Ti Natarnaw a Nasion
“Luktanyo dagiti ruangan . . . tapno makastrek ti nalinteg a nasion a mangsalsalimetmet iti matalek a kababalin.”—ISAIAS 26:2.
1. Apay a mabalin a makapasiddaaw ti sasao ni Isaias maipapan iti maysa a “nalinteg a nasion”?
ITI kaaldawantayo, adda amin a kita ti nasion. Adda demokrasia, adda diktadura. Nabaknang dagiti dadduma, napanglaw dagiti sabali. Ngem adda pagpapadaanda: Paset ida amin ti lubong a ni Satanas ti diosna. (2 Corinto 4:4) Gapu itoy, mabalin a masdaaw dagiti dadduma iti sasao ni Isaias idi a kinunana: “Luktanyo dagiti ruangan, dakayo a lallaki, tapno makastrek ti nalinteg a nasion a mangsalsalimetmet iti matalek a kababalin.” (Isaias 26:2) Nalinteg a nasion? Wen, adda maysa a nalinteg a nasion tangay tuktukoyen ti padto ti kaadda daytoy iti kaaldawantayo. Kasano a mailasin daytoy naisangsangayan a nasion?
2. Ania ti “nalinteg a nasion”? Kasanotay nga ammo?
2 Iti pannakaipatarus ti Isaias 26:2 iti New World Translation, naikuna a ‘salsalimetmetan [dayta a nasion] ti matalek a kababalin.’ Iti King James Version (margin), kastoy ti pannakaipatarus dayta a bersikulo, “ti nalinteg a nasion a mangsalsalimetmet iti kinapudno.” Agpada a maitutop dagitoy a panangiladawan. Kinapudnona, nalaka a mailasin ti