Saluadan ni Jehova Dagidiay Manginanama Kenkuana
“Dagiti met laeng naayat a kinamanangngaasim ken kinapudnom saluadandak koma a patinayon.”—SALMO 40:11.
1. Ania ti kiniddaw ni Ari David ken ni Jehova, ken kasano a mapatpatgan dayta iti agdama?
NI Ari David iti nagkauna nga Israel ‘sipapasnek a nanginanama ken ni Jehova’ ket natignay a mangibaga a ni Jehova ‘inyallingagna ti lapayagna ket nangngegna ti panagpatulongna.’ (Salmo 40:1) Maulit-ulit a nakitana a mismo no kasano a sinaluadan ni Jehova dagidiay agayat Kenkuana. Gapuna, kiniddaw ni David ti patinayon a panangsaluad kenkuana ni Jehova. (Salmo 40:11) Kas maysa kadagiti matalek a nakaikarian ti “nasaysayaat a panagungar,” masigurado ni David a silalagip kenkuana ni Jehova kas maysa nga umawatto iti dayta a gunggona. (Hebreo 11:32-35) Napatalgedan ngarud ti namnamana iti kasayaatan a pamay-an. Nailanad ti naganna iti libro ni Jehova, ti “libro a pakalaglagipan.”—Malakias 3:16.
2. Kasano a ti Kasuratan matulongannatayo a mangtarus no ania ti kaipapanan ti panangsaluad ni Jehova?
2 Nupay dagiti matalek a nadakamat iti Hebreo kapitulo 11 nagbiagda sakbay ti temporario a panagnaed ni Jesu-Kristo ditoy daga, nagbiagda maitunos iti insuro ni Jesus idi kinunana: “Ti agayat iti kararuana madadaelna dayta, ngem ti manggura iti kararuana iti daytoy a lubong masaluadannanto dayta a maipaay iti agnanayon a biag.” (Juan 12:25) Gapuna, ti panangsaluad ni Jehova nalawag a dina kaipapanan a ditay mapasaran ti panagsagaba wenno pannakaidadanes. Imbes ketdi, saluadannatayo ti Dios iti naespirituan a pamay-an tapno mataginayon ti nasayaat a takdertayo iti imatangna.
3. Ania ti pammaneknek a ni Jehova sinaluadanna ni Kristo Jesus, ket ania ti resultana?
3 Uray ni Jesus a mismo nagbalin a puntiria ti narungsot a pannakaidadanes ken pannakarabrabak, ken pinapatay pay dagiti kabusorna iti nakababain ken nasaem unay a wagas. Kaskasdi, di kayat a sawen dayta a saan a tinungpal ti Dios ti karina a saluadanna ti Mesias. (Isaias 42:1-6) Ti panagungar ni Jesus iti maikatlo nga aldaw kalpasan ti nakababain nga ipapatayna paneknekanna nga impangag ni Jehova ti panagpatulongna—no kasano nga impangag ni Jehova ti panagpatulong ni David. Ni Jehova pinabilegna ni Jesus tapno mataginayonna ti kinatarnawna. (Mateo 26:39) Gapu ta nasaluadan, nagun-od ni Jesus ti imortal a biag idiay langit, ken naaddaan iti namnama nga agbiag nga agnanayon ti riniwriw a tattao a mangipakita iti pammati iti subbot.
4. Ania ti naipanamnama kadagiti napulotan a Kristiano ken iti “sabsabali a karnero”?
4 Makapagtalektayo a sidadaan ken kabaelan ni Jehova a saluadan dagiti adipenna ita kas iti inaramidna idi kaaldawan ni David ken ni Jesus. (Santiago 1:17) Ti sumagmamano laeng a natda kadagiti napulotan a kakabsat ni Jesus nga adda pay laeng ditoy daga mapagtalkanda ti kari ni Jehova: ‘Maysa a di agrupsa ken di natulawan ken di agkupas a tawid ti naisagana iti langlangit maipaay kadakayo, dakayo a salsaluadan ti pannakabalin ti Dios babaen ti pammati maipaay iti pannakaisalakan a sisasagana a maipanayag iti kamaudianan a las-ud ti tiempo.’ (1 Pedro 1:4, 5) Ti “sabsabali a karnero,” nga addaan iti naindagaan a namnama, makapagtalekda met iti Dios ken iti inkarina babaen ti salmista: “O ayatenyo ni Jehova, dakayo amin a nasungdona. Dagidiay matalek saluadan ni Jehova.”—Juan 10:16; Salmo 31:23.
