‘Agtalinaed nga Awan Tulawna, Awan Pakapilawanna, ken Sitatalna’
“Agawaanyo tapno masarakankay koma iti sanguananna nga awan ti tulawna ken awan ti pakapilawanna ken sitatalna.”—2 PEDRO 3:14.
1, 2. Ania ti kinasanto?
NI JEHOVA A DIOS nasantuan. Ti Anakna, ni Jesu-Kristo, buyogen iti kararag ti nangawag kenkuana kas “Ama a Nasantuan.” (Juan 17:1, 11) Ken dagiti espiritu a parparsua idiay langit nadeskribirda a kunkunada: “Santo, santo, santo ni Jehova dagiti buybuyot.” (Isaias 6:3) Ngem ania ti kinasanto?
2 Dagiti termino a “santo” ken “kinasanto” naipatarusda manipud sasao a Hebreo a posible nga addaan iti nangnangruna a kaipapanan a “ti panagbalin a nalawag,” “ti panagbalin a baro wenno sadiwa, awan mantsana wenno nadalus” iti pisikal. Kadagiti Kasuratan, nupay kasta, dagitoy a sasao ti maus-usar nangnangruna iti moral wenno naespirituan a pannakaawat. Ti orihinal a Hebreo ipaawatna met ti kapanunotan ti pannakaisina, naipamaysa, wenno pannakasantipikar ti nasantuan a Dios a ni Jehova. Iti met Kristiano a Griego a Kasuratan, dagiti sasao a naipaulog a “santo” ken “kinasanto” ipamatmatna ti pannakaisina nga agpaay iti Dios. Maus-usarda met a mangtukoy iti kinasanto kas maysa a kualidad ni Jehova, agraman ti kinadalus wenno kinanaan-anay ti personal a kababalin ti maysa a tao. Gapuna ti kinasanto kaipapananna ti kinadalus, kinaawan tulawna, ken kinasagrado.
Ti Kinasanto Maikalikagum iti Ili ni Jehova
3. Apay a ni Jehova maikari iti nadalus a panagdayaw?
3 Ania, ngarud, ti kaipapanan ti nailangitan a panangiwaragawag: “Santo, santo, santo ni Jehova a Dios, ti Mannakabalin-amin”? (Apocalipsis 4:8) Daytoy ti mangipapaay iti Dios ti kinasanto, kinadalus iti superlatibo a kasasaad! Gapuna, ni Jehova, “ti Kasasantuan,” maikari iti nadalus a panagdayaw. (Proverbio 9:10) Gapuna, binilin ni Jehova a Dios ni mammadto a Moises a mangibaga kadagiti Israelitas: “Dakayo agsantokayto, gapu ta siak ni Jehova a Diosyo santoak.”—Levitiko 19:1, 2.
4. Kasano laeng a posible ti panagdaydayaw a makaay-ayo ken ni Jehova?
4 Asinoman nga agkunkuna a mangipapaay iti makaay-ayo a serbisio ken ni Jehova bayat nga agar-aramid met ti kinarugit ti makarimon iti imatangna, ta babaen laeng iti nadiosan a kinasirib ken iti kinasanto a posible ti panangdayaw kenkuana iti makaay-ayo a pamay-an. (Proverbio 20:25; 21:27) Gapuna, idi impadto ti Dios a dalusannanto ti dalan a maipaay iti nakayawan nga ilina nga agsubli idiay Jerusalem manipud Babilonia, kunana: “Ket managananto Ti Dalan ti Kinasanto. Ti saan a nadalus saanto a magna kenkuana.” (Isaias 35:8) Ti natda a nagsubli idi 537 K.K.P. inaramidda dayta a buyogen dagiti nasantuan a motibo, tapno maisubli ti pudno a panagdayaw “ti Kasasantuan.” Ket dagiti Israelitas mapaneknekandanto ti kinasantoda babaen ti panagtulnogda iti Dios. Ngem napaayda a nagtalinaed a nasantuan, awan tulawna manipud iti panangmatmatna.—Idiligyo iti Santiago 1:27.
