19. Ania ti naimpusuan nga ipakpakaasi ni Jehova?

¹⁹ Nakasaysayaat ti pannakayebkas ti tarigagay ni Jehova a saan koma a madidigra ti ilina ken tagiragsakenda ti biag: “O no koma laeng pudno nga ipangagmo dagiti bilinko! Iti kasta ti talnam agbalin a kas iti maysa a karayan, ket ti kinalintegmo kas kadagiti dalluyon iti baybay.” (Isaias 48:18) Anian a naimpusuan a panagpakpakaasi ti mannakabalin-amin a Namarsua! (Deuteronomio 5:29; Salmo 81:13) Imbes a makautiboda, matagiragsak dagiti Israelita ti talna a kaslanto iti kawadwad ti danum nga agay-ayus iti karayan. (Salmo 119:165) Ti nalinteg nga ar-aramidda kaslanto iti kaadu ti di mabilang a daldalluyon ti baybay. (Amos 5:24) Yantangay pudno nga interesado unay ni Jehova kadakuada, agpakpakaasi kadagiti Israelita, a siaayat nga ipakitana kadakuada ti dalan a rumbeng a pagnaanda. Anian, no la koma ta mangipangagda!

21. Ania dagiti bendision a masagraptayo itatta no surotentay ti instruksion ni Jehova?

²¹ Agaplikar kadagiti agdaydayaw ken Jehova itatta dagiti prinsipio a linaon daytoy nabileg a mensahe. Ni Jehova ti Ubbog ti biag, ket isu ti ad-adda a makaammo no kasano ti rumbeng a panangusartay iti biagtayo. (Salmo 36:9) Impaayannatayo kadagiti pagalagadan, saan a tapno ipaidamna ti pagragsakantayo, no di ket tapno magunggonaantayo. Mangipangag dagiti pudno a Kristiano babaen ti panagpaisuroda ken Jehova. (Mikias 4:2) Dagiti bilinna ti mangsaluad iti espiritualidadtayo ken iti relasiontayo kenkuana, ken saluadandatayo maibusor iti rinuker nga impluensia ni Satanas. No matarusantayo dagiti prinsipio iti likudan dagiti linteg ti Dios, makitatayo nga isursuronatay ni Jehova iti pagimbagantayo. Maawatantayo a “dagiti bilinna saanda a makapadagsen.” Ket saantayto a madadael.​—1 Juan 2:17; 5:3.