Pudno Kadi a Bigbigem ti Panangidaulo ni Kristo?
“Saankayo met a maawagan iti ‘papanguluen,’ ta ti Panguluenyo ket maymaysa, ni Kristo.”—MATEO 23:10.
1. Asino ti maymaysa a Pangulo dagiti pudno a Kristiano?
MARTES idi, Nisan 11. Tallo laengen nga aldaw, papatayendan ni Jesu-Kristo. Dayta ti maudi nga isasarungkarna iti templo. Iti dayta nga aldaw, insuro ni Jesus ti maysa a napateg a leksion kadagiti adalanna ken iti tallaong a naguummong sadiay. Kinunana: “Saankayo a maawagan iti Rabbi, ta maymaysa ti mannursuroyo, yantangay agkakabsatkayo amin. Mainayon pay, dikay naganen nga amayo ti asinoman ditoy daga, ta maymaysa ti Amayo, Daydiay nailangitan. Saankayo met a maawagan iti ‘papanguluen,’ ta ti Panguluenyo ket maymaysa, ni Kristo.” (Mateo 23:8-10) Nalawag a ni Jesu-Kristo ti Pangulo dagiti pudno a Kristiano.
2, 3. Ania ti epektona iti biagtayo no umimdengtayo ken ni Jehova ken bigbigentayo ti dinutokanna a Pangulo?
2 Anian a makagunggona iti biagtayo no bigbigentay ni Jesus kas ti pangulotayo! Kas pakauna iti iyaay daytoy a Pangulo, kinuna ni Jehova a Dios babaen ken propeta Isaias: “Ay dakayo, dakayo amin a mawaw! Umaykayo iti danum. Ken dagidiay nga awanan kuarta! Umaykayo, gumatang ken mangankayo. Wen, umaykayo, gumatangkayo iti arak ken gatas uray awan ti kuarta ken awan ti gatad. . . . Umimdengkayo a sipapasnek kaniak, ket kanenyo ti naimbag, ket iti mismo a kinalukmeg maragsakan koma iti napalalo ti kararuayo. . . . Adtoy! Kas maysa a saksi kadagiti nasional a bunggoy isu intedko, kas maysa a panguluen ken komandante kadagiti nasional a bunggoy.”—Isaias 55:1-4.
3 Nagusar ni Isaias kadagiti gagangay a likido—danum, gatas, ken arak—kas panangiladawan no kasano a maapektaran ti personal a biagtayo no umimdengtayo ken ni Jehova ken surotentayo ti Pangulo ken Komandante nga impaayna kadatayo. Makapagin-awa ti epektona. Kasla umin-inum iti sangabaso a nalamiis a danum iti nadagaang nga aldaw. Maep-ep ti wawtayo iti kinapudno ken kinalinteg. No kasano a ti gatas pakirdenna dagiti maladaga ken tumulong iti panagdakkelda, ‘ti gatas ti sao’ patibkerennatayo ken palagdaenna ti naespirituan a relasiontayo iti Dios. (1 Pedro 2:1-3) Ken asino ti makailibak a ti arak ket mangnayon iti kinaragsak kadagiti okasion? Umasping iti dayta, ‘narag-o latta’ ti biag no agdayawtayo iti pudno a Dios ken suroten ti addang ti dinutokanna a Pangulo. (Deuteronomio 16:15) Napateg ngarud nga amintayo—ubing wenno nataengan, lalaki wenno babai—ipakitatayo a bigbigentayo ti panangidaulo ni Kristo. Ngem kasano a maipakitatayo iti inaldaw a panagbiagtayo a ti Mesias ti Pangulotayo?
Agtutubo—‘Agtultuloykayo a Rumang-ay iti Kinasirib’
4. (a) Idi agtawen iti 12 ni Jesus, ania ti napasamak idi rinambakanda ti Paskua idiay templo ti Jerusalem? (b) Kasano kasirib ni Jesus uray idi agtawen pay laeng iti 12?
