ARIEL

[Pagpuoran ti Altar ti Dios; wenno, Leon ti Dios].

1. Maysa a Moabita a ti dua nga annakna pinatay ni Benaias.​—2Sm 23:20; 1Cr 11:22.

2. Maysa kadagiti siam a pannakaulo a nangnangruna nga inusar ni Esdras iti pannakaala dagiti kualipikado a ‘ministro maipaay iti balay ti Dios.’ Napasamak daytoy idi primavera ti 468 K.K.P. idi a ti agarup 1,500 a lallaki nga Israelita nga indauluan ni Esdras agrubrubbuatdan a pumanaw iti karayan Ahava nga agturong idiay Jerusalem.​—Esd 8:15-17, 31.

3. Nagan nga addaan nalmeng a kaipapanan, nayaplikar iti Jerusalem iti Isaias 29:1, 2, 7. Adda altar ti sakripisio iti paraangan ti templo ti Dios a nagsaad idi idiay Jerusalem. Gapu itoy, arigna a daytoy a siudad isu ti pagpuoran ti altar ti Dios. Daytoy koma met ti sentro ti nasin-aw a panagdaydayaw ken Jehova. Nupay kasta, ti mensahe iti Isaias 29:1-4 aglaon iti nakaam-amak a pagtungpalan ken ipadtona ti pannakadadael a naikeddeng a dumteng iti Jerusalem babaen ti im-ima dagiti taga Babilonia iti tawen 607 K.K.P., inton ti Jerusalem agbalin a “pagpuoran ti altar” iti sabali nga anag: kas maysa a siudad a pagayusan ti naiparukpok a dara ken siudad nga inibus ti apuy ken napno iti bagi dagiti biktima iti umap-apuy a pannakadadael. Dagiti kangrunaan a makagapu iti daytoy a didigra ket nadakamat iti bersikulo 9 agingga iti 16. Nupay kasta, ipakita ti Isaias 29:7, 8 a dagiti nasion a mangar-aramid iti kasta a panangdadael iti Jerusalem saanda nga agballigi iti kangrunaan a panggep wenno kalatda.