5. Kasano nga impakita ni Pablo a dagiti naespirituan nga Israelita masapul nga agdayawda iti Dios iti kinasanto?
5 Dagiti naespirituan nga Israelitas, wenno dagiti napulotan a Kristiano, masapul nga agdayawda met ken Jehova iti kinasanto. (Galacia 6:16) Iti daytoy a banag, indawat ni apostol Pablo kadagiti kapammatianna nga ‘ipaayda dagiti bagbagida kas daton a sibibiag, nasantuan, makaay-ayo iti Dios.’ Tapno maaramidanda daytoy, dagitoy a manamati siguruenda koma nga ar-aramidenda ti nadiosan a pagayatan, ta innayon ni Pablo: “Ket dikay umabuloy iti daytoy a sistema dagiti bambanag, no di ket agbalbaliwkayo gapu iti pannakapabaro ti isipyo, tapno mapaneknekanyo no ania ti nasayaat ken makaay-ayo ken naan-anay a pagayatan ti Dios.”—Roma 12:1, 2.
6. Maibusor iti ania ti masapul a pagannadan dagiti amin a Kristiano?
6 Iti daytoy a panawen ti panagrang-ay, nagadu dagiti kabbaro nga umar-arak iti organisasion ni Jehova. Uray isuda met, agdayawda ken ni Jehova iti kinasanto. Anian ti panagragsakda iti namnama a pannakalasat iti “dakkel a rigat” ken panangtagiragsakdanto ti biag nga awan inggana iti paraiso a daga idiay nalinteg a baro a sistema ti Dios! (Mateo 24:21; Lucas 23:43) Ngem tapno dagidiay addaan iti nailangitan a namnama ken ti “dakkel a bunggoy” nga addaan kadagiti naindagaan a panginanamaan tagiragsakenda ti awan inggana a biag, masapul nga agannadda a maibusor kadagiti makatulaw nga ug-ugali wenno iti aniaman a maikontra kadagiti Nainkasuratan a moral ken pannursuro.—Apocalipsis 7:9, 14.
7. Ania ti kuna ni Pedro a mangitampok iti pannakasapul nga agbalin a mapagulidanan “kadagiti amin a kita ti nasantuan a panagbiag”?
7 Iti panangitudona iti panawentayo, insurat ni apostol Pedro: “Ngem ti aldaw ni Jehova umayto a kasla mannanakaw, aldaw a dagiti langlangit [nailubongan a gobierno] aglabasdanto a buyogen ti dakkel a daranudor, ket dagiti el-elemento [dagiti nailubongan a kababalin ken aw-awid] mawarawaradanto babaen ti sumsumged a pudot, ti met daga [ti natauan a sosiedad a naisina iti Dios] ken dagiti ar-aramid nga adda kenkuana mauramdanto” ta mauramdanto kas “kadagiti langlangit” ken “kadagiti el-elemento” iti makadadael nga “apuy” iti aldaw ni Jehova. Gapuna innayon ni Pedro: “Idinto a kasta a dagitoy a bambanag isuda amin marunawdanto iti kastoy, ania a kita dagiti tattao ti pagbalinanyo koma, iti amin a kita ti nasantuan a panagbiag ken ar-aramid ti nadiosan a debosion, nga ur-urayenyo ken tarigagayanyo ti iyaay daydiay aldaw ni Jehova, a dagiti langlangit idinto a sumsumgedda maburakburakdanto ket dagiti el-elemento matunawdanto iti sumsumged a pudot!” Wen, amin dagiti Saksi ni Jehova rebbeng a mapagulidananda koma “iti amin a kita ti nasantuan a panagbiag.” Ken dagidiay mangtagtaginayon iti kinasanto mabalindanto ti kumita iti masanguanan nga agturong iti maysa a natalged a lugar iti uneg ti nalinteg a ‘baro a langlangit ken baro a daga’ ti Dios. (2 Pedro 3:7, 10-13) Anian a nagragsak a panginanamaan!