4 Usigenyo ti ulidan nga impasdek ti Pangulotayo kadagiti agtutubo. Nupay saan a detalyado ti salaysay ti kinaubing ni Jesus, makaisuro ti maysa a pasamak. Idi agtawen iti 12 ni Jesus, inkuyog dagiti dadakkelna iti tinawen a panangrambak iti Paskua sadi Jerusalem. Iti dayta nga okasion, naipanget ni Jesus iti maysa a diskusion maipapan iti Kasuratan, ket di nadlaw ti pamiliana a nabati idi nagawidda. Nagdanag dagiti dadakkelna, da Jose ken Maria. Kalpasan ti tallo nga aldaw, nasarakanda ni Jesus idiay templo, “a situtugaw iti tengnga dagiti mannursuro ken agim-imdeng kadakuada ken agsalsaludsod kadakuada.” Maysa pay, “amin dagidiay umim-imdeng kenkuana nagtultuloyda a masmasdaaw iti pannakaawatna ken kadagiti sungbatna.” Agasenyo, 12 la ti tawenna ngem saan laeng a mamagpanunot ken mainaig iti naespirituan a bambanag dagiti saludsod ni Jesus no di pay ket nangipaay kadagiti intelihente a sungbat! Awan duadua a nakatulong kenkuana ti panangsanay dagiti dadakkelna.—Lucas 2:41-50.
5. Kasano a maammuan dagiti agtutubo no ania ti panangmatmatda iti sangapamiliaan a panagadal iti Biblia?
5 Nalabit maysaka nga agtutubo. No naregta nga agserserbi iti Dios dagiti dadakkelmo, mabalin nga adda regular a panagadalyo iti Biblia kas pamilia. Ania ti panangmatmatmo iti panagadal ti pamiliayo? Apay a dimo utoben dagiti saludsod a kas iti: ‘Naimpusuan kadi a supsuportarak ti panagadalmi iti Biblia kas pamilia? Makidangdanggayak kadi iti dayta, a diak agaramid iti aniaman a mangdadael iti eskediulmi?’ (Filipos 3:16) ‘Siaaktibo kadi a makipaspasetak iti panagadal? No maitutop, agsalsaludsodak kadi maipapan iti material a maad-adal ken agkomento maipapan iti aplikasionna? Bayat a rumangrang-ayak iti naespirituan, patpatanorek kadi ti panagtarigagay kadagiti “nakired a taraon agpaay kadagiti nataengan a tattao”?’—Hebreo 5:13, 14.
6, 7. Kasano a makagunggona kadagiti agtutubo ti programa ti inaldaw a panagbasa iti Biblia?
6 Napateg met ti inaldaw a panagbasa iti Biblia. Nagkanta ti salmista: “Naragsak ti tao a saan a nagna iti pammatigmaan dagidiay nadangkes, . . . ngem ti pakaragsakanna adda iti linteg ni Jehova, ket iti lintegna agbasa iti nababa a timek iti aldaw ken rabii.” (Salmo 1:1, 2) Ni Josue, ti kasuno ni Moises, ‘binasana ti libro ti linteg iti nababa a timek iti aldaw ken rabii.’ Daytoy ti timmulong kenkuana nga agtignay a masirib ken mangitungpal iti impaannong ti Dios kenkuana. (Josue 1:8) Kinuna ni Jesu-Kristo, ti Pangulotayo: “Adda a naisurat, ‘Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.’” (Mateo 4:4) No kasapulantayo ti pisikal a taraon iti inaldaw, ad-adda a kasapulantayo ti regular a naespirituan a taraon!
7 Gapu ta nabigbigna ti naespirituan a kasapulanna, ti 13 ti tawenna a ni Nicole rinugianna a basaen ti Biblia iti inaldaw.a Ita ta agtawen iti 16, nabasanan ti intero a Biblia ket addan iti kagudua ti maikadua a daras. Simple laeng ti pamay-anna. “Ikagumaak ti agbasa uray maysa la a kapitulo iti kada aldaw,” kunana. Kasano a nakatulong kenkuana ti inaldaw a panagbasana iti Biblia? Kastoy ti kunana: “Agraira ti dakes nga impluensia ita. Makarit ti pammatik gapu ta inaldaw a masuotak idiay eskuelaan ken iti sadinoman. Ti inaldaw a panagbasa iti Biblia tulongannak a manglagip a dagus kadagiti bilin ken prinsipio ti Biblia a mangpabileg kaniak a mangdaer kadagitoy a suot. Kas resultana, mariknak a nasingsingedak ken Jehova ken ni Jesus.”
