KAWIT

Maysa a metal wenno sabali pay a material a nagsikko wenno nagsikkubeng, a no dadduma ket adda simana.

Kawkawit a balitok ti naaramat iti tabernakulo tapno mapagsilpo ti dua a dadakkel a benneg ti nabordaan nga abbong a lienso, ken kawkawit a gambang ti naaramat iti dua a benneg ti abbong a dutdot ti kalding. (Ex 26:1, 5, 6, 7, 10, 11; 36:13, 18; 39:33) Ti kortina iti nagbaetan ti Nasantuan ken Kasasantuan nakabitin kadagiti kawit, a nabatad a naaramid iti balitok (Ex 26:31-33), kas met iti tabing nga adda iti pagserkan ti tabernakulo.​—Ex 26:36, 37.

Dagiti banniit ket inaramat dagiti nagkauna a mangngalap. (Hab 1:14, 15; Isa 19:1, 6-8; Mt 17:24-27) Nadakamat iti Biblia dagiti kawit ti partidor. (Am 4:2) Naaramat met dagiti kawit, a nalabit sisiit, tapno pangiturong kadagiti animal, nangnangruna kadagiti atap nga animal.​—Eze 19:3, 4, 6, 9, Rbi8 ftn.

No dadduma naukod idi dagiti kautibo a tattao babaen kadagiti kawit a naikabil kadagiti bibig, agong, wenno dilada. Ti maysa nga Asirio a mangiparangarang a ladawan ipakitana ti maysa nga ari a mangtengtengngel iti tallo a kautibo babaen kadagiti tali a naigalut kadagiti kawit nga adda kadagiti bibigda bayat a bulbulsekenna ti maysa kadakuada babaen iti pika. Gapuna, natarusan ni Ari Senaquerib ti Asiria idi nagsao kenkuana ni Jehova iti piguratibo a sasao babaen ken mammadto Isaias: “Pudno unay nga ikabilkonto ti kawitko iti agongmo ken ti pangngedngedko iti baet dagiti bibigmo, ket pudno a pasublienkanto iti dalan nga immayam.”​— 2Ar 19:20, 21, 28; Isa 37:29.

Iti piguratibo a sasao nagsao ni Jehova ken Faraon ti Egipto, a simamaag a nagkammatalkan ti Israel maipaay iti saranay maibusor iti Babilonia: “Mangikabilakto iti kawkawit kadagiti pangam . . . Ket isang-atkanto manipud iti tengnga dagiti kanal ti Nilo a kukuam . . . Ket baybay-ankanto iti let-ang . . . Ket amin dagiti agnanaed iti Egipto kasapulanto a maammuanda a siak ni Jehova, iti rason a nagbalinda a, kas maysa a saranay, runo iti balay ti Israel.” (Eze 29:1-7) Mayanatup dagitoy a sasao; kinuna ti historiador a ni Herodotus (II, 70) a dagiti Egipcio nagaramatda iti kawit a pangtiliw iti buaya ken pangisang-at manipud iti danum. Impadto met ni Jehova nga isu mangikabil iti kawkawit kadagiti panga ni “Gog iti daga ti Magog” ket iruarna nga ipan iti kamaudianan nga idadarupna iti ili ti Dios ken agturong iti mismo a pannakapapatayna.​—Eze 38:1-4; 39:1-4.