SARON

1. Ti tanap iti baybay iti nagbaetan ti Tanap ti Dor (abagatan ti Carmelo) ken ti Tanap ti Filistia. Manipud iti makin-amianan a beddengna nga isu ti Karayan Buaya (Nahr ez-Zerqa), agsaknap ti Saron nga agpaabagatan iti agarup 60 km (40 mi) iti Joppe ket nagduduma ti kaakabana nga agarup 16-19 km (10-12 mi). Dadakkel a binunton a kadaratan ti masarakan iti igid ti baybay. Idi un-unana, napateg unay daytoy a lugar maipaay iti militaria ken komersio agsipud ta ditoy a lumasat ti nadumaduma a kalsada.

Nalatak ti Saron gapu iti kinadam-egna (idiligyo ti Isa 35:2), yantangay nasayaat ti pannakapadanum dayta a rehion a pagay-ayusan ti sumagmamano a waig. Nagar-arab sadiay dagiti arban ken pangen ti an-animal. (1Cr 27:29; idiligyo ti Isa 65:10.) Adda idi tiempo a dagiti dadakkel a kabakiran ti roble ti nangsaknap iti makin-amianan a paset ti Saron, idinto ta nalabit ad-adda a natalon ti makin-abagatan a pasetna, kas iti agdama. Agparang a langalang ti adu a paset ti rehion bayat ti iraraut dagiti Asirio idi maikawalo a siglo K.K.P.​—Isa 33:9.

Iti Kanta ni Solomon, nailadawan ti Sulamita a mangdesdeskribir iti bagina kas maysa “laeng a safron ti tanap iti igid ti baybay,” nabatad a kaipapananna ti ordinario laeng a sabong iti tengnga ti nakaad-adu nga agtubtubo idiay Saron.​—Sol 2:1.

2. Sigun iti 1 Cronicas 5:16, ti tribu ni Gad ket nagnaed idiay “Galaad, idiay Basan ken kadagiti agpampannuray nga ilina ken kadagiti amin a pagpaaraban ti Saron.” Pagarupen ti dadduma nga eskolar a kaipapanan daytoy nga impaarab dagiti Gadita dagiti arbanda iti tantanap ti Saron iti igid ti baybay. Nupay kasta, naikkan ti Gad iti teritoria iti daya ti Jordan, ket ti Galaad ken Basan agpada nga addada iti dayta a deppaar. Gapuna, ipapan ti adu a tattao nga adda met rehion a naawagan Saron iti uneg ti teritoria ti Gad.