8. Aniat’ masapul nga aramiden ti Kristiano no isu ti simiasi manipud dalan ti kinasanto?
8 Nupay kasta, kasanon no ti maysa a Kristiano nasayaat ti maar-aramidanna iti serbisio ni Jehova iti sumagmamano a panawen ngem kamaudiananna makapatanor iti makatulaw nga ugali wenno bumusoren iti doktrina wenno kadagiti moral ti Biblia? No kasta isu ti simiasi manipud iti dalan ti kinasanto ket kasapulan nga idemostrana ti pudpudno a panagbabawi ket isu ti mangala iti umiso nga addang a panangiremedio iti dayta. Kas imbaga ni Pablo kadagiti padana a napulotan: “Yantangay adda kadatayo dagitoy a karkari, ay-ayatek, agdalustay koma iti isuamin a kinarugit ti lasag ken espiritu, nga an-anayentayo ti kinasanto iti panagbuteng iti Dios.” (2 Corinto 7:1) Asinoman a Kristiano nga agkasapulan a mangpalinteg iti nakillo a dalanna makitananto a pudno a maysa a bendision ti Nainkasuratan a balakad dagiti naayat a manangaywan.—Proverbio 28:13; Santiago 5:13-20.
9. Gapu iti kuna ti 2 Pedro 3:14, ania a saludsod ti tumaud?
9 Kalpasan ti panangitudona iti nalinteg a baro a sistema, innayon ni Pedro: “Gapuna ay-ayaten, yantangay ur-urayentayo dagitoy a banag, agawaanyo tapno masarakankay koma [ni Jehova a Dios] a sitatalna, nga awan ti tulaw ken awan ti pakapilawanyo iti sanguananna.” (2 Pedro 3:14) Dagidiay a sasao naiturongda kadagiti napulotan a Kristiano, ngem pudno nga amin dagiti Saksi ni Jehova masapul a masarakanda nga ‘awan ti tulawna, awan pakapilawanna, ken adda a sitatalna.’ Gapuna ania ti masapul nga aramidentayo?
“Awan ti Tulaw ken Awan ti Pakapilawanna”
10. Kasano a pinagbalin ti “dakkel a bunggoy” dagiti pagan-anayda a nadalus iti dara ni Jesus?
10 Rebbeng nga aramidentay ti amin a kabaelantayo a masarakan nga “awan tulawna ken awan pakapilawanna.” Dagidiay adda iti “dakkel a bunggoy” ket ‘linabaandan dagiti pagan-anayda ken pinapudawda ida iti dara ti kordero.’ Iti naminsan, paset ida daytoy managbasol a lubong ket dagiti pagan-anay a pakabigbiganda ti natulawan iti dayta, narugit iti imatang ni Jehova. Kasano ti panamagbalinda kadagiti pagan-anayda a napudaw nga awan pakapilawanna babaen “iti dara ti Kordero,” ni Jesu-Kristo? Babaen ti panangidemostrada iti pammatida a ‘no awan ti dara a maiparukpok awan ti pannakapakawan’ ket ni Jesus “ti Kordero ti Dios a mangikkat ti basol ti lubong.” (Apocalipsis 7:9, 14; Hebreo 9:22; Juan 1:29, 36) Daytoy ti inaramidda babaen ti panangaramidda iti awan kondisionna a dedikasion iti Dios ken ti panangisimbolo iti dayta babaen iti kompleto a bautismo, ti naan-anay a pannakaitaneb iti danum. Ti kasta a dedikasion ti rebbeng a maaramid baeten ken Jesu-Kristo ken buyogen ti pammati a ti naiparukpok a darana ti mamagbalin a posible ti panangpakawan ti Dios kadagiti basbasolda ket pagbalinenna ida a makaay-ayo iti imatangna.
