Kapitulo 8​—Sangalubongan a Kinatalged iti Sidong ti “Prinsipe ti Kappia”

Pannakiraman “iti Ragsak” ti “Prinsipe ti Kappia”

1. (a) Iti ania a rason a napan ti sabali a daga ti maysa a tao? (b) Ania ti isingasing ti pangngarig ni Jesus, nupay saan a naibaga a direkta?

ITI pangngarig ni Jesus maipapan kadagiti talento, ti tao nga addaan ti walo a pirak a talento di napan iti sabali a daga gapu laeng iti ragsak nga agbiahe a kumita kadagiti napipintas a buya. Isu ti addaan ti nainget a rason a mapan iti sabali a daga; tinarigagayanna ti makagun-od ti maysa a banag a napateg. Isu ti napan iti sabali a daga, kas ipakita ti pangngarig, tapno makagun-od iti “ragsak,” agraman ti “adu a bambanag.” (Mateo 25:21) Gapuna isu ti agdaliasat iti nakaad-adayo a makasapul iti nawatiwat a tiempo, tapno agaplikar iti daydiay makaipaay kenkuana iti dayta naisangsangayan a ragsak.

2. (a) Iti kaso ni Jesus, ania ti iladladawan daydiay tao a baknang a napan iti sabali a daga, ken iti siasino ti napananna? (b) Nagsubli ti Apo nga addaan ania?

² Yantangay daydiay tao a baknang iti pangngarig iladladawanna ni Jesu-Kristo, ti ipapan daydiay tao iti sabali a daga iti nawatiwat a panagdaliasat iladladawanna ti ipapan ni Jesus iti daydiay Gubuayan ti naisangsangayan a ragsak a matmatmatanna. Ngarud iti siasino ti napananna? Ibaga ti Hebreo 12:2 kadatayo: “A kitkitaentay ni Jesus, ti Kangrunaan nga Ahente ken Manangtungpal ti pammati. Isu a gapu iti rag-o a naikabil iti sanguananna inibturanna ti kayo a pagtutuokan, nga inwaksina ti bain, ket nagtugaw iti makanawan ti trono ti Dios.” Wen, pudno unay, ni Jehova a Dios ti Gubuayan dayta a ragsak. Kenkuana a napan ni Jesus, a pinanawanna dagiti matalek nga adalanna ditoy daga a nakaitalkan dagiti “talentona.” Nagsubli ti Apo nga addaan kadagiti “adu a bambanag” nga awan kenkuana idi nga inkumitna dagiti walo a pirak a talento kadagiti tallo nga ad-adipenna. Ti immun-una a pangngarig nga inted ni Jesus, ti pangngarig dagiti “sangapulo a mina,” ti nangipakita nga isut’ idi agsubli addaanen ti “naarian a pannakabalin.”​—Lucas 19:12-15.

3. Ania a kita ti panawen ti nangrugi a matungpal iti Zacarias 9:9 idi umuna a siglo K.P.?

³ No kaisasaadna pay laeng, addaan ti ari iti panagragsak, kasta met dagiti nasungdo nga iturayanna. Malagiptayo ti okasion idi a ti Anak ti Dios nagsakay a nagturong idiay Jerusalem tapno tungpalenna ti padto iti Zacarias 9:9. Maipapan iti kaitungpalan dayta a padto, adda a naisurat: “Ket kaaduanna kadagiti umariwekwek a tattao inyaplagda dagiti pagan-anayda iti dalan, ket dagiti dadduma nangputedda kadagiti sangsanga dagiti kaykayo ket inyaplagda ida iti dalan. Ket dagiti adu a tattao a magmagna iti masanguananna, ken dagiti simmurot impukkawda a kunkunada: ‘Hosana, iti Anak ni David! Bendito ti umay iti nagan ni Jehova! Hosana idiay kangatuan!’ Ket idi simrek ni Jesus idiay Jerusalem, amin ti siudad nariribuk, a kunkunada: ‘Siasino daytoy?’”​—Mateo 21:4-10; kitaenyo ti Lucas 19:36-38.

4. Kalpasan ti pannakaitronona kas Ari, apay a ni Jesu-Kristo addaan naisangsangayan a pangigapuan ti panangawis kadagiti matalek nga “ad-adipenna” iti naragsak a kasasaad?

⁴ Ngarud, no, daytat’ maysa a nagragsak nga okasion idi indatagna laeng ti bagina kadagiti umili iti Jerusalem kas daydiay pinulotan ti espiritu ni Jehova nga agpaay iti kinaari, anian a dakdakkelto pay ti ragsakyo inton isut’ aktual a maitronon kas Ari iti panagserra ti Panawen Gentil idi 1914? Daytat’ nakaragragsak unay nga okasion nga agpaay kenkuana. Ngarud, isu ti simrek pay laeng iti maysa a rag-o a nikaanoman dina pay napaspasaran idi. Iti pannakikuentaanna, maikunana ngarud kadagiti adalanna nga inkeddengna a “naimbag ken matalek”: “Napagtalkanka iti bassit. Isaadkanto nga agaywan iti adu. Makipagragsakka iti apom.” (Mateo 25:21) Adda itan ti maysa a baro a ragsak a mabalin a pakiramanan dagiti naanamongan nga “ad-adipenna.” Anian a gunggona!

5. (a) Ni apostol Pablo ket maysa nga ‘embahador’ ni Kristo iti ania tukad dagiti bambanag? (b) Ngem ita dagiti napulotan a natda ti “embahador” ni Kristo kalpasan ti ania a pasamak?

⁵ Idi 1919 dagiti napulotan nga ad-adalan ti agturturayen nga Ari, ni Jesu-Kristo, simrekda iti naanamongan a kasasaad, ket daytoy ti napakuyogan iti aglaplapusanan a ragsak. Sangapulo ket siam a siglo a nasapsapa nagsurat ni apostol Pablo kadagiti kapammatianna tapno ibaga kadakuada ti naitan-ok a saadda: “Datayo ngarud dagiti embahador iti biang ni Kristo.” (2 Corinto 5:20) Naisurat dayta idi ni Jesus ket maysa pay laeng a manamnama nga agtawid nga addaan namnama nga umawat “ti pagarian ti langlangit.” (Mateo 25:1) Gapuna, kasapulan ti panagtugawna iti kanawan ti Dios tapno urayenna sadiay ti aldaw ti inagurasion. Ngem itan, nanipud 1919, ti naanamongan a natda ket isudan dagiti “embahador” nga imbaon Daydiay aktual nga agturturayen kas Ari. (Hebreo 10:12, 13) Daytoy a kinapudno ti nangnangruna a naiyawag iti atension dagiti International Bible Students idiay Cedar Point, Ohio, a kumbension idi 1922.

6. Ti panagregget dagidiay immawat ti “talento” kalpasan ti gubat ti immuna a naiturong iti ania a kita ti trabaho?

⁶ Idi 1919 adda a naitalek kadakuadan ti katupag dagiti “talento” iti agturturayen nga Ari, ni Jesu-Kristo. Daytoy ti nangpadakkel iti sungsungbatanda iti agturturayen nga Arida. Manipud pangrugian, ti panagreggetda kalpasan ti gubat ti naiturong iti trabaho a “panagani,” ti panangurnong iti daydiay klase “trigo.” (Mateo 13:24-30) Yantangay, kas kinuna ni Jesus, ti panagani isu “ti panungpalan toy sistema dagiti bambanag,” ti tawen 1919 kalpasan ti gubat isu ti naikeddeng a tiempo a panangrugi daytoy a panagani ti kasla trigo nga “annak ti pagarian,” ti matalek a napulotan a natda.​—Mateo 13:37-39.

7. (a) Iti ania a kita ti panawen ti simrekan dagiti managani a kadua ti Apoda? (b) Iti ania a kasasaad ti nangiyegan ni Jehova kadagiti managani, ket ania a naimpadtuan a sasao ti innalada?

⁷ Ti panagani ket maysa a naragsak a tiempo nga agpaay kadagiti managani, ket ti Apo iti panagani makipagragsak iti dayta nga okasion kadakuada. (Salmo 126:6) Daytoy a panagani ti ad-adda a napabaknang babaen iti umad-adu a pammaneknek a ti Pagarian ti Dios babaen ken Jesu-Kristo ket naipasdeken kadagiti langlangit idi 1914 ket insublin ni Jehova ti nalinteg a takder iti dedikado nga ilina ditoy daga. Kas maysa a klase, innalada dagiti sasao ti Isaias 61:10: “Siak agragsakakto unay ken ni Jehova. Ti kararuak agrag-onto iti Diosko. Ta isu kinawesannak kadagiti pagan-anay ti pannakaisalakan; ket isu inabbongannak iti lambon ti kinalinteg.”

Panangurnong ti “Dakkel a Bunggoy” a Makiraman “iti Ragsak”

8. Ania a rag-o ti di pinadpadaanan dagiti napulotan a natda a pasetda iti panungpalan ti panangurnong kadagiti agtawid ti Pagarian?

⁸ Di pagaammo ti napulotan a natda a simrek “iti ragsak” ti Apoda iti panagpatingga iti panangurnong iti kaudian a miembro ti agtawid iti nailangitan a Pagarian nga addanto pay sabali a ragsak, banag a dida pinadpadaanan. Daytoy idi ti panangurnong iti maysa a naindagaan a klase nga agtaengto iti Paraiso a daga iti sidong ti Milenio a Panagturay ni Jesu-Kristo. Sino pay no di dagiti tattao manipud iti daytoy naindagaan a klase dagidiay maiyanatup a mangiyawis no ania ti umuna a nangipakaammo iti impormasion maipapan kadakuada?

9. Asinoda dagiti nangnangruna a naawis a tumabuno ti kumbension idiay Washington, D.C., idi 1935, ket ania a naintiempuan nga impormasion ti naipakaammo kadakuada?

⁹ Gapuna, kas sungbat iti awis a naipablaak iti The Watch Tower,a ginasgasut dagidiay agsapsapul ti pannakirelasionda ken ni Jehova, a kadua ti tattao nga addaan ti naganna, ti timmabuno iti pangkaaduan a kumbension dagiti Saksi ni Jehova idiay Washington, D.C., Mayo 30 ingganat’ Hunio 2, 1935. Iti dayta a kumbension natignayda aginggat’ kaungan ti puspusoda a maammuan a ti “dakkel a bunggoy” a nasirmata idiay Apocalipsis 7:9-17 ket isudat’ maysa a naindagaan a klase.

10, 11. Agpaay iti siasino idiay langit a napaneknekan daytoy a panawen ti naisangsangayan a panagrag-o?

¹⁰ Anian a nagdakkel a ragsak ti pannakaangay dayta a kumbension idiay Washington D.C., nga agpaay iti Kangatuan a Dios a ni Jehova! Anian a nagdakkel a ragsak dayta iti Anakna kas ti Naimbag a Pastor nga isu itan ti mangrugi a mangurnong kadagitoy “sabsabali a karnero” iti “maymaysa nga arban”!​—Juan 10:16.

¹¹ Bayat ti pannakaidadauloda ken pannakaipaspastorda, iti piguratibo a panagsao, dagiti kamkameng ti natda ken ti umad-adu a bilang ti “umariwekwek” dagiti “sabsabali a karnero” aglalaokda a sangsangkamaysa a sitatalna ken siayat. Ti puso ti “maymaysa a pastorda” ti mabalin nga agliplipiasen iti ragsak iti kaadda iti kasta a nagdakkelan nga “arban” iti asidegen a panagserra daytoy “panungpalan toy sistema dagiti bambanag.”

Dagiti Embiado ti “Prinsipe ti Kappia”

12, 13. (a) Sino dagiti naawis a makiraman a kadua ti napulotan a natda iti panagrag-o ti nagsubli nga Apo, ket ania ti rason nga agpaay iti daytoy? (b) Ti “dakkel a bunggoy” dagiti “sabsabali a karnero” sinerbianda dagiti intereses ti “Prinsipe ti Kappia” iti ania a kapasidad?

¹² Dagidiay kimmarnero a mangbukel ti “dakkel nga umariwekwek” addaandan ti dakkel a bingay iti ragsak ti Apo, ni Jesu-Kristo. Daytoy ti nangnangruna a maipagapu iti aktibo a pannakiramramanda iti panangiyeg kadagidiay kasapulan a mangkompleto iti “dakkel a bunggoy,” nga awan naited a bilangda iti Apocalipsis 7:9.

¹³ Ti trabaho a panangurnong a pakiramramanan dagiti “sabsabali a karnero” dimmanonen iti sangalubongan a kadakkelna, nga adda iti labes ti abilidad ti bumasbassit a bilang dagiti napulotan a natda nga aramiden. Gapuna, umad-adda met ti pannakasapul ti dumakdakkel a bilang dagiti “sabsabali a karnero” a maaddaan ti dakdakkel a pannakiraman iti panangiserrek pay laeng kadagiti ad-adu a “sabsabali a karnero” nga addaan naindagaan a namnama. Gapuna dagiti “sabsabali a karnero” agserserbida kas dagiti matalek nga embiado wenno pannakabagi ti “Prinsipe ti Kappia.” Innayon ti Proverbio 25:13: “Kas iti lammiis ti niebe iti panagani kasta ti matalek a baonen ti nangibaon kenkuana, a palammiisanna ti kararua dagiti appona.”

14. (a) Ania ti tinawid dagiti simboliko a karnero idiay pangngarig ni Jesus iti Mateo 25:31-46? (b) Kasano a ti Pagarian naisagana nga agpaay kadakuada “manipud pay pannakabangon ti lubong”?

¹⁴ Iti pangngarig dagiti karnero ken kalding, ti simboliko a karnero ket isu dagidiay nagkunaan ti Ari a ni Jesu-Kristo: “Umaykayo, bendito ni Amak, tawidenyo ti pagarian a naisagana kadakayo nanipud idi pannakabangon ti lubong.” (Mateo 25:31-46) Tawidendanto ti naindagaan a paset a pagturayento ti Pagarian dagiti langlangit bayat ti Milenio a panagturay ni Kristo. Nanipud iti tiempo ni matalek nga Abel, isagsagana ni Jehova daytoy a paset ti lubong iti nasubbot a sangatauan.​—Lucas 11:50, 51.

15, 16. (a) Ania a “dayag” ti ari, kas nasao ni Salomon, ti adda iti Apo itatta agpapan pay ti panagturayna iti tengnga dagiti kabkabusorna? (b) Iti ania a langa a ti agturturayen nga Ari ket addaan iti daytoy a “dayag” itatta? (c) Ania ti naaramidan dagidiay mangbukbukel iti daytoy a “dayag”?

¹⁵ Nagsurat ni masirib nga Ari Salomon iti kadaanan nga Israel: “Ti dayag ti ari adda iti kinaadu ti umili.” (Proverbio 14:28) Ti naarian nga Apo itatta, ni Kristo Jesus, nga isut’ opisial nga adayo a nangatngato ngem ni naindagaan nga Ari Salomon, ti addaan iti kasta a “dayag” maipapan iti “kinaadu ti umili.” Pudno daytoy uray pay ita sakbay ti panangrugi ti panagturayna iti sangaribo a tawen, wen, ta isu ti agturturay iti tengnga dagiti naindagaan a kabkabusorna, a ni Satanas a Diablo ti nabilbileg ngem tao a di makita nga arida.​—Mateo 4:8, 9; Lucas 4:5, 6.

¹⁶ Itatta ti “dayag” a maibagay iti nangato nga opisial nga addaan ranggo a kas ari ket makita itan iti dumakdakkel a bilang dagiti “sabsabali a karnerona” a mangbukel ti “dakkel nga umariwekwek.” Siraragsak ipukpukkawda a sangsangkamaysa: “Ti pannakaisalakan nagtaud iti Diostayo, nga agtugtugaw iti trono, ken iti Kordero.” (Apocalipsis 7:9, 10) Napasarandan ti pannakaisalakan manipud ti naikeddengen pannakadadaelna a sistema dagiti bambanag, a ni Satanas a Diablo “ti diosna.” (2 Corinto 4:4) Iti piguratibo a panagsao, “linabaanda dagiti pagan-anayda . . . iti dara ti Kordero” ket pinapudawda ida tapno daytat’ agparang nga awan tulawna ken Jehova a Dios, nga isu ti Ukom.​—Apocalipsis 7:14.

17. (a) Iti ania a pannakaisalakan ti matmatmatan pay ti “dakkel a bunggoy” iti masanguanan? (b) Anianto a pribilehio ti tagiragsakenda bayat ti Milenio a Panagturay ti “Prinsipe ti Kappia”?

¹⁷ Kaskasdi kumitkitada pay iti masanguanan iti nasantuan pannakaipaayna a pannakaisalakan a lak-amendanto inton makabalangat a panagballigi ni Jehova iti “gubat ti dakkel nga aldaw ti Dios a Mannakabalin-amin” inton Har-Magedon. Ti naranga a panagballigina sadiay ti mangibunganto ti pannakaaramat ti sapasap a kinaturayna, ket isudanto dagiti naindagaan a saksi a makaimatang iti dayta gaput’ pannakaispalda a sibibiag a makalasat iti dayta a nakaal-alingget a panungpalan daytoy dakes a lubong. (Apocalipsis 16:14; 2 Pedro 3:12) Anian a nagsudi a pribilehio! Anian a nagdakkel a rag-o ti iranudto ti “Prinsipe ti Kappia” a kadua dagiti makalasat a “dakkel nga umariwekwek” dagiti nasungdo a “sabsabali a karnerona”!

[Dagiti Footnote]