Nasaluadan iti Naespirituan a Pamay-an
5, 6. (a) Kasano ti pannakasaluad dagiti adipen ti Dios iti moderno a panawen? (b) No maipapan ken ni Jehova, ania ti relasion kenkuana dagiti napulotan a Kristiano ken dagidiay addaan iti naindagaan a namnama?
5 Iti moderno a panawen, nangipaay ni Jehova kadagiti probision a mangsaluad kadagiti adipenna iti naespirituan a pamay-an. Nupay dina iliklik ida manipud iti pannakaidadanes wenno kadagiti pakarigatan ken trahedia a kadawyan iti biag, agtultuloy nga ipapaayna ti tulong ken pammaregta a kasapulanda tapno masaluadan ti nasinged a relasionda kenkuana. Ti pammatida iti subbot a siaayat nga impaay ti Dios ti agserbi kas pundasion dayta a relasion. Dadduma kadagita a matalek a Kristiano ti napulotan iti espiritu ti Dios tapno maikarida a makipagturay ken ni Kristo idiay langit. Naideklarada a nalinteg kas naespirituan nga annak ti Dios, ket agaplikar kadakuada dagitoy a sasao: “Inispalnatayo manipud iti autoridad ti sipnget ket inyalisnatayo iti pagarian ti Anak ti ayatna, a babaen kenkuana addaantayo ti pannakaluk-at babaen iti subbot, ti pannakapakawan dagiti basoltayo.”—Colosas 1:13, 14.
6 Naipanamnama kadagiti minilion a dadduma pay a matalek a Kristiano a magunggonaanda met manipud iti subbot nga impaay ti Dios. Mabasatayo: “Ti Anak ti tao immay, saan a tapno pagserbian, no di ket tapno agserbi ken tapno itedna ti kararuana kas subbot a kasukat dagiti adu.” (Marcos 10:45) Ur-urayen dagita a Kristiano ti naikeddeng a tiempo inton tagiragsakenda ‘ti nadayag a wayawaya ti annak ti Dios.’ (Roma 8:21) Kabayatanna, ipatpategda ti personal a pannakigayyemda iti Dios ken sipapasnek nga ikagkagumaanda a patibkeren dayta.
7. Kadagiti ania a pamay-an a salsaluadan ita ni Jehova ti naespirituan a takder dagiti adipenna?
7 Ti maysa a pamay-an a salsaluadan ni Jehova ti naespirituan a takder dagiti adipenna ket babaen ti panangyurnosna iti maysa a programa ti agtultuloy a panangsanay. Dayta ti tumulong kadakuada a maaddaan iti naun-uneg a pannakaammo iti kinapudno. Mangipapaay met ni Jehova iti agtultuloy a panangiwanwan babaen ti Sao, organisasion, ken nasantuan nga espirituna. Iti sidong ti panangiwanwan “ti matalek ken masirib nga adipen,” dagiti adipen ti Dios iti intero a lubong ket mayarig iti maysa nga internasional a pamilia. Ti klase adipen ti mangas-asikaso kadagiti naespirituan a kasapulanda ken no nesesita, uray ti pisikal a kasapulan dagiti adipen ni Jehova—aniaman ti nasion wenno kasasaadda iti kagimongan.—Mateo 24:45.
8. Iti ania nga agtalek ni Jehova kadagiti nasungdo kenkuana, ket ania ti ipanamnamana kadakuada?
8 No kasano a ni Jehova dina inliklik ni Jesus manipud kadagiti pisikal a panangraut dagiti kabusorna, saanna met nga iliklik dagiti agdama a Kristiano iti kasta a pamay-an. Ngem di kayat a sawen dayta a saan a naay-ayo kadakuada ti Dios. Adayo a kasta! Imbes ketdi, dayta ti mangipakita nga agtalek ti Dios nga itandudoda ti dasigna mainaig iti naindaklan a sapasap nga isyu. (Job 1:8-12; Proverbio 27:11) Saan pulos a baybay-an ni Jehova dagidiay nasungdo kenkuana, “ta ni Jehova ket managayat iti kinahustisia, ket saannanto a panawan dagidiay nasungdona. Agingga iti tiempo a di nakedngan sigurado a masaluadandanto.”—Salmo 37:28.
Nasaluadan Babaen ti Naayat a Kinamanangngaasi ken Panagbalin a Napudno
9, 10. (a) Kasano a proteksion kadagiti adipen ni Jehova ti panagbalinna a napudno? (b) Kasano nga ipakita ti Biblia a saluadan ni Jehova dagidiay nasungdo kenkuana babaen ti naayat a kinamanangngaasina?