11. Yantangay ti basol ti mangdadael ti pannakikappiatayo ken ni Jehova, iti ania a kasasaad ti kasapulan a pagtalinaedantayo koma?
11 Ti “dakkel a bunggoy” masapul a “salimetmetanda” a napudaw dagiti pagan-anayda babaen ti saanda a pannakatulaw iti kinanailubongan ket iti kasta mapukawda ti Nakristianuan a personalidadda ken ti pakabigbiganda kas dagiti naanamongan a Saksi ni Jehova. Pudno unay, amin dagiti pudpudno a Kristiano masapul nga umikayda manipud panagbalinda a natulawan kadagiti nailubongan nga aw-awid, tigtignay, ken kababalin. Yantangay ti basol ti mangdadael iti pannakikappiatayo ken Jehova, babaen laeng ti panagtalinaed iti maysa a kasasaad a sadiay dagiti basbasoltayo ti maabbongan a masarakantayto a “sitatalna” iti dayta um-umayen a dakkel nga “aldaw ni Jehova,” Masapul nga awanantayo koma kadagiti tulaw gapu kadagiti ulbod a narelihiusuan nga ar-aramid wenno kadagiti imoralidad daytoy a lubong.
12. Kasano a ti 2 Pedro 2:13 agaplikar uray pay iti uneg ti kongregasion Kristiano?
12 Ti panagtalinaed nga awan tulawna ken awan pakapilawanna sapulenna ti kaadda ti kababalin ken ug-ugali a kasungani dagiti kababalin dagiti “saan a pudno a mannursuro” a maipapan kadakuada nagsurat ni Pedro: “Ibilangda a ragsak ti magmagna kadagiti kinadakes iti aldaw. Isuda dagiti rukruker ken rimon, nga agragragsakda kadagiti panangallilawda no madamada a makiramrambak kadakayo.” (2 Pedro 2:1, 13) Wen, uray pay iti uneg ti kongregasion masapul nga agannadtayo kadagiti saan a pudno a mannursuro “nga ibilangda a ragsak ti magmagma kadagiti kinadakes iti aldaw.” Bayat dagiti or-oras iti aldaw, a nagadu ti maaramidan a maipaay iti naespirituan a pakagunggonaan dagiti dadduma, dagiti saan a naespirituan a tattao mabalin nga agaramidda iti kinadakes, agraman ti aglablabes a ragragsak ken ti aglablabes a pannangan ken panaginum. Mabalin a padpadasenda a pagbalinen dagiti sosial a taripnong kas ti padaya iti boda a pagbalinen nga okasion a maipaay kadagiti pangparasuk ti derrep a toktokar, dagiti naderrep a panagsalsala, kinabuklis, ken aglablabes a panaginum iti de alkohol. Awan kadagitoy ti mapalubosan a mapasamak iti tengnga ti ili ni Jehova.—Isaias 5:11, 12; kitaenyo Ti Pagwanawanan, Oktubre 15, 1984, pp. 16-23.
13. Ania ti maaramidan ti manangsangaili tapno ti sosial a panagtataripnong agbalin a makapabileg iti naespirituan?
13 Ti manangsangaili iti sosial a panagtataripnong ti makimbiang no ania ti mapasamak sadiay. Tapno dayta a pasamak ti makapabileg iti naespirituan, nainsiriban ti panangaramid iti dayta iti nalakana a maaywanan a bilang ket saan nga agaw-awis iti asinoman a mabalin a mangyeg iti di makaay-ayo nga impluensia. Kas ipamatmat dagiti sasao ni Pablo idiay 2 Timoteo 2:20-22, saan nga amin a nakitimpuyog iti kongregasion ket nasasayaatda a pakikadkaduaan. Gapuna, ti manangsangaili a Kristiano ket awanan iti obligasion a mangawis kadagiti tattao a pagaammo a dida ammo a medmedan ti panagsasaoda wenno aglablabesda iti pannangan wenno panaginum. Laglagipenna nga, ‘uray no mangmangantayo wenno umin-inumtayo wenno uray aniaman nga aramidentayo, aramidentayo amin a maipaay iti dayaw ti Dios.’—1 Corinto 10:31.
