Kunaenyonto Aya, “Adtoyak! Ibaonnak”?
“Kinuna ni Jehova: ‘Asino ti ibaonkonto, ken asino ti mapan a gapu kadakayo?’ Idin kinunak: ‘Adtoyak! Ibaonnak.’”—ISAIAS 6:8.
1, 2. Ania ti naisangsangayan a gapu iti kinaragsak iti maysa nga agassawa?
“MARAGSAKANKAMI a mangipatulod iti surat iti panangawatmi iti ipapanmi idiay Colombia. Tinagiragsakmi ti pribilehiomi a panagserbi ditoy Ecuador nga ad-adda pay ngem ti panangiladawan babaen iti daytoy a makinilia.” Kasta ti panangrugi ti surat manipud iti dua a Saksi ni Jehova a napan idiay Ecuador a sadiay maysa a baro a sanga nga opisina ti Watch Tower Society ti maibangbangon.
2 Dagitoy a ministro napanda idiay Ecuador tapno tumulong saan laeng nga iti panagibangon; makatulongda met kas Kristiano a mannursuro. Nagsuratda: “Nasarakanmi a ti panagserbi iti tay-ak isu ti maysa kadagiti kapapatgan a bambanag. Tallo a lawas laeng ti napalabas, walo kadakami ti napan iti silulukat a pagtagilakuan ket nakaipaimakami iti 73 a liblibro ken nasurok a 40 a magasin. Ti lawas sakbayna, nakairugikami iti dua a baro a panangiyadal iti Biblia. Pudno a makitami ti pannakasapul iti baro a sanga. Kayat koma ti asawak ken siak ti agyaman kadakayo iti pribilehio nga agtultuloy iti daytoy naisangsangayan a porma iti amin-tiempo a panagserbi” itan ditoy Colombia.
3. Kasano nga adu ti nangiparangarang iti espiritu nga umasping iti espiritu nga impakita ni Isaias?
3 Daytoy nga agassawa, ken ginasgasut a dadduma pay a nangitukon iti pannakaibaonda iti ganggannaet a pagilian, ti mangiparangarang iti espiritu nga umasping iti espiritu ni mammadto nga Isaias. Idi nangngegna ni Jehova a nagkuna: “Asino ti ibaonkonto, ken asino ti mapan a gapu kadatayo?” simmungbat ni Isaias: “Adtoyak! Ibaonnak.” Ket idin imbilin ti Dios: “Inka, ket ibagam kadagitoy a tattao, ‘Pudno a mangngegyo, ngem dikayo maawatan.’” (Isaias 6:8, 9) Maipaay iti ania ti pagbolboluntarioan ni Isaias a pakaibaonan, ket ania ti nagbanaganna? Ket ania ti maadaltayo manipud iti daytoy a salaysay no maipapan kadagiti moderno a katupagna ken iti aniaman a personal a leksiontayo?
Ti Pannakatuding ni Isaias a Mangasaba
4, 5. (a) Ania a kasasaad ti nasaknap idi inawat ni Isaias ti sirmata a nailanad iti kapitulo 6? (b) Ania ti nakita ni Isaias iti daytoy a sirmata?
4 Inimtuod ni Jehova a Dios ni Isaias, “Asino ti ibaonkonto” idi tawen ti ipapatay ni Ari Uzzias. (Isaias 6:1) Dayta ket idi 777 K.K.P., wenno agarup maysa a siglo ken tallo a kakapat iti maysa a siglo sakbay a dinadael dagiti taga Babilonia ti Jerusalem ken linangalangda ti daga ti Juda. Makita ni Jehova ti nakalkaldaang a kasasaad nga umayto, ket tinudinganna ni Isaias a mangipaay iti mensahe maipapan iti dayta. Ania ti maadaltayo manipud iti pannakatudingna a mangasaba?
5 Kas met koma iti panagriknatayo, mabalin a naawis ni Isaias iti kasta unay iti kasasaad idi nga inawatna ti pannakatudingna. Isut’ nagsurat: “Nakitak ni Jehova, a situtugaw iti maysa a trono a nangato ken natan-ok, ket ti gayadan ti kawesna pinunnona ti templo. Iti ngatona nagtakder dagiti serafin. Ti tunggal maysa adda innem a payakna, dagiti dua pangabbongna iti rupana, ket dagiti dua pangabbongna kadagiti sakana, ket dagiti dua pagtayabna. Ket nagiinnikkisda ti maysa ken maysa a kinunada: ‘Santo, santo, santo ni Jehova dagiti buybuyot. Ti isuamin a daga napno iti dayagna.’”—Isaias 6:1-3.