9 Iti kararagna a nailanad iti Salmo 40, kiniddaw ni David nga isu ket saluadan koma ti naayat a kinamanangngaasi ken panagbalin a napudno ni Jehova. Gapu ta napudno ni Jehova ken ay-ayatenna ti kinalinteg, silalawag nga ipakaammona no ania dagiti pagalagadanna. Dagidiay agbibiag maitunos kadagita a pagalagadan matagiragsakda ti dakkel a pannalaknib kadagiti pakarigatan, buteng, ken parikut a mapaspasaran dagidiay mangyaleng-aleng kadagita a pagalagadan. Kas pagarigan, maispaltayo ti bagitayo ken dagidiay ay-ayatentayo manipud kadagiti nasaem a parikut no liklikantayo ti panangabuso iti droga ken alkohol, seksual a kinalulok, ken naranggas a panagbiag. Ken uray kadagidiay naiwawa manipud iti dana ti kinapudno ni Jehova—kas napasamak ken ni David iti sumagmamano a gundaway—manamnamada nga agtalinaed ti Dios kas ‘maysa a lugar a paglemmengan’ para kadagiti nakabasol nga agbabbabawi. Sirarag-o a maidir-ida: “Saluadannakto manipud iti mismo a rigat.” (Salmo 32:7) Anian nga ebkas ti naayat a kinamanangngaasi ti Dios!
10 Ti sabali pay a pagarigan ti naayat a kinamanangngaasi ti Dios isu ti panangpakdaarna kadagiti adipenna nga agtalinaedda a naisina iti dakes a lubong nga asidegen a dadaelenna. Mabasatayo: “Dikay ayaten ti lubong wenno uray ti bambanag nga adda iti lubong. No ti asinoman ayatenna ti lubong, ti ayat ti Ama awan kenkuana; agsipud ta amin a banag iti lubong—ti derrep ti lasag ken ti derrep dagiti mata ken ti panangiparammag iti sanikua a pagbiag ti maysa—saan nga agtaud iti Ama, no di ket agtaud iti lubong.” No ipangagtayo dayta a pakdaar ken agtignaytayo maitunos iti dayta, literal a masaluadantayo ti biagtayo iti agnanayon, ta ituloy ti teksto: “Kanayonanna pay, ti lubong aglabas ken kasta met ti tarigagayna, ngem ti agaramid iti pagayatan ti Dios agtalinaed iti agnanayon.”—1 Juan 2:15-17.
Nasaluadan Babaen ti Abilidad nga Agpanunot, Panangilasin, ken Sirib
11, 12. Ilawlawagyo no kasano a saluadannatayo ti abilidad nga agpanunot, panangilasin, ken sirib.
11 Maipaay kadagidiay agtarigagay a manggun-od iti anamong ti Dios, napaltiingan ti Anak ni David a ni Solomon tapno isuratna: “Ti met laeng pannakabael nga agpanunot aywanannakanto, ti met laeng panangilasin saluadannakanto.” Indagadagna met: “Gun-odem ti sirib . . . Saanmo a panawan dayta, ket aywanannakanto. Ayatem dayta, ket saluadannakanto.”—Proverbio 2:11; 4:5, 6.
12 Maparang-aytayo ti abilidadtayo nga agpanunot no mennamennaentayo dagiti maad-adaltayo iti Sao ti Dios. Patademenna ti panangilasintayo tapno maikeddengtayo dagiti umiso a prioridad. Napateg dayta yantangay ammo ti kaaduan kadatayo—nalabit maibatay iti personal a kapadasan—a tumaud dagiti parikut no iyun-una dagiti tattao dagiti saan a nainsiriban a prioridad, inggagara man wenno saan. Kayat ti lubong ni Satanas nga aramidentayo a kalat ti pananggun-od iti material a kinabaknang, kinatan-ok, ken pannakabalin, idinto ta ipagpaganetget ni Jehova dagiti napatpateg a naespirituan a kalat. No iyun-unatayo iti biagtayo dagiti tukon ti lubong imbes a dagiti naespirituan a banag, mabalin nga agresulta dayta iti pannakasinasina dagiti pamilia, pannakadadael dagiti panaggagayyem, ken pannakapukaw dagiti naespirituan a kalat. Kas resultana, awan ti sabali a lak-amen ti tao no saan a ti nakalkaldaang a kinapudno nga impasimudaag ti sasao ni Jesus: “Ania ti magunggona ti maysa a tao a magun-odna ti intero a lubong ket mapukawna ti kararuana?” (Marcos 8:36) Masiribtayo no ipangagtayo ti balakad ni Jesus: “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.”—Mateo 6:33.