14. Ania a takder ti rebbeng nga alaen maipapan kadagiti di pudno a mannursuro?
14 Sumagmamano laeng dagidiay ‘rukruker ken rimon, nga agragragsak kadagiti panangallilawda’ bayat a makitimtimpuyogda kadatayo. Ngem dagiti manangaywan ken dagiti dadduma iti kongregasion masapul a managsalukagda koma, a siinget a pawilanda ti aniaman a di pudno a mannursuro a mabalin a makastrek iti kongregasion ket padpadasenna ti panangiserrek iti imoralidad wenno ti di umiso a doktrina. (Judas 3, 4) Babaen laeng iti nainget a panangsalimetmet kadagiti nalinteg a pagalagadan ti Dios a pagbalinen a posible a pagtalinaeden ti kongregasion nga awan tulawna ken awan ti pakapilawanna.
Aniat’ Kasapulan Tapno Masarakan a “Sitatalna”?
15. (a) Kasano a maragpat ti maysa ti pannakikappiana iti Dios? (b) Aniat’ masapul nga aramidentayo tapno masarakan a “sitatalna” inton umay ti dakkel nga aldaw ni Jehova?
15 Tapno masarakan a “sitatalna,” masapul a taginayonen ti ili ni Jehova ti pannakikappiada kenkuana. (2 Pedro 3:14) Naikkantayo iti daytoy a kasasaad babaen ken Jesu-Kristo, a maipapan kenkuana nagsurat ni Pablo: “Ta makaay-ayo iti Dios a ti amin a pannakapunno agtaeng kenkuana, ket gapu kenkuana maikappia kenkuana met laeng dagiti isuamin a bambanag, idinto nga inaramidna ti kappia a gapu iti darana iti kayo a pagtutuokan, gapu kenkuana, kunak uray dagiti adda iti rabaw ti daga ken uray dagiti adda sadi langit.” (Colosas 1:19, 20) Dagiti nadagsen a basol ti mangikabil ti rigat wenno padagsen iti pannakirelasion ti maysa a tao ken ni Jehova ket dayta ti mamagbalin iti tao a maaddaan iti mariribukan a konsiensia, nagulo a kasasaad, idinto a ti talna isu ti ikutan dagidiay mangipangpangag kadagiti bilbilin ti Dios. (Salmo 38:3; Isaias 48:18) Tapno masarakan a “sitatalna” iti iyaay ti naindaklan nga aldaw ni Jehova, ngarud, masapul nga agtalinaedtayo iti nadiosan a kasasaad a mangipalubos a dagiti basbasoltayo ti maabbongan babaen ti dara ni Jesus iti kayo a pagtutuokan.
16. Sigun ken apostol Pablo, kasanotay a masurot ti talna kadagiti kapammatian?
16 Masapul a maaddaantay met ti pannakikappia kadagiti dadduma a managdaydayaw ken Jehova. Ingunamgunam ni Pablo: “Iti kasta ngarud surotentayo dagiti bambanag nga agtaud iti talna ken dagiti bambanag a makapalaing iti maysa ken maysa.” Ti konteksto ipakitana a masapul nga agannadtayo a ditay makaitibkol iti kapammatiantayo maipapan iti taraon, inumen, wenno ti uray aniaman a banag. (Roma 14:13-23) Ngem adda pay mainayon iti banag a saan laeng a dayta, ta kuna ni Pablo kadagiti Kristiano a taga Efeso: “Siak . . . dawatek ngarud kadakayo a magnakay koma a maikari iti pannakaayab a nakaawisanyo, a buyogen ti amin a kinaemma ken ti kinapakumbaba, agraman ti panaganus, nga agiinnanuskayo iti ayat, nga agawaanyo a salimetmetan ti panagmaymaysa ti espiritu iti singgalut ti talna.” (Efeso 4:1-3) Pudno unay, kayattayo nga idemostra ti panagkaykaysatayo babaen ti panangliklik kadagiti amin a makadadael ti talna a sasao ken ar-aramid ken babaen ti panagtakder a sititibker a kas dagiti manangsuportar iti kinasoberano ni Jehova.
