Asidegen ti Lubong nga Awanan Gubat

KITAENYO manen ti padto ti Biblia idiay Isaias a kunana: “Pandayendanto dagiti kampilanda a pagbalinen a dingding ti arado, ken dagiti pikada a pagbalinen a komkompay: ti nasion saannanto nga itag-ay ti kampilanna a maibusor iti nasion, didanto met adalenen ti pannakigubat uray kaano.” Anagenyo manipud iti konteksto nga “adu a tattao” a magmagna iti dandaná ti Dios dagidiay mangpanday kadagiti kampilanda a pagbalinen a dingding ti arado. (Isaias 2:2-4, King James Version) Kaipapananna nga agdaydayaw dagitoy a tattao ken ni Jehova a Dios ken tungtungpalenda dagiti lintegna. Asinoda?

Masapul a tattaoda manipud iti amin a nasion a saan laeng a nangilaksid kadagiti igam a pakigubat no di pay ket naan-anay nga inwaksidan iti panunot ken pusoda dagiti kababalin ken disposision a mangituggod iti ringgor ken panaglalaban. (Roma 12:2) Imbes a patayenda ti kaarrubada, ayatenda ida. (Mateo 22:36-39) Nadamagyo kadin dagiti kasta a tattao?

Nalabit nadamagyon a tagtagiragsaken dagiti Saksi ni Jehova ti sangalubongan a panagkakabsat ket insardengdan nga itag-ay ti igam a pangpatay iti sabsabali. Panunotenyo dayta: No kastat’ kapanunotan ti amin a tao ditoy daga, saan kadi a daytoy a planeta ti lugarton ti talna ken kinatalged?

Siempre, saan nga amin ti addaan iti kasta a kapanunotan. Kas iti insurat ni Ari Solomon agarup 3,000 a tawenen ti napalabas: “Nagbaw-ingak ket nakitak amin a pammarigat a maaramid iti baba ti init, ket, adtoy! dagiti lulua dagiti naparigat, ngem awananda iti mangliwliwa; ket iti biang dagiti mangparparigat kadakuada adda idi pannakabalin.”​—Eclesiastes 4:1.

Awis Kadagiti Managayat iti Talna

Addanto kadi lubong nga awanan gubat? Wen. Agtaudto kadi dayta babaen ti panagregget dagiti tattao? Saan. Dumtengto aya dayta babaen ti ragup a pannakakomberte dagiti tattao iti pudno a relihion? Saan. Sumungbat ti libro ti Biblia a Salmo: “Umaykayo, dakayo a tattao, imatanganyo dagiti aramid ni Jehova . . . Pasardengenna dagiti gubat inggana iti ungto ti daga.”​—Salmo 46:8, 9.

Kasanonto nga aramiden ni Jehova a Dios dayta? Sumungbat ti libro a Proverbio: “Ti nalinteg agtalinaedto ditoy daga, ket ti napnuan-imbag agtaengto kenkuana. Ngem dagiti nadangkes [dagidiay mangilaksid iti linlinteg ti Dios], magudasdanto ditoy daga; ket dagiti nagulib, maparutdanto kenkuana.”​—Proverbio 2:21, 22.

Adtoy ti kangrunaan a rason no apay a saan a nagtignay ti Dios sakbay ita: Ik-ikkanna dagiti tattao iti gundaway a makasursuro maipapan iti daldalanna tapno makapagnada iti dandanána. Insurat ni apostol Pedro: “Saan a nabannayat ni Jehova maipapan iti karina, kas iti panangibilang dagiti dadduma a tattao a kinabannayat, no di ket an-anusannakayo agsipud ta saanna a tarigagayan a madadael ti asinoman no di ket tarigagayanna a makagteng dagiti isuamin iti panagbabawi.” (2 Pedro 3:9) Gapuna, sipaparabur a tultulongan ti ili ti Dios dagiti sabsabali a makasursuro maipapan ken ni Jehova. Kas inyebkas ni Isaias, iyaw-awisda: “Umaykayo, dakayo a tattao, ket sumang-attayo iti bantay ni Jehova, . . . ket isu isuronatayo kadagiti dalanna.”​—Isaias 2:3.

“Kadagiti Maudi a Paset Dagiti Aldaw”

Impadto met ti teksto iti Isaias a mapasamak “kadagiti maudi a paset dagiti aldaw” ti pannakaisuro dagiti tattao iti daldalan ti talna. (Isaias 2:2) Agbibiagtay itan iti dayta a tiempo. Nakalkaldaang ngem ipamatmat dagiti gubat ita a siglo nga addatayon iti dayta a tiempo.

