BAT-RABBIM

[Anak a Babai ti Adu].

Iti Kanta ni Solomon, dagiti mata ti balasang a Sulamita ket nayarig “kadagiti ban-aw idiay Hesbon, iti sibay ti ruangan ti Bat-rabbim.” (Sol 7:4) Ti Hesbon ket maysa a siudad iti teritoria ti Gad ngem naituding kadagiti Levita. (Jos 21:38, 39) Nupay patien ti dadduma a ti nagan a Bat-rabbim ket nagan ti maysa a ruangan ti Hesbon a nakasango iti siudad ti Rabba (agdama nga ʽAmman) iti amianan a daya, kunaen ti dadduma a ti Bat-rabbim (kaipapananna ti “Anak a Babai ti Adu”) ket piguratibo ti pannakaaramatna a tumukoy iti mismo nga aduan umili a siudad ti Hesbon ket kasta ti nayawag iti dayta a ruangan agsipud ta adu a tattao ti sumrek ken rummuar iti siudad wenno aguummong iti ruangan. Kadagiti agdama a rebba ti siudad, makita pay laeng dagiti pammaneknek nga adda idi dagiti kadaanan a ban-aw kasta met ti dakkel a pagurnongan iti danum. Maikanatad nga iladawan iti nadaniw a panangdeskribir ti nasin-aw, natalinaay a kinapintas a kas iti makita iti rumimatrimat a matmata ti Sulamita, a nalabit ti ruangan ti siudad irepresentarna ti muging.