17. Sigun iti 1 Pedro 3:10-12, aniat’ ramanen ti ‘panangsapul ti talna’?
17 Pudno unay a ti ‘panangsapul ti talna’ kalikagumanna a masapul nga annadantayo agpadpada ti ar-aramid ken sasaotayo, ta insurat ni apostol Pedro: “Ti tarigagay nga agayat iti biag ken makakita kadagiti nasayaat nga al-aldaw, igawidna ti dilana iti dakes ken dagiti bibigna tapno dida agsao iti ulbod, no di ket umadayo koma iti dakes ket agaramid iti naimbag; sapulenna koma ti talna ket isu ti surotenna. Ta dagiti mata ni Jehova sikikitada kadagiti nalinteg, ket dagiti pagdengngegna sititimudda kadagiti ar-ararawda; ngem ti rupa ni Jehova sisasango kadagiti agaramid ti dakes.” (1 Pedro 3:10-12; Salmo 34:12-16) Ngarud, kadagiti nadumaduma a pamay-an, dagiti nasungdo nga ad-adipen ni Jehova masapul nga itultuloyda a “sapulen ti talna” no kayatda ti masarakan a “sitatalna.”
Agpannuray iti Tulong ni Jehova
18. Aniat’ maaramidantayo no dagiti nailubongan nga ar-aramid, tigtignay, wenno kababalin ti makaawis kadatayo?
18 Impamatmat ni Pedro a “dagiti el-elemento,” ti nailubongan nga espiritu, wenno dagiti kababalin ken aw-awid, “marunawdanto,” wenno madadaeldanto, bayat ti “aldaw ni Jehova.” (2 Pedro 3:7, 10) Ngem aniat’ maaramidantayo no dagiti nailubongan nga aw-awid, tigtignay, wenno kababalin ket makaawisda kadatayo? Pudno unay, kasapulan a gundawayantayo a naan-anay dagiti naespirituan a sagana a naaramid babaen iti organisasion ni Jehova. Mainayon kadagitoy a bambanag, rebbeng a regular ti intay panagad-adal ti Sao ti Dios ken kadagiti Nakristianuan a publikasion nga ipapaay “ti matalek ken naannad nga adipen.” (Mateo 24:45-47) Masapul nga ipakitatayo met ti agtultuloy a panagyamantayo iti sagana ti subbot, ti “napateg a dara [ni Jesus], a kas dara ti maysa a kordero nga awan mulitna ken awan tulawna.”—1 Pedro 1:18, 19.