Idi dinamag dagiti adalan ni Jesus kenkuana no ania ti mangtanda iti panungpalan ti sistema dagiti bambanag, impadtona nga addanto “dagiti dadakkel a ginggined, ket iti nadumaduma a disso, dagiti angol ken dagiti kinakirang ti taraon.” (Lucas 21:11; Mateo 24:3) Kinunana pay: “‘No makangngegkayo kadagiti gubat ken kadagiti riribuk, dikay mapabutngan. Ta dagitoy a bambanag masapul a mapasamakda nga umuna, ngem saan pay a mapasamak a dagus ti panungpalan.’ Idin intultuloyna a kunaen kadakuada: ‘Ti nasion tumakderto a bumusor iti nasion, ken ti pagarian a bumusor iti pagarian.’”​—Lucas 21:9, 10.

Nupay addan gubgubat iti rinibu a tawen, nasaksian daytoy laeng a siglo ti dua a gubat sangalubongan ket, sigun iti dadduma a pattapatta, literal a ginasut a babbabassit a gubat. Nakaam-amák ti kinapudno a pinullo a milion a tattao ti nagudasen kadagiti gubat iti daytoy a siglo. Sigun iti magasin a World Watch, kabayatan ti 2,000 a tawen sakbay ti maika-20 a siglo, 50 a tawen ti promedio a tiempo ti gubat a nakatayan ti sangamilion a tattao. Kabayatan daytoy a siglo, maysa la a tawen ti kapaut ti promedio a tiempo ti gubat a nakatayan ti sangamilion a tattao.

Lubong Nga Awanan Gubat

Ipakita dagiti terible a gubat iti daytoy a siglotayo, agraman ti adu a sabsabali pay a pasamak a naipakpakauna iti padto ti Biblia, nga addatayon iti wangawangan ti baro a lubong nga aramidento ti Dios. Mapukawto ti daan a nakirokiro a lubong a sukatánto ti “baro a daga,” a pagtalinaedanto ti talna ken kinalinteg. (2 Pedro 3:13) Kuna ti Sao ti Dios: “Dagiti agaramid iti dakes magessatdanto, ngem dagidiay a manginanama ken Jehova tawidendanto ti daga. Ngem dagiti naemma tawidendanto ti daga, ken maay-ayatandanto iti kinaruay ti talna.”​—Salmo 37:9, 11.

Iti intero a daga ita, il-iliwen ti di mabilang a minilion ti lubong nga awanan gubat. Iti panangipakitana a sigurado a tungpalen ti Dios ti karina a mangparsua iti kasta a lubong, nabayagen nga insurat ti maysa a mammadto ti Dios: “Ti sirmata agpaay pay laeng iti nadutokan a panawen, ket agsiglat a tumurong iti pannakatungpal, ket saanto nga agulbod. Nupay agtaktak, isu urayem; ta pudno nga umayto. Dinto agbayag.”​—Habacuc 2:3.

Nainsiriban ngarud nga agtalekkayo iti Dios ket tagiragsakenyo ti pannakatungpal ti karina: “Ti Dios a mismo addanto [iti ilina]. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”​—Apocalipsis 21:3, 4.

[Kahon/Dagiti ladawan iti panid 9, 10]

No Ania ti Ikarkari ti Biblia iti Dayta a Baro a Lubong:

Awan Krimen, Kinaranggas, Wenno Kinadakes

“Pasardengen [ti Dios] dagiti gubat inggana iti ungto ti daga.”​—Salmo 46:9.

“Dagiti agaramid iti dakes magessatdanto . . . Ket bassit pay a darikmat, ket ti nadangkes awanton.”​—Salmo 37:9, 10.

Natalna Amin a Sangatauan

“Nayanak ti maysa nga ubing kadatayo, maysa nga anak a lalaki ti naited kadatayo; ket ti panangiturayna maiparabawto iti abagana. Ket ti naganna magaladanto iti . . . Prinsipe ti Kappia. Ti idadakkel ti panangiturayna ken ti kappia awanto ti inggana.”​—Isaias 9:6, 7.

Paraiso Amin a Daga

Kinuna ni Jesus: “Makikaduakanto kaniak idiay Paraiso.”​—Lucas 23:43.

“Dagiti nalinteg a mismo tagikuaendanto ti daga, ket agtaengdanto nga agnanayon iti dayta.”​—Salmo 37:29.

Naayat a Sangalubongan a Panagkakabsat

“Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”​—Aramid 10:34, 35.

Mapagungar Dagiti Inay-ayat a Natay

“Um-umayen ti oras nga amin dagidiay adda kadagiti pakalaglagipan a tanem mangngegdanto ti timek [ni Jesus] ket rummuardanto.”​—Juan 5:28, 29.

Awanen ti Sakit, Panaglakay, Wenno Ipapatay

“Punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”​—Apocalipsis 21:4.