Kas Kadagiti Kalapati nga Agtayab Kadagiti Apunda
DAGITI kalapati ket nalabit isuda dagiti immuna a billit a tinaraken ti tao. Rinibo a tawen ti napalabasen, dagiti Egipcio—nga agsagsagana iti makatawen nga abasto ti taraon—namangonda kadagiti apun ti kalapati iti asideg dagiti balayda. Ti karne dagiti billit ket kayatda unay, ken ti lugitda ket naaramat a ganagan. Kadagiti Edad Media, dagiti apun ti kalapati ket maap-apalan unay a sanikua nga iti dadduma a pagilian dagiti laeng nababaknang wenno papangulo ti relihion ti napalubosan nga agtagikua kadakuada.
Nupay dagiti manok nasukatanda itan kadagiti kalapati kas gubuayan ti karne iti ngangngani amin a panganan, dadduma a kadaanan nga apun dagiti kalapati ti makita pay laeng. Dagiti apun ti kalapati a nailadawan ditoy ket masarakan idiay Egipto.
Iti ragup a panagawidda iti rabii, maysa a reprep a billit ti agdisso iti pagapunan. Ni Hebreo a mammadto nga Isaias tinukoyna daytoy idi inyimtuodna: “Asinoda dagitoy nga agtayab kas ulep, ken kasla kalkalapati agturong kadagiti tawada?” Kas panangiyebkas ti sabali pay a patarus: “Asino dagitoy a sumungad kas ul-ulep, ken agtayab kas kalkalapati agturong kadagiti apunda?”—Isaias 60:8; The New English Bible.
Ti sungbat ket masarakan ita kadagiti ginasut a ribo a managbuteng-Dios a tattao nga agkamkamang iti organisasion ni Jehova. Kadagiti Kingdom Hall dagiti Saksi ni Jehova, maadalda ti agpannuray iti Dios. (Isaias 60:9) Iti ili ti Dios, matakuatanda a dagiti naespirituan a sursuro, sibibiag a pammati, ken makapasayaat a pannakikadua mangiburay ti rikna ti talna ken talged nga umasping iti daydiay masarakan ti kalapati iti apunna.
[Picture Credit Line iti panid 32]
Pictorial Archive (Near Eastern History) Est.