Inton dagiti Kasapulan Mapneken
ADU a tawenen ti napalabas naipadto: “Maluktanto dagiti mata ti bulsek, ket dagiti lapayag ti tuleng maluktandanto.”
‘Ngem imposible dayta,’ mabalin a kunayo. No kastat’ pagarupyo, nalabit masdaawkayo a makaammo nga adu a maika-20-siglo a biotechnicians saandan a matmatan dayta nga imposible. Apay?
Makakitan dagiti Bulsek?
No mapagsaludsodankayo no ania nga organo ti pangkitayo kadagiti bambanag, mabalin a sumungbatkayo: ‘Babaen kadagiti matak.’ Ti biotechnician, nupay kasta, ket sumungbat: ‘Babaen iti utekko.’ Ket isut’ ad-adda nga umiso. Ta nupay no ti mata ti organo ti sentido a mangawat iti lawag ket mangpataud kadagiti elektrikal a tignay, ti makinlikud a paset ti utektayo ti mangipaay iti panagkita.
Ti pagiwarnak a Pranses a Science et Vie nabiit pay a sinumariona ti panagsirarak a naaramid a tumulong kadagiti bulsek a makakita iti artipisial a pamay-an. Naimula iti tengnga ti panagkita ti utek, dagiti babassit nga electrodes a naikonektar iti video camera makaipatulodda kadagiti signal manipud iti kamera a direkta iti utek. Mapataud iti pannakakita iti lawag, kas ti “panagpingki a makitatayo” no maitugtog ti ulotayo. Babaen ti umiso a pannakaikonektar, ti utek basaenna dagiti rimat dagiti lawag a kas ti panangbasatayo kadagiti pagilasinan a buklen dagiti adu a sinaggaysa a lawag ti bombilia. Nupay no matulongan dagiti nabulsek a makakita, dagiti tattao a nadadael ti sentro ti panagkitada iti utek ket saandanto a magunggonaan itoy a pamay-an.
Pannakangngeg Para kadagiti Tuleng
“Para iti lapayag, nalabit ti parikut basbassit ngem ti mata,” kuna ni Dr. Jean-Michel Bader. Naaramiden dagiti nagsayaatan nga addang iti pannakaaramid dagiti pannakaimula ti cochlea tapno maisubli bassit a pannakangngeg dagiti dadduma a nadadael ti panagdengngegda. Ngem dagidiay ngay ti kinatulengna ket gapu iti parikut iti pannakabalbaliw dagiti allon ti timek a pagbalinen nga elektrikal a tignay a maiyallatiw iti utek?
Tapno magunggonaan dagita, maparparang-ayen ti elektroniko a makin-uneg a lapayag. Babaen iti maysa nga alikamen nga addaan iti maibulbulsa a mikropono a mangbalbaliw iti dayta a pagbalinen nga elektrikal a tigtignay, dagiti signal ti maipadalan iti barot a maiturong iti bassit a transmitter a naikabil iti kudil iti asideg ti lapayag. Maysa a bassit a receiver a nailumlum iti kudil ken naikabit a direkta iti nerbio a pagdengngeg ti mangiyallatiw iti impormasion a mapan iti utek, a labsanna ti gagangay a dalanna.
Ti Pannakasapul iti Ad-adda a Mapagtalkan a Tulong
Nupay no adda dagiti panginanamaan a kasla itukon ti kasta a panagsirarak, pudno a mabigbig dagiti sientista a ti panangikagumaan a mangagas kadagiti depekto iti bagi masansan a di agballigi gapu ta kurang ti pannakaawat ti siensia kadagiti kinarikut ti panagandar dagiti pisikal nga organotayo. Kas banagna, ti salisal isu ti panangibangon iti ad-adda a kompleto a pannakaammo iti pamay-an ti panagandar iti bagi.
Nupay adu ti mangisaad iti namnamada iti siensia maipaay iti pannakaisubli ti panagkita ti bulsek ken ti pannakangngeg iti tuleng, adda ad-adda pay a mapagtalkan a pangibatayan iti namnama. Daytat’ kari ti Namarsua iti sentido ti tao, ni Jehova a Dios. Isut’ nabayagen a nangipaltiing ti padto: “Iti kasta maluktanton dagiti mata ti bulsek, ken dagiti lapayag ti tuleng maluktandanto.” (Isaias 35:5) Ngem kasano a masiguradotayo a pumudnonto dagidiay a sasao? Ania “dayta tiempo” a naikari a pakapasamakannanto?
Panirpatan iti Masanguanan
No napasamaken ti maysa a banag idi napalabas, di kadi mangted daytat’ panagtalek kadakayo a daytat’ mapasamakto manen, nangnangruna no daydiay mangaramid iti dayta imbagana a mapasamakto? Bueno, idi immuna a siglo iti Kadawyan a Panawentayo, insubli ni Jesu-Kristo ti sentido kadagidiay nakapukaw kadakuada, kas iti kinunana naminsan: “Dagiti bulsek makakitada, dagiti pilay magnada, dagiti agkukutel nadalusanda ket dagiti tuleng makangngegda.” (Lucas 7:22) Dagitoy a panangagas saanda a nagpannuray iti moderno a teknolohia.
Naminsan inagasan pay ni Jesus ti maysa a lalaki a naipasngay a bulsek. Adu a kaarruba ken kaam-ammona ti nangbigbig iti milagro. Kinuna ti lalaki a naisubli ti panagkitana: “Nanipud idi panangrugi ti lubong awan pay nangngegan a nanglukat kadagiti mata ti maysa a tao a nayanak a bulsek. No daytoy a tao saan koma a naggapu iti Dios, awan koma ti mabalinna nga inaramid.” Wen, insubli ni Jesus ti panagkita ti tao babaen ti pannakabalin ti Dios!—Juan 9:32, 33.
Ania ti paneknekan daytoy? Ta, babaen ti pannakabalin ti Dios, amin nga agsagaba iti nadadael a sentido mabalin a maagasan! Gapuna, inaramid ni Jesu-Kristo dagitoy a milagro a mangipakita iti bassit a pamay-an no anianto ti mapasamak iti intero a daga iti sidong ti turay ti Pagarian ti Dios. Isu “iti daytanto a tiempo,” bayat ti panagturay ti Pagarian ti Dios, nga addanto ti naindaklan a literal a kaitungpalan ti padto ti Biblia: “Dagiti bulsek makakitada, ket dagiti tuleng makangngegda.”—Isaias 35:5.
Ti pannakaammo iti kari ti Dios iti masanguanan agraman ti kaadda iti personal a pannakirelasion kenkuana ti mamagbalin iti addaan lapped a tao a ti lappedna ket saanto a mangringbaw kenkuana. Daytat’ mangipaay iti naragragsak, naan-anay a panagbiagna itan. Kinapudnona, anian a nagsayaat no dagidiay a nadadael idi ti sentidoda agrag-odanto ken agragsak ken maawanton dagiti isuamin a panagladingit ken panagsaibbek!—Isaias 35:10.
[Ladawan iti panid 10]
Anian a nagsayaat no dagidiay a nadadael idi ti sentidoda agrag-odanto ken agragsak!