6. Apay a pribilehio ni Isaias ti makakita iti nakitana?
6 Ammo ni Isaias a ni Uzzias ti nakabil iti kukutel idi isu, gapu ta saan a nagtaud iti tribo dagiti papadi, sitatangsit a rinautna ti Nasantuan a templo nga agidaton iti insienso. Gapuna, anian a pribilehio para ken Isaias ti pannakabuya a mismo iti kaadda wenno presensia iti Dios! Ni Isaias, maysa nga imperpekto a tao, dina nakita a literal ni Jehova, ngem isut’ napalubosan a makakita Kenkuana iti maysa a sirmata. (Exodo 33:20-23) Ti kinatan-ok daytoy ket naipaganetget babaen kadagiti natatan-ok nga angheles (serafines) nga agserserbi idiay trono ni Jehova. Dagitoy, gapu iti pannakaammoda iti kinasanto ti Dios, siraraem nga abbonganda dagiti ‘ruprupada.’ Iti labes daytoy a tignay a panangilinged iti bagi, dagitoy ti sipupudno a mangiwaragawag iti kinasanto iti Dios. Ania ti mapanunotyo nga epekto amin daytoy iti maysa a tao?
7. Kasano ti panagtignay ni Isaias, ken apay a mabalin a nariknatayo met ti kasta?
7 Bay-antayo a sumungbat ni Isaias. “Idin kinunak: ‘Asiak pay! Ta madadaelak, agsipud ta taoak a narugit dagiti bibigna, ket makipagtaengak kadagiti tattao a narugit dagiti bibigda; ta dagiti matak nakitada ti Ari, a ni Jehova dagiti buybuyot!’” (Isaias 6:5) Ammo ni Isaias nga isu ti pannakangiwat ti Dios, kaskasdi daytoy a sirmata ti nangipamatmat kenkuana nga isu ket narugit, nga isu awanan iti nadalus a bibig a maitutop iti pannakangiwat daytoy a natan-ok unay ken nasantuan nga Ari. Dadduma met kadatayo, ti no dadduma mabalin a matignay babaen iti kinamanagbasoltayo, a mariknatayo a ditay maikari nga umadani iti Dios babaen iti kararag, a mariknatayo pay a ditay maikari a mangawit iti naganna. Ti dadduma pay a kapadasan ni Isaias, ngarud, ket makaparegta.
8. Inaramid ti anghel ti ania a serbisio, ken iti ania nga epekto?
8 Maysa kadagiti agserserbi a serafin ti timmayab a napan kenkuana nga addaan iti maysa a beggang nga innalana a sinipit idiay altar iti daton nga animal. Ket idi indeppelna iti ngiwat ni Isaias, kinuna ti anghel: “Adtoy! Daytoy dimmeppel kadagiti bibigmo, ket ti kinadakesmo naikkat ket ti basolmo napakawan.” (Isaias 6:6, 7) Idi kaaldawan ni Salomon, ti apuy manipud langit ti mangipaneknek a ni Jehova inawatna ti altar iti daton, nupay no dagiti datdaton saanda a naan-anay a mapagbalin uray dagiti papadi a nadalus iti imatang ti Dios. (2 Cronicas 7:1-3; Hebreo 10:1-4, 11) Kaskasdi, idi naikkat ti kinarugit ni Isaias babaen iti beggang, mabalinna nga awaten ti panangipato ni Jehova a ti kinamanagbasolna napakawan agingga iti kasapulan a pannakapakawanna tapno maawatna ti naisangsangayan a pannakatuding a mangasaba. Ania dagiti makapainteres a partaan nga isingasing daytoy maipapan iti masanguanan?