8. Ania ti nayugali nga aramiden ni Jesus idiay sinagoga, ket kasano a matulad dayta dagiti agtutubo?
8 Nayugali ni Jesus ti umimdeng ken makipaset iti panagbasa iti Kasuratan iti sinagoga. (Lucas 4:16; Aramid 15:21) Nagsayaat a tuladen dayta dagiti agtutubo babaen ti regular nga itatabunoda kadagiti Nakristianuan a gimong, a sadiay mabasa ken maadal ti Biblia! Kas ebkas ti apresasionna kadagita a gimong, kuna ti 14 ti tawenna a ni Richard: “Napateg kaniak dagiti gimong. Naynay a mapalagipanak sadiay no ania ti naimbag ken dakes, nasin-aw ken imoral, Nakristianuan ken di Nakristianuan. Diak kayat a padasen ti maisagmak iti kinadakes tapno laeng makasursuroak.” Wen, “ti pammalagip ni Jehova mapagpiaran, mamagsirib iti daydiay awanan kapadasan.” (Salmo 19:7) Pagregreggetan met ni Nicole a tabunuan ti amin a lima a gimong ti kongregasion kada lawas. Busbosenna pay ti dua agingga tallo nga oras nga agsagana kadagita.—Efeso 5:15, 16.
9. Kasano a ‘makapagtultuloy [dagiti agtutubo] a rumang-ay iti kinasirib’?
9 Nasayaat a gundaway ti kinaagtutubo tapno gun-oden ‘ti pannakaammo maipapan iti maymaysa a pudno a Dios, ken iti daydiay imbaonna, ni Jesu-Kristo.’ (Juan 17:3) Nalabit addada ammoyo nga agtutubo nga adu nga oras ti busbosenda nga agbasa kadagiti komiks, agbuya iti telebision, agay-ayam kadagiti video game, wenno agusioso iti Internet. Apay koma a tuladenyo ida no mabalin met a surotenyo ti perpekto nga ulidan ti Pangulotayo? Idi ubing pay, pagay-ayatna ti agadal maipapan ken Jehova. Ania ti resultana? Gapu ta ipategna dagiti naespirituan a bambanag, “ni Jesus nagtultuloy a rimmang-ay iti kinasirib.” (Lucas 2:52) Mabalinanyo met dayta.
“Agpasakupkayo iti Maysa ken Maysa”
10. Ania ti tumulong iti biag ti pamilia nga agbalin a gubuayan ti talna ken kinaragsak?
10 Ti pagtaengan ket mabalin a lugar ti talna ken pannakapnek wenno mabalin met a pagbabakalan ti ringgor ken rinnisiris. (Proverbio 21:19; 26:21) Ti panangbigbig ken Kristo kas ti pangulotayo ket mangyeg iti talna ken ragsak iti pamilia. Kinapudnona, ni Jesus ti mapagulidanan no mainaig iti relasion ti pamilia. Kuna ti Kasuratan: “Agpasakupkayo iti maysa ken maysa gapu iti buteng ken Kristo. Dagiti babbai agpasakupda koma kadagiti assawada a kas iti Apo, agsipud ta ti lalaki isu ti ulo ti asawana a kas met ti Kristo isu ti ulo ti kongregasion, yantangay isu ti manangisalakan iti daytoy a bagi. . . . Assawa a lallaki, itultuloyyo nga ayaten dagiti assawayo, no kasano a ti Kristo inayatna met ti kongregasion ken inyawatna ti bagina a maipaay iti dayta.” (Efeso 5:21-25) Nagsurat ni apostol Pablo iti kongregasion sadi Colosas: “Dakayo nga annak, agtulnogkayo kadagiti nagannakyo iti amin a banag, ta daytoy ket makaay-ayo unay iti Apo.”—Colosas 3:18-20.