19. Kasano a makatulong ti kararag no dagiti nailubongan a kababalin ti mangim-impluensia kadatayo?
19 Rebbeng nga ikararagtayo ti tulong ti Dios tapno “suroten ti kinalinteg.” (1 Timoteo 6:11-14) No madlawtayo a dagiti nailubongan a kababalin ti mangim-impluensia kadatayo, wenno dadduma a naayat a kapammatiantayo ti nangiriing iti daytoy iti atensiontayo, nainsiriban ti panagbalin nga espisipiko maipapan iti daytoy a parikut kadagiti karkararagtayo babaen ti panangidawat ken ni Jehova a tulongannatayo a mangparmek kadagitoy a pagannayasan. Pudno unay, maiyanatop ti panangidawat iti espiritu ti Dios ken iti tulongna iti panangsukay kadagiti bungbunga a maisupadi kadagiti nailubongan a kababalin ken aw-awid. (Galacia 5:16-26; Salmo 25:4, 5; 119:27, 35) Matulongannatayo ni Jehova a mangipamaysa kadagiti nalinteg, nadalus, natakneng, ken nadayaw a bambanag. Ket anian a maiyanatop unay ti panangiyararaw a sipapasnek kenkuana tapno ti di madaegan a “talna ti Dios” aywanannanto dagiti puspusotayo ken dagiti panunottayo! (Filipos 4:6, 7) Iti kasta dagiti panagdandanag, pannulisog, ken dagiti umas-asping kadagita, didanton dumakkel agingga a didanto matengngel. Imbes ketdi, ti panagbiagtayo ti matandaanto iti inted-Dios a kinatalna. Wen, ti “dakkel a talna ti maadda kadagiti agayat iti linteg [ni Jehova].”—Salmo 119:165.
Agtalinaed nga ‘Awan Tulawna, Awan Pakapilawanna, ken Sitatalna’
20. Kasanotay a maikuna a posible a maadda ti kasasaad a naespirituan nga awan pakapilawanna?
20 Makaparagsak ta, amin dagiti adda iti uneg ti organisasion ni Jehova, agraman dagiti kabbaro nga um-umay pay ita, ket makaay-ayoda iti Dios. (Aramid 10:34, 35) Babaen iti tulong ni Jehova, posible a “pagtalawantayo ti saan a kinasingpet ken dagiti nailubongan a tartarigagay” ket agbiag kas rebbeng a panagbiag dagiti pudno a Kristiano. (Tito 2:11-14) Nupay naminsan ganggannaettayo ken Jehova, ket dagiti is-isiptayo ti adda kadagiti dakes nga ar-aramid, datayo ti naikappian iti Dios babaen ti ipapatay ni Kristo. Gapuna ti naespirituan nga awan pakapilawanna a kasasaad ti posible la ketdi no agtultuloytayo iti pammati ket ditay pakuti iti pananginanama iti naimbag a damag.—Colosas 1:21-23.
21. Kasanotay a masarakan iti kamaudiananna nga awan tulawna, awan pakapilawanna, ken sitatalna?
21 Babaen iti tulong ni Jehova, ti Saona, ken ti organisasionna, mabalintay ti agtalinaed nga awan tulawna iti lubong ken awan pakapilawanna kadagiti ar-aramidna, tigtignayna, ken kababalinna. Iti kasta maammuantayto met ti pudpudno a talna. Wen, babaen ti panagtalinaed iti nasantuan a panagdayawtayo ken ni Jehova, iti kamaudiananna masarakantayto nga ‘awan tulawna, awan pakapilawanna, ken sitatalna.’
Kasano ti Panangsungbatyo?
◻ Apay a ti kinasanto makalikaguman ti ili ni Jehova?
◻ Kasanotay nga agtalinaed nga awan tulawna ken awan pakapilawanna?
◻ Aniat’ makalikaguman tapno adda a “sitatalna”?
◻ Kadagiti ania a pamay-an a maipakitatayo ti panagpannuray iti tulong ti Dios?
◻ Aniat’ maaramidantayo no dagiti nailubongan nga ar-aramid, tigtignay, wenno kababalin ti makaawis kadatayo?
[Dagiti ladawan iti panid 16, 17]
Bambanag a mamagtalinaed iti ‘kinaawan tulawna, awan pakapilawanna, ken sitatalna’ Panagserserbi iti Dios iti naimpusuan a dedikasion
Ti panangsukay ti Nakristianuan a personalidad
Ti kaadda dagiti makapabileg iti naespirituan a pannakitimtimpuyog
Panangsapul ti talna iti Dios babaen iti kararag