9. Ania ti kaipapanan ti mensahe ni Isaias?
9 Daytoy nakaskasdaaw a kapadasan ti nangiturong iti panangawat ti mammadto iti nadakamat a pannakatuding a mangasaba. (Isaias 6:8, 9) Ngem apay nga ibaga ni Isaias a maulit-ulit a dumngeg dagiti tattao ngem kaskasdi a dida makagun-od iti pannakaammo? Kuna pay ti timek ti Dios: “Palukmegenyo dagiti puspuso daytoy nga umili, ken padagsenenyo dagiti lapayagda, ken pagkidemenyo dagiti matada, di la ket ta makakitada . . . ken agbabawida ket mapasalun-atda.” (Isaias 6:10) Dayta kayatna kadi a sawen a ni Isaias, babaen iti kinaawan annad wenno kinaawan ti taktika, masapul nga iyadayuna dagiti Judio tapno agtalinaedda a makisuppiat ken Jehova? Saan. Daytoy ipamatmatna laeng no kasano ti panagtignay iti kaaduan kadagiti Judio kasano man ti kinamatalek ken kinasungdo ni Isaias a mangitungpal iti trabaho a panangasaba isu a nagboluntarioanna babaen iti panagkunana, “Adtoyak! Ibaonnak.”
10. (a) Sadino ti ayan ti biddut maipapan iti kasla kinabulsek ken kinatuleng dagiti tattao? (b) Ania ti kayat a sawen ni Isaias babaen iti panangimtuodna ti, “Kasano aya ti kabayagna?”
10 Ti biddut adda kadagiti tattao. Nupay pinalubosan ni Isaias iti “maulit-ulit a pannakangngegda,” dida kayat ti manggun-od iti pannakaammo wenno manggun-od iti pannakaawat. Immuna nga imbaga ti Dios a kaaduan kadakuada, gapu iti kinasukirda ken ti di naespirituan a kababalinda, saanda nga agtignay. Ti minoridad laeng kadakuada ti nagtignay. Ngem ti kaaduan ti kasla bulsek a kasla napigketan a nalaing dagiti matada, no mapanunotyo dayta. Kasanonto kabayag ti panagpaut daytoy dakes a kasasaad? Dayta, imbes a mano a tawen ti panagserbinanto, ti inimtuod ni Isaias kadagiti sasao a: “Kasano aya ti kabayagna, O Jehova?” Ket simmungbat ti Dios: “Agingga a marakrak dagiti il-ili, nga awan matagtagitao.” Ket kasta ti napasamak, nupay kalpasanen ti panagbiag ni Isaias. Dagiti taga Babilonia inyadayuna dagiti tattao, a binaybay-anda ti Juda a “narbek a nalangalang.”—Isaias 6:11, 12; 2 Ar-ari 25:1-26.
11. Kasano a ti panangasaba ni Isaias mangitukon iti panangliwliwa?
11 Kamaudiananna, nupay kasta, impanamnama ni Jehova ken Isaias a saan nga awan ti inanama ti isuamin. “Ket adda pay maysa nga apagkapullo [iti daga].” Wen, daytat’ ‘kas maysa a dakkel unay a kayo, a no mapukanda, ti puonda mabati, maysa a nasantuan a bin-i.’ (Isaias 6:13) Kalpasan ti 70 a tawen a pannakakayaw idiay Babilonia, maysa a bin-i, wenno natda, ti nagsubli iti daga, a kasla maysa a baro a saringit a timmubo iti puon iti dakkel unay a kayo. (2 Cronicas 36:22, 23; Esdras 1:1-4; idiligyo iti Job 14:7-9; Daniel 4:10, 13-15, 26.) Gapuna, nupay no makapaleddaang ti mensahe ni Isaias, daytat’ naglaon iti makaliwliwa a paset. Adda Nainkasuratan a rason, nupay kasta, a matmatantayo ni Isaias kas padron a maipaay iti masanguanan a paspasamak. Kasano a kasta?
