Manipud Managbasatayo

Uniberso Masapul nga agyamanak iti mamagpanunot nga impormasion kadagiti serie ti “Panangibutaktak Kadagiti Palimed ti Uniberso.” (Marso  22, 1992) Ngem pangibatayantayo iti panangikuna a dagiti red giant, pulsar, ken black hole isudat’ tukad iti biag [ken ipapatay] dagiti bituen? Kuna ti Isaias 40:26 nga “awan [kadagiti bituen] ti agkurang uray no maysa.”

E. W., Sierra Leone

Saan nga ilawlawag daytoy a teksto ti Biblia ti kellaat a panagpukaw dagiti bituen. Imbes ketdi, itamtampokna ti di matukod a pannakaammo ken sirib ti Dios. Kas Namarsua, ammo ti Dios ti kasasaad ti tunggal bituen. Iti biangna, awan a pulos ti “agkurang.” (Kitaenyo “Ti Pagwanawanan” a Setiembre 15, 1989, panid 31.)​—ED.

Panaginnayat ti Agtutubo Pagyamanan unay iti artikulo nga “Agimtuod Dagiti Agtutubo . . . Aniat’ Pagdaksan ti Pannakisarsarita?” (Agosto 22, 1992) Nabayag met a nakisinsinnuratak iti maysa a barito iti kongregasionmi. Nagsinsinnaritakam met iti telepono. Nupay kasta, yantangay agpadakam a di pay nataengan tapno makiasawa, inkeddengmi nga isardengen ti masansan a panagsinsinnarita. Maragsanak a nakabasa nga umiso ti inkeddengmi.

M. N., Japan

Kasla ammoyo ti pampanunotek! Nabayagen a pampanunutek ti makisinnurat iti dadduma a lallaki. Bigbigek a naallilawak iti panangipapan a dagitoy a surat ket kas panangparegta laeng kadakuada. Ti artikuloyo ket dimteng iti umiso a tiempo.

D. B., Estados Unidos

Agtawenak iti 12 ket adut’ sursuratak. Maysa kadakuada ket maysa a barito. Diak impagarup nga agayatak kenkuana, ngem maysa nga aldaw insuratna nga ay-ayatennak! Dimteng ti artikuloyo iti apagpag-isu a tiempo!

E. V., Estados Unidos

Arthritis Naginteresak unay a binasa ti artikuloyo a “Panangibtur iti Arthritis” (Hunio 8, 1992). Kas maysa nga addaan arthritis, nariknak a saanna unay nga inladawan ti saem nga ibunga daytoy a sakit babaen ti nagduduma nga epektona: dukot, ut-ot, bannog, saan a pannakaturturog, ken leddaang. Impakitayo ti maysa a ladawan ti nadisporma nga im-ima a kasla ket la daytoyen ti kakaruan a kita ti arthritis. Saan laeng a dagiti makita a depekto ti kakaisuna a sagsagabaenmi. Dimketen ti makannawan a paragpagko iti padingpadingko, ket gapu ta awan makakita iti depekto, saanda a bigbigen dayta. Pinaregtanak ti artikuloyo a “maaddaan nasayaat a panangmatmat,” ngem no maminsan, narigat nga aramiden dayta no awan panangandingay ti sabsabali.

M. J., Estados Unidos

Apresiarenmi dagitoy a nabatad a komento. Pudno a limitado ti sinaklaw ti artikulomi. Kasta met a daytat’ naiturong a nangnangruna kadagiti agsagsagaba iti arthritis, a makaammo unay kadagiti epekto daytoy a sakit. Nupay kasta, umanamongkami a nasayaat unay no ammo met dagiti gagayyem ken kabagian dagiti makadadael nga epekto ti arthritis ken nasken nga ikagumaanda ti tumulong ken mangandingay.​—ED.

Pagyamanan unay iti panangipablaakyo iti artikulo. Agtawenak iti 31 ken agsagsagaba iti nakaro nga arthritis. Ti bannog imbungana ti leddaang, ladingit, ken pannakapaay. Ngem mailiwliwagko gapu ta tagtagiragsakek ti naespirituan a salun-at a napateg unay kaniak.

T. R., Estados Unidos

Nabayag a sinegseggaak ti panangipablaakyo iti daytoy nga artikulo, ket naragsakanak unay a nangbasa iti dayta. Sipud pay idi siam ti tawenko ib-ibturakon ti ut-ot ti rheumatoid nga arthritisko. Nupay makikaduakam no dadduma kadagiti di unay makaawat kadagiti sagsagabaenmi, ipakpakita ni Jehova ti pannakaseknanna ken pabpabilgennakami babaen kadagiti artikulo a kas itoy.

P. C., Italia