11. Kasano a maipakita ti asawa a lalaki a bigbigenna ti panangidaulo ni Kristo?
11 Ti panangsurot iti daytoy a balakad kaipapananna nga idauluan ti lalaki ti pamiliana, sisusungdo a suportaran ti babai ti lakayna, ken agtulnog dagiti ubbing kadagiti dadakkelda. Ngem ti kinaulo ti lalaki ket mangyeg iti kinaragsak no umiso ti pannakausarna. Nasken a sursuruen ti masirib nga asawa a lalaki no kasano a watwatenna ti kinaulona babaen ti panangtuladna iti Ulo ken Pangulona, ni Kristo Jesus. (1 Corinto 11:3) Nupay nagbalin ni Jesus nga “ulo iti amin a bambanag iti kongregasion,” immay ditoy daga “saan a tapno pagserbian, no di ket tapno agserbi.” (Efeso 1:22; Mateo 20:28) Iti umasping a wagas, watwaten ti Kristiano a lalaki ti kinaulona, saan nga agpaay iti bukodna a pagimbagan, no di ket tapno maipaayna ti pagimbagan ti asawa ken annakna—wen, ti intero a pamiliana. (1 Corinto 13:4, 5) Ikagumaanna a tuladen dagiti nadiosan a galad ti ulona, ni Jesu-Kristo. Kas ken Jesus, naemma ken napakumbaba ti pusona. (Mateo 11:28-30) No agkamali, saanna a rigaten ti mangibaga iti “dispensarem” wenno “hustoka.” Gapu iti nasayaat nga ulidanna, nalaklaka para iti asawa a babai nga agbalin a “katulongan,” ‘komplimento,’ ken ‘kaasmang’ ti kasta a lalaki, a makasursuro ken ni lakayna ken makibinnulig kenkuana.—Genesis 2:20; Malakias 2:14.
12. Ania ti tumulong iti asawa a babai a mangraem iti prinsipio ti kinaulo?
12 No iti biang ti babai, nasken nga agpasakup ken ni lakayna. Ngem no agpaimpluensia iti espiritu ti lubong, mabalin a rugianna a pagduaduaan ti prinsipio ti kinaulo, ket saanto a makaay-ayo kenkuana ti panagpasakup iti lalaki. Saan nga ibaga ti Kasuratan nga agbalin a dominante ti lalaki, ngem kalikagumanna nga agpasakup dagiti babbai kadagiti assawada. (Efeso 5:24) Sigun iti Biblia, ti asawa a lalaki wenno ama ti manungsungbat para iti pamilia, ket mangyeg iti talna ken urnos iti pamilia no mayaplikar ti balakad ti Kasuratan.—Filipos 2:5.
13. Ania a panagpasakup ti inyulidan ni Jesus kadagiti annak?
13 Masapul nga agtulnog dagiti annak kadagiti dadakkelda. Nangipasdek ni Jesus iti nagsayaat nga ulidan iti daytoy a banag. Kalpasan ti napasamak idiay templo, idi tallo nga aldaw a nabati ti 12-años idi a ni Jesus, “simmalog a kadua [dagiti dadakkelna] ket dimteng idiay Nazaret, ket nagtultuloy a nagpasakup kadakuada.” (Lucas 2:51) Adda talna ken panagtutunos ti pamilia no agpasakup dagiti annak kadagiti dadakkelda. No amin a kameng ti pamilia ket sumurot iti panangidaulo ni Kristo, agbanagto dayta iti maysa a naragsak a pamilia.
14, 15. Ania ti tumulong kadatayo nga agballigi no maipasangotayo iti narikut a kasasaad iti pagtaengan? Mangted iti pagarigan.