Dakdakkel a Kaitungpalan
12. Ania a Nainkasuratan a pakaibatayan iti panangawag ken Jesus a ti Dakdakkel nga Isaias?
12 Adu a siglo kalpasan ti ipapatay ni Isaias, dimteng daydiay mabalin nga awagantayo a Dakdakkel nga Isaias—ni Jesu-Kristo. Iti panagbiagna sakbay ti panagbalinna a tao, isut’ nagboluntario nga imbaon ti Amana ditoy daga, a sadiay iramanna iti panangasabana dagiti bambanag nga insurat ni Isaias. (Proverbio 8:30, 31; Juan 3:17, 34; 5:36-38; 7:28; 8:42; Lucas 4:16-19; Isaias 61:1) Ket ti ad-adda pay a direkta, innaig ni Jesus ti bagina iti Isaias kapitulo 6 idi inlawlawagna no apay nga Isu ket kasta ti pamay-an ti panangisurona. (Mateo 13:10-15; Marcos 4:10-12; Lucas 8:9, 10) Maitutop dayta, ta kaaduan kadagiti Judio a nakangngeg ken propeta Isaias ti situtulok nga umawat iti mensahena ken agtignay iti dayta ngem kadagidiay a nakangngeg ken ni mammadto nga Isaias. (Juan 12:36-43) Kasta met, idi 70 K.P. dagiti Judio a namagbalin kadagiti bagbagida a ‘bulsek ken tuleng’ iti mensahe ni Jesus nadadaelda a kas met iti pannakadadael idi 607 K.K.P. Daytoy a pasamak idi immuna a siglo ket maysa a rigat iti Jerusalem a ‘nanipud idi punganay ti lubong agingga ita, awan pay kasta a napasamak ket awanto metten iti uray kaano.’ (Mateo 24:21) Kaskasdi, kas impadto ni Isaias maysa a natda, wenno “nasantuan a bin-i,” ti namati. Dagitoy ti nabukel a maysa a naespirituan a nasion, ti napulotan nga “Israel iti Dios.”—Galacia 6:16.
13. Apay a mabalin nga inanamaentayo pay ti sabali a kaitungpalan iti Isaias 6?
13 Daytoy ti mangiturong kadatayo iti sabali pay a naibatay iti Biblia a kaitungpalan iti Isaias kapitulo 6. Kas tulbek iti panangawat iti daytoy, usigenyo dagiti sasao ni apostol Pablo idi agarup 60 K.P. Inlawlawagna no apay nga adu kadagiti Judio a nakangngeg kenkuana idiay Roma ti di mangawat iti “pammaneknekna maipapan iti pagarian ti Dios.” Ti makagapu ket ti Isaias 6:9, 10 ti matungtungpal manen. (Aramid 28:17-27) Daytoy kadi kaipapananna a kalpasan ti ipapanaw ni Jesus ditoy daga, dagiti napulotan nga ad-adalanna masapul nga ibanagda ti maysa a komision wenno rebbengen a maipadis iti rebbengen ni Isaias? Wen, pudno a kasta!
14. Kasano a mangaramid dagiti ad-adalan ni Jesus iti trabaho a kas iti trabaho ni Isaias?
14 Sakbay ti iyuuli ti Dakdakkel nga Isaias idiay langit, kinunana a dagiti adalanna umawatdanto ti nasantuan nga espiritu ket kalpasanna “agbalindanto a saksi [kenkuana] agpada idiay Jerusalem ken iti isuamin a Judea ken Samaria ken agingga iti ungto ti daga.” (Aramid 1:8) No kasano a ti pagidatonan nga altar impaayna ti pakaibatayan iti pannakapukaw iti kinamanagbasol ni Isaias, kasta met ti daton ni Jesus ti pakaibatayan iti ‘pannakapakawan ti basol’ dagiti ad-adalanna. (Levitico 6:12, 13; Hebreo 10:5-10; 13:10-15) Gapuna, ti Dios mabalinna a pulotan ida iti nasantuan nga espiritu, isu a mangipaay kadakuada iti pannakabalin nga agbalin a ‘saksi agingga iti ungto ti daga.’ Agpadpada ni mammadto Isaias ken ti Dakdakkel nga Isaias a naibaon a mangiwaragawag iti mensahe ti Dios. Umasping iti dayta, dagiti napulotan a paspasurot ni Jesus ti “naibaon kas nagtaud iti Dios . . . nga agsao iti biang ni Kristo.”—2 Corinto 2:17.
15. Ania ti pangkaaduan a sungbat iti panangaskasaba a kas iti panangaskasaba ni Isaias iti tiempotayo, a mangitudtudo iti ania a masanguanan?