Ti Peggad ti Panagbalin a Managimbubukodan
13, 14. Ania ti kaipapanan ti panagbalin a managimbubukodan, ken apay a saan a nainsiriban ti agbalin a kasta?
13 Kadawyanna a maseknan dagiti tattao iti bagida. Ngem no dagiti personal a tarigagay ken pakaseknan ti agbalin a kapatgan iti biag, mangyeg dayta kadagiti parikut. No kasta, tapno masaluadantayo ti pannakigayyemtayo ken ni Jehova, imbilinna a liklikantayo ti agbalin a managimbubukodan. Daytoy a termino kaipapananna ti “pannakaseknan kadagiti bukod a tarigagay, kasapulan, wenno interes.” Saan kadi a kasta ti adu a tattao ita? Kinapudnona, impakpakauna ti Biblia a kadagiti “maudi nga al-aldaw” ti dakes a sistema ni Satanas, “dagiti tattao managayatdanto iti bagbagida,” wenno managimbubukodan.—2 Timoteo 3:1, 2.
14 Patien dagiti Kristiano a nainsiriban ti panangtungpal iti bilin ti Biblia a nasken a maaddaan iti pannakaseknan kadagiti sabsabali, nga ayaten ida kas iti panagayat ti maysa iti bagina. (Lucas 10:27; Filipos 2:4) Mabalin nga ibilang ti kaaduan a tattao a saan a praktikal dayta. Nupay kasta, napateg dayta tapno matagiragsaktayo ti naballigi a panagasawa, naragsak a relasion ti pamilia, ken makapnek a panaggagayyem. Gapuna, ti maysa a pudno nga adipen ni Jehova rumbeng a dina ipalubos a ti bagina lattan ti pampanunotenna ket dinan ikabilangan dagiti napatpateg a bambanag. Kaipapanan dayta ti panangyun-unana iti interes ni Jehova, ti Dios a pagdaydayawanna.
15, 16. (a) Ania ti mabalin nga ibunga ti panagimbubukodan, kas napasamak iti siasino? (b) Ania a talaga ti ar-aramiden ti maysa a tao no isu ket manangukom iti sabsabali?
15 Ti panagimbubukodan ket mabalin nga agturong iti panaginlilinteg, a mamagbalin a natangsit ken akikid ti panagpampanunot ti maysa. Maitutop ti kuna ti Biblia: “Awan pagpambarmo, O tao, siasinokaman, no mangukomka; ta iti banag a pangukomam iti sabali, kondenarem ti bagim, yantangay sika a mangukom annurotem ti isu met laeng a bambanag.” (Roma 2:1; 14:4, 10) Kombinsido unay dagiti panguluen ti relihion a nakalinlintegda isu a maikarida a mangukom ken ni Jesus ken kadagiti pasurotna. Iti panangaramidda iti dayta, pinagbalinda ti bagida kas uk-ukom. Gapu ta dida makita dagiti bukodda a pagkurangan, dida ammo a ti mismo a bagida ti kinondenarda.
16 Ni Judas, ti pasurot ni Jesus a nangliput kenkuana, inukomna met dagiti sabsabali. Naminsan idiay Betania, kasta unay ti panagkedkedna idi a ni Maria, ti kabsat ni Lazaro, pinulotanna ni Jesus iti maysa a bangbanglo a lana. Impeksana ti rurodna babaen iti panangikunana: “Apay a saan a nailako daytoy a bangbanglo a lana iti tallo gasut a denario ket naited iti napanglaw a tattao?” Ngem intuloy ti salaysay: “Kinunana daytoy, nupay kasta, saan a gapu ta maseknan kadagiti napanglaw, no di ket gapu ta maysa a mannanakaw ken adda kenkuana ti kahon ti kuarta ket al-alaenna dagiti kuarta a naikabil iti dayta.” (Juan 12:1-6) Ditay koma pulos tultuladen ni Judas wenno dagiti panguluen ti relihion, a manangukom kadagiti sabsabali, a nagresulta iti bukodda a pannakakondenar.
17. Iyilustraryo ti peggad a kakuyog ti kinapangas wenno ti nalabes a kompiansa iti bagi.
17 Nupay saanda a mannanakaw a kas ken Judas, makapaladingit ta dadduma a nagkauna a Kristiano ti timmangsit, a nagbalinda a napangas. Nagsurat kadakuada ni Santiago: “Pagtangsityo dagiti napannakkel a kinapangasyo.” Sana innayon: “Amin dagiti kasta a panagtangsit ket nadangkes.” (Santiago 4:16) Mangyeg laeng iti pannakapaaytayo no sitatangsit nga ipagpannakkeltayo dagiti naaramidan wenno pribilehiotayo iti organisasion ni Jehova. (Proverbio 14:16) Malagiptayo ti napasamak ken ni apostol Pedro, a nagpannakkel kabayatan ti apagkanito a nalabes a panagtalekna iti bagina: “Uray no maitibkol amin dagiti dadduma mainaig kenka, saanakto a pulos maitibkol! . . . Uray no masapul a matayak a maikanunong kenka, saankanto a pulos paglikudan.” Kinapudnona, awan ti maipagpannakkeltayo. Amin a tagtagiragsakentayo ket maigapu iti naayat a kinamanangngaasi ni Jehova. No sipapanunottayo iti dayta, maliklikantayo ti agbalin a napangas.—Mateo 26:33-35, 69-75.
18. Ania ti panangmatmat ni Jehova iti kinatangsit?
18 “Ti panagpannakkel adda iti sakbay ti pannakarpuog, ken ti natangsit nga espiritu iti sakbay ti pannakaitibkol,” naibaga kadatayo. Apay? Sumungbat ni Jehova: “Ginurak ti panangitan-ok iti bagi ken panagpannakkel.” (Proverbio 8:13; 16:18) Di pakasdaawan a nakapungtot ni Jehova iti “kinakuspag ti puso ti ari ti Asiria ken maigapu iti kinapangpangruna ti kinangato dagiti matana”! (Isaias 10:12) Dinusa ni Jehova gapu iti kinakuspagna. Iti din agbayag, manungsungbatto met ti amin a paset ti lubong ni Satanas, agraman dagiti natangsit ken napangato a papanguluenda, makita ken saan. Ditay koma pulos iyanninaw ti kinasubeg dagiti bumusbusor ken ni Jehova!
19. Iti ania a banag nga agpannakkel ken agpakumbaba dagiti adipen ti Dios?
19 Adda rason dagiti pudno a Kristiano a mangipannakkel iti takderda kas ad-adipen ni Jehova. (Jeremias 9:24) Iti sabali a bangir, adda rasonda nga agtalinaed a napakumbaba. Apay? Gapu ta “amin nagbasol ken agkurang iti dayag ti Dios.” (Roma 3:23) Gapuna, tapno masaluadantayo ti takdertayo kas ad-adipen ni Jehova, masapul a tuladentayo ti kababalin ni apostol Pablo, a nagkuna a “ni Kristo Jesus immay ditoy lubong tapno mangisalakan kadagiti managbasol,” sana innayon: “Siak ti kangrunaan kadagitoy.”—1 Timoteo 1:15.
20. Kasano a salsaluadan ni Jehova dagiti adipenna ita, ket kasanonanto a saluadan ida iti masanguanan?
20 Gapu ta dagiti adipen ni Jehova siraragsak nga iyun-unada dagiti nadiosan nga interes imbes a ti bukodda a pagimbagan, masiguradotayo nga agtultuloy a saluadan ida ni Jehova iti naespirituan. Masiguradotayo met nga inton bumtak ti dakkel a rigat, saluadan ni Jehova dagiti adipenna saan laeng nga iti naespirituan no di pay ket iti pisikal. Apaman a makastrekda iti baro a lubong ti Dios, iyikkisdanto: “Adtoy! Daytoy ti Diostayo. Nanginanamatayo kenkuana, ket isalakannatayto. Daytoy ni Jehova. Nanginanamatayo kenkuana. Agrag-otayo koma ken agragsaktayo iti panangisalakanna.”—Isaias 25:9.
Malagipyo Kadi?
• Kasano a nasaluadan da Ari David ken Jesu-Kristo?
• Kasano a masalsaluadan ita dagiti adipen ni Jehova?
• Apay a nasken a liklikantayo ti panagimbubukodan?
• Apay a mabalintayo ti agpannakkel ngem kaskasdi a napakumbaba?
[Dagiti Ladawan iti panid 9]
Kasano a sinaluadan ni Jehova da David ken Jesus?
[Dagiti Ladawan iti panid 10, 11]
Kadagiti ania a pamay-an a masalsaluadan ita ti espiritualidad dagiti adipen ti Dios?
[Dagiti Ladawan iti panid 12]
Nupay ipagpannakkeltayo ti panagserbitayo ken ni Jehova, masapul nga agtalinaedtayo a napakumbaba