14 Uray no rumsua dagiti narikut a kasasaad iti pagtaengan, ti tulbek ti balligi isu ti panangtulad ken ni Jesus ken panagpaiwanwan kenkuana. Kas pagarigan, ti panagasawa ti 35 ti tawenna a ni Jerry ken ni Lana, ina ti maysa nga agtutubo a balasang, ket nangyeg iti karit nga agpada a dida ninamnama. Kuna ni Jerry: “Ammok a tapno agbalinak a naballigi nga ulo, masapul nga iyaplikarko dagiti prinsipio ti Biblia a namagballigi iti dadduma a pamilia. Ngem di nagbayag, nabigbigko a masapul nga ad-adda nga agmasirib ken mannakaawatak bayat nga iyap-aplikarko dagita.” Matmatan ngamin ti siumanna a kasla pagsinsinaenna ida nga agina isu a masuron unay kenkuana. Kinasapulan ni Jerry ti pannakaawat tapno mabigbigna a dayta a sentimiento ti mangap-apektar iti sao ken aramid ti balasang. Kasanona a tinaming ti kasasaad? Simmungbat ni Jerry: “Napagnumuanmi ken Lana nga iti agdama, uray ni Lana pay laeng ti mangipaay iti disiplina kas nagannak bayat nga asikasuek no kasano a mapasayaat ti relasionko iti siumanko. Idi agangay, nagsayaat dagiti resultana.”
15 No maipasango kadagiti narikut a kasasaad iti pagtaengan, masapultayo ti pannakaawat tapno matarusantayo no ania ti adda iti likudan ti sao ken tignay dagiti kapamiliatayo. Kasapulantayo met ti sirib tapno mayaplikartayo a siuumiso dagiti nadiosan a prinsipio. Kas pagarigan, nalawag a naawatan ni Jesus no apay nga isut’ sinagid ti babai nga agbulos ti darana, ket nainsiriban ken siaasi a trinato ni Jesus ti babai. (Levitico 15:25-27; Marcos 5:30-34) Kadawyan a galad ti Pangulotayo ti sirib ken pannakaawat. (Proverbio 8:12) Naragsaktayo no agtignaytayo a kas kenkuana.
‘Itultuloymo a Sapulen nga Umuna ti Pagarian’
16. Ania koma ti ipangpangrunatayo iti biagtayo, ket kasano nga inyulidan daytoy ni Jesus?
16 Nalawag nga impakita ni Jesus no ania ti rumbeng nga ipangpangruna iti biag dagidiay mangbigbig iti kinaulona. Kinunana: “Itultuloyyo, ngarud, a sapulen nga umuna ti pagarian ken ti kinalinteg [ti Dios].” (Mateo 6:33) Ken babaen ti ulidanna, impakitana no kasano nga aramidentayo daytoy. Iti ngudo ti 40 nga aldaw a panagayunar, panagmennamenna, ken panagkararag kalpasan ti bautismona, naipasango ni Jesus iti pannulisog. Intukon kenkuana ni Satanas ti panagturay iti “amin a pagarian ti lubong.” Panunotenyo ti biag ni Jesus no inawatna koma ti intukon ti Diablo! Ngem desidido ni Kristo a mangaramid iti pagayatan ni Amana. Ken ammona nga ababa laeng ti biag iti lubong ni Satanas. Insigida a nagkedkedanna ti tukon ti Diablo, a kunkunana: “Adda a naisurat, ‘Ni Jehova a Diosmo ti masapul a daydayawem, ket kenkuana laeng ti masapul a pangipaayam ti sagrado a panagserbi.’” Di nagbayag kalpasanna, “rinugian ni Jesus ti nangaskasaba ket kunkunana: ‘Agbabawikayo, ta ti pagarian ti langlangit asidegen.’” (Mateo 4:2, 8-10, 17) Nanipud idin, inwaragawag ni Kristo ti Pagarian ti Dios iti amin a tiempo bayat ti kaaddana ditoy daga.