15 Iti moderno a tiempo, nangnangruna nanipud idi pagnguduan iti Gubat Sangalubongan I, dagiti napulotan a Kristiano nakitada iti pannakasapul iti panangiwaragawag iti mensahe ti Dios. Daytoy iramanna ti nainkalintegan a kinapudno a “ti aldaw ti ibabales iti Diostayo” ket asidegen. (Isaias 61:2) Ti pannakadadaelna ket maysa a danog nangnangruna iti Kakristianuan, a nabayagen nga agkunkuna nga ili iti Dios, a kas iti Israel idi ugma. Nupay adun a dekada iti nasungdo a panangaskasaba dagiti napulotan a saksi ti Dios, kaaduan iti Kakristianuan ti ‘nangpatangken kadagiti puspusoda ket dagiti laplapayagda ti saan a makangngeg; a dagiti matada ti nakakidem.’ Ipamatmat ti padto ni Isaias a daytoy ket agtultuloy a kastoy “agingga iti marakrak dagiti il-ili, nga awan ti matagtagitao, ken dagiti balbalay nga awan tattaoda, ken ti daga aglangalang a maikisap.” Daytoy tandaannanto ti panungpalan daytoy dakes a sistema dagiti bambanag.—Isaias 6:10-12.
“Ibaonnak”
16. Apay a mabalin a kunaen a ti “dakkel a bunggoy” ket makiramraman iti trabaho a kas iti trabaho ni Isaias?
16 Itatta, addada minilion a napasnek a Kristiano nga addaan iti naibatay iti Biblia a namnama nga agbiag nga agnanayon iti maysa a paraiso a daga. Maibatay iti naidaton a dara ni Jesus, daytoy a “dakkel a bunggoy” ket mabalin a mapakawan dagiti basbasolda agingga iti kasapulan. Mabalinda met ti umawat iti pannakabalin ken tulong babaen iti espiritu ti Dios bayat ti pannakikaduada iti natda kadagiti napulotan a Kristiano iti panagkuna, “Adtoyak! Ibaonnak.” Ibaon ida a mangaramid iti ania? Kuna ni Pablo idiay Roma 10:13-15: “‘Siasinoman nga umawagto iti nagan ni Jehova maisalakanto.’ Nupay kasta, kasanonto ngarud ti panangawagda iti daydiay dida pinati? Ket, kasano, ti panamatidanto iti daydiay dida nangnangngeg? Ket, kasanonto ti pannakangngegda, no awan ti mangaskasaba? Ket, kasano ti panangikaskasabadanto, no saandanto a maibaon? Kas adda a naisurat [idiay Isaias 52:7]: ‘Nagsayaat ketdin dagiti saksaka dagiti mangyeg kadagiti damdamag dagiti naimbag a bambanag!’”—Apocalipsis 7:9-15.
17. Maipadis iti padto ni Isaias, ania ti linaon iti mensahetayo?
17 Laglagipenyo a sakbay pay ti pannakaammona iti naan-anay a linaon ti mensahe a kinuna ni Isaias, “Adtoyak! Ibaonnak.” Maisupadi iti dayta, ammotayo no ania ti tarigagayan ti Dios a maiwaragawag itan babaen kadagidiay a nangawat iti awis nga: “Asino ti ibaonkonto, ken asino ti mapan a gapu kadatayo?” Dayta iramanna ti panangpakdaar maipapan “ti aldaw ti ibabales ti Diostayo.” Kaskasdi, ti mensahe iramanna met ti “naimbag a damag iti naimbag a bambanag.” Kas pangarigan, dagidiay a “naibaon” makiramanda iti panangiwaragawag iti “wayawaya kadagiti nakayawan ken ti pannakaluk-at kadagiti nabalud.” Saan kadi a ti panangaramid iti dayta ket gubuayan iti dakkel a pannakapnek?—Isaias 61:1, 2.
18, 19. Iti ania a naisangsangayan a pamay-an nga adu ti agkunkuna, “Ibaonnak”?
