“Agbarusbos Bayat ti Kinaubanan”

KADAGITI pagilian iti aglawlaw ti Baybay Mediteraneo, adu ti agmulmula iti palma a datiles kadagiti paraanganda. Agdinamag dagita a kayo gapu iti kinapintasda ken iti kinaimas ti bungada. Kanayonanna, nabarusbos wenno nabungada latta uray no agbibiagdan iti ginasgasut a tawen.

Sigun iti daniw ni Solomon nga ari iti nagkauna nga Israel, ti taktakder ti balasang a Sulamita ket kaasping ti kayo a palma. (Kanta ni Solomon 7:7) Kuna ti libro a Plants of the Bible: “Ti Hebreo a sao para iti palma a datiles ket ‘tàmâr.’. . . Para kadagiti Judio, simbolo dayta ti kinaimnas ken kinalibnos a masansan a pangtukoyda kadagiti babbai.” Kas pagarigan, agnagan iti Tamar ti kabsat ni Solomon iti ama. (2 Samuel 13:1) Ita, dadduma a nagannak ti mangipampanagan pay laeng iti Tamar kadagiti annakda a babbai.

Saan la a dagiti napintas a babbai ti maipadis iti kayo a palma. Inkanta ti salmista: “Ti met laeng nalinteg rumangpayanto kas iti panagrangpaya ti maysa a kayo a palma; kas iti idadakkel ti maysa a sedro iti Libano, isu dumakkelto. Dagidiay a naimula iti balay ni Jehova, kadagiti paraangan ti Diostayo, rumangpayadanto. Agtultuloydanto pay nga agbarusbos bayat ti kinaubanan, agtultuloydanto a nalukmeg ken nasalibukag.”​—Salmo 92:12-14.

Dagiti lallakay ken babbaket a simamatalek nga agserserbi iti Dios adu met ti pakaipadaanda iti narangpaya a kayo a palma. “Ti kinaubanan ket korona ti kinapintas no masarakan dayta iti dalan ti kinalinteg,” kuna ti Biblia. (Proverbio 16:31) Nupay nakapsutdan gapu iti kinalakay ken kinabaketda, nabileg latta ti espiritualidadda gapu iti regular a panagadalda iti Biblia a Sao ti Dios. (Salmo 1:1-3; Jeremias 17:7, 8) Gapu iti makaay-ayo a sasao ken nagsayaat nga ulidanda, naisangsangayanda a gubuayan ti pammaregta iti sabsabali. Kayariganda ti palma a datiles a nabarusbos ken nabunga latta iti panaglabas dagiti tawen.​—Tito 2:2-5; Hebreo 13:15, 16.