17. Kasano a maipakitatayo nga ipangpangrunatay iti biagtayo dagiti interes ti Pagarian?
17 Nasken a tuladentayo ti Pangulotayo ket ditay ipalubos ti lubong ni Satanas a manggargari kadatayo a mangipangpangruna iti biagtayo kadagiti trabaho wenno karera a nangato ti sueldo. (Marcos 1:17-21) Anian a kinamaag no matnagtayo iti silo dagiti nailubongan a kalat ket agbalin a segundario laengen dagiti interes ti Pagarian! Intalek kadatayo ni Jesus ti trabaho a panangikasaba iti Pagarian ken panagaramid iti adalan. (Mateo 24:14; 28:19, 20) Wen, mabalin nga adda rebbengentayo iti pamilia wenno iti dadduma a banag, ngem ditay kadi kayat nga usaren dagiti rabii ken ngudo ti lawas a mangitungpal iti Nakristianuan nga annongentayo a mangasaba ken mangisuro? Ken anian a makapabileg a kabayatan ti 2001 a tawen ti serbisio, agarup 780,000 ti nakapagserbi kas amin-tiempo a ministro, wenno payunir!
18. Ania ti tumulong kadatayo a makasarak iti rag-o iti ministerio?
18 Ipakita dagiti salaysay ti Ebanghelio a napartak nga agtignay ken mannakipagrikna ni Jesus. Apaman a nakitana ti naespirituan a kasapulan dagiti adda iti aglikmutna, naasian kadakuada ket sigagagar nga intukonna ti tulongna. (Marcos 6:31-34) Naragsak ti ministeriotayo no makiramramantayo iti dayta gapu iti panagayattayo iti sabsabali ken iti napudno a tarigagay a tulongan ida. Ngem kasano a mapatanortayo dayta a tarigagay? Kuna ti maysa nga agkabannuag nga agnagan Jayson: “Idi tin-edyerak, mapilpilitanak laeng a mangasaba.” Kasano a nasursurona nga ipateg daytoy a trabaho? Sumungbat ni Jayson: “Iti pamiliami, kanayon a mabusbos ti bigat ti Sabado iti panangasaba. Nasayaat ti epektona kaniak yantangay bayat nga ad-adda a nangasabaak, ad-adda a nakitak dagiti naimbag a resultana ket iti kasta, ad-adda a kayatko ti mangasaba.” Masapul met a regular ken siaanep a makiramantayo iti ministerio.
19. Ania koma ti determinasiontayo mainaig iti panangidaulo ni Kristo?
19 Talaga a makapagin-awa ken makagunggona no surotentayo ti panangidaulo ni Kristo. No aramidentayo dayta, rumang-ay ti pannakaammo ken kinasirib bayat ti panawen ti kinaagtutubo. Agbalin ti pamilia a gubuayan ti talna ken ragsak, ket ti ministerio agbalin a trabaho a mangyeg iti rag-o ken pannakapnek. Determinadotayo ngarud koma a mangipakita iti inaldaw a panagbiagtayo ken kadagiti desisiontayo a bigbigentay ti panangidaulo ni Kristo. (Colosas 3:23, 24) Ngem mangidadaulo ni Jesu-Kristo babaen ti maysa pay a pamay-an—ti kongregasion Kristiano. Salaysayen ti sumaruno nga artikulo no kasano a magunggonaantayo iti daytoy a probision.
[Footnote]
a Nabaliwan ti dadduma a nagan.
Malagipyo Kadi?
• Kasano a makagunggona kadatayo ti panangsurot iti dinutokan ti Dios a Pangulotayo?
• Kasano a maipakita dagiti agtutubo a kayatda a suroten ti panangidaulo ni Jesus?
• Ania ti epekto ti panangidaulo ni Kristo iti biag iti pamilia nga agpasakup iti dayta?
• Kasano a maipakita ti ministeriotayo a pudno a bigbigentayo ti panangidaulo ni Kristo?
[Dagiti Ladawan iti panid 9]
Ti panawen ti kinaagtutubo ket nasayaat a gundaway tapno gumun-od iti pannakaammo maipapan iti Dios ken iti nadutokan a Pangulotayo
[Ladawan iti panid 10]
Ti panagpasakup iti kinaulo ni Kristo parayrayenna ti kinaragsak ti pamilia
[Dagiti Ladawan iti panid 12]
Impangpangruna ni Jesus ti Pagarian. Kastakayo kadi?