Ti Kaiyulogan dagiti Damdamag

Ti Biddut a Pagilasinan

“Ania ti pagilasinanyo?” Para kadagiti minilion a tattao nga agkonsulta kadagiti tsart ti “pagilasinan ti bituen” nga insagana dagiti astrologo, dayta a saludsod ket napateg. Patienda a ti posision dagiti bituen, dagiti planeta, ti init, ken ti bulan no maipapan iti konstelasion iti zodiac iti panawen ti pannakaipasngay ti direkta a makaimpluensia iti panagbiag ti maysa a tao. Nupay kasta, sigun iti inaldaw a pagiwarnak iti Londres nga Independent, dagiti astrologo ipapaayda kadagiti tattao ti biddut a pagilasinan. Dagiti tsart iti “pagilasinan ti bituen” a maus-usar kadagiti horoscopes ket naibatayda kadagiti “linlinteg” ti astrolohia a naaramid agarup 2,000 a tawtawenen ti napalabas.

Kuna ti Independent: “Ti maysa nga astrologo ibagananto kadagiti nagannak ti kabbaro a naipasngay nga ubing ita a ti pagilasinan ti anakna a babai wenno lalaki ket Cancer.” Nupay kasta, kuna ti report: “No matmatanda ketdi ti posision ti init iti langit, masarakandanto iti kinapudnona a dayta ket adda iti Gemini.” Ania ti makagapu iti daytoy? Dagiti astronomo awaganda dayta ti “kinaumiso dagiti equinoxes,” maysa a pasamak a ti pagrikosan ti daga, ngarud, ti aggaraw iti kasta unay a kas iti maysa a kampuso bayat ti panagbannayatna. Daytoy a panaggarawna, wenno “panagrikosna,” ti mangkompleto iti 360-degree a siklo iti tunggal 25,800 a tawtawen, a kaipapananna a dagiti equinoxes ti umabante iti 50 segundos iti arko iti tinawen, wenno iti maysa a degree iti 72 a tawtawen. Gapuna, iti napalabas a 2,000 a tawtawen, ti nalawag a posision ti init iti langit ket naglisin a nagsubli iti maysa a naan-anay a pagilasinan iti zodiac. Kas banagna, “ti horoscope iti nakaipasngayan saan nga isu ti pudpudno a ladawan iti langlangit iti kanito iti pannakaipasngay ti maysa,” inlawlawag ni Richard F. Smith iti pakpakauna ti librona a Prelude to Science. “Kaaduan kadagiti Scorpios itoy a lubong,” inlawlawagna, “ti pudno a naipasngay idi ti init adda iti Libra, kaaduan a Leos ti pudno a Cancer, dagiti Cancer ket Geminis, ken agtultuloy a kasta.”

Ti kinamapagtalkan dagiti tsart iti bituen ken dagiti horoscopes ipaganetgetna laeng ti kinasirib iti panangmatmat iti Namarsua a maipaay iti pannakaiwanwan ken saan a kadagiti bambanag a pinarsua. (Roma 1:24, 25) Nupay kasta, ti dakdakkel apay a rason iti panangliklik iti panangusar iti horoscopes a ta daytoy ti mabalin a mangiturong iti panangipaay iti panagdayaw “iti init wenno iti bulan wenno kadagiti amin a buyot iti langlangit, maysa a banag a saan nga imbilin ti [Dios].”​—Deuteronomio 17:2-5.

Awan ti Danum​—Awan ti Biag

Daytoy ti konklusion a nagtengan ni Propesor Norman H. Horowitz, maysa a sientista a naikameng iti 1965-76 Mariner and Viking a mision a mapan idiay Mars.

Iti librona a To Utopia and Back: The Search for Life in the Solar System, ni Propesor Horowitz napaliiwna a dagiti nasarakanna manipud kadagitoy a mision ti nalawag a nangrisot iti saludsod maipapan iti no adda biag idiay Mars wenno iti aniaman a planeta iti sistema solartayo. “Ti Mars,” kunana, “agkurang kadagiti ekstraordinario a kasasaad a nakaad-adu iti aglawlaw ti planetatayo, dagiti baybay iti likido a danum a naan-anay a masilnagan ti init.” Pinaneknekan dagiti panagsirarak ti kinakurang ti danum iti planeta.

Kalpasan ti panangikkat ti naannad a panageksperimento ti amin a posibilidad iti biag idiay Mars, immanamong ni Horowitz: “Ti kaawan ti masarakan a biag iti Mars ket makaupay, ngem dayta met ti maysa a paltiing. Agsipud ta ti Mars ti mainanama unay a pagnaedan ti biag iti ruar ti daga iti sistema solar, pudno a ti daga ti kakaisuna a planeta iti rehion ti galaksitayo nga addaan iti biag a planeta.”

Anian a maitutop nga, idi nagsurat maipapan iti daga, ti mammadto idi ugma a ni Isaias kinunana a ti Nangaramid iti dayta “inaramidna dayta a pagnaedan”! (Isaias 45:18) Nadakamat ti danum a nasaksakbay iti salaysay ti panamarsua iti Biblia. Nalawag, ti panangipaay iti danum sakbay ti panamarsua iti aniaman a naindagaan a biag ket nasken unay. Kas ti pinaneknekan dagiti mision a napan iti Mars: Iti ruar ti pagtaengan dagiti espiritu, no awan ti danum, awan ti agbiag.​—Genesis 1:1-10.

[Ladawan iti panid 7]

Ti awanan-biag a rabaw ti Mars, a mamatmatan manipud iti “Viking II” a lugan iti law-ang

[Credit Line]

NASA photo