18 No mangiwarwaragawagkayon iti “naimbag a damag dagiti naimbag a bambanag,” daytoy a panangrepaso iti Isaias kapitulo 6 ti mabalin a mangtignay kadakayo nga agimtuod: Kasano ti mabalin a naan-anay nga isusungbatko a buyogen iti espiritu iti Isaias 6:8? Kas iti agassawa a nadakamat iti pangrugian, ginasgasuten ti nakiraman iti programa iti Internasional a Boluntario a Trabaho a Panagibangon. Adu a dadduma pay, nga awanan iti laing iti panagibangon, ti immakar kadagiti dagdaga a sadiay adda ti pakasapulan iti ad-adu pay a manangaskasaba iti Pagarian. Daytoy ti kasayaatan a naaramid kalpasan ti panangsapul iti balakad manipud iti sanga nga opisina iti Watch Tower Society. Siempre, nasken ti panagplano, ta ti pagsasao, ti kasasaad ti panagbiag, dagiti mainanama a pagtrabahuan, ken dagiti dadduma pay a bambanag ti mabalin a nakaro ti pannakaidumana iti ganggannaet a daga. Ngem, dikay ikkaten ti posibilidad gapu laeng ta kasapulan iti dakkel unay a panagbalbaliw. Adu nga addaan iti kababalin nga “Adtoyak! Ibaonnak” ti nangaramid kadagita nga addang ket sibabaknang a binendisionan ida ti Dios gapu iti panangaramidda iti kasta.—Idiligyo iti Proverbio 24:27; Lucas 14:28-30.
19 Ket dagiti dadduma pay—dagiti agwaywayas a kakabsat a lallaki ken babbai, agassawa, dagiti pay intero a pamilia—ti immakar iti sabali a lugar iti pagilianda met laeng wenno lugarda a sadiay adda ti dakdakkel a pakasapulan kadagiti manangaskasaba iti Pagarian wenno kadagiti Kristiano a manangaywan. (Aramid 16:9, 10) Ti panangaramid iti daytoy mabalin a sinapulna ti panangaramid iti adu a panagsakripisio, kas ti pananggun-od iti sabali a kita iti sekular a trabaho, nalabit maysa a basbassit ti maisueldona. Dadduma ti nangala iti nasapa a panagretiro nga addaan iti limitado a pension ket nangalada iti paset-tiempo a trabaho tapno maaddaanda iti ad-adu pay a tiempo iti ministerio. Anian a nagsayaatan no ti intero a pamilia kunaenna, “Adtoykami! Ibaondakami.” Daytoy, met, iparangarangna ti kasasaad ni Isaias. Ti asawana aktibo a nakiraman iti panangaramid iti pagayatan ti Dios kas mammadto, ket dagiti annakna a lallaki nairamanda met iti panagipadto.—Isaias 7:3, 14-17; 8:3, 4.
20. Babaen iti panangpanunot iti Isaias 6:8, ania ti masapul nga usigenyo?
20 Uray pay no ti agdama a kasasaadyo dina ipalubos ti kasta a dakkel a panagbalbaliw, mabalin nga usigenyo, ‘Ar-aramidek kadi ti amin a kabaelak iti ayanko, a tultuladek ti isusungbat ni Isaias?’ Ikagumaanyo nga iwaragawag ti mensahe ti Dios, uray pay iti dakes a panniempo wenno iti sidong ti di panangikankano ti publiko; pudno, kasta met ti inaramid ni Isaias. Agregtakayo a mangisao kadagiti dadduma maipapan iti “naimbag a damag dagiti naimbag a bambanag!” Kinuna ni Jehova, “Asino ti ibaonkonto?” Paneknekanyo a, kas ken ni Isaias idi ugma, ti sungbatyo ket, “Adtoyak! Ibaonnak” a mangiwaragawag iti mensahena.
Dagiti Punto Maipaay iti Repaso
◻ Kadagiti ania a kasasaad nga inawat ni Isaias ti sirmata iti Isa kapitulo 6, ket ania ti nakitana?
◻ Ania a kita ti komision ti inawat ni Isaias?
◻ Apay a mabalin a maawagan ni Jesus ti Dakdakkel nga Isaias, ken kasano a nairaman dagiti ad-adalanna iti trabaho a kas iti trabaho ni Isaias?
◻ Kasano a maiparangarangyo ti maysa nga espiritu a kas iti espiritu ni Isaias?
[Ladawan iti panid 17]
Nadalusan ni Isaias ken naibaon a mangasaba
[Ladawan iti panid 18]
Adu ti simmungbat, a kunkunada, “Adtoyak! Ibaonnak”