetget kadi ni Solomon nga adda gasat? Usigentayo a naimbag dagita a sasaona.

Saan nga ibagbaga ni Solomon a naikeddeng a nasaksakbay ti pannakayanak ken ipapatay. Imbes ketdi, ipagpaganetgetna a kas iti adu a pasamak iti biag, ti pannakayanak ken ipapatay ket gagangay a paset ti biag. Sigurado nga adda dagiti naragsak ken naliday a kapadasantayo. “Adda . . . tiempo ti panagsangit ken tiempo ti panagkatawa,” kuna ni Solomon. Ipakitana a dagita a maulit-ulit a pasamak ken di mapakpakadaan a kalamidad ket gagangay a pasamak iti biag, iti “tunggal aramid iti baba ti langlangit.” (Eclesiastes 3:1-8; 9:11, 12) Isu nga ingngudona a saantay koma a makumikom kadagiti inaldaw nga aktibidad nga uray la malipatantayon ti Namarsua kadatayo.​—Eclesiastes 12:1, 13.

Nupay naan-anay nga ammo ti Namarsua no ania ti mapasamak iti amin a banag, awan ti inkeddengna a gasat ti tunggal maysa. Isuro ti Biblia a ti Dios ituktukonna iti amin ti namnama a biag nga agnanayon. Ngem dinatay piliten a mangawat iti dayta. Imbes ketdi, kuna ti Saona: “Ti asinoman a mayat awatenna koma ti danum ti biag nga awan bayadna.”​—Apocalipsis 22:17.

Wen, datayo ti nasken nga agtarigagay a ‘mangawat iti danum ti biag.’ Ngarud awan ti makuna a gasat. Imbes ketdi, dagiti bukodtayo a desision, kababalin, ken tigtignay ti mangapektar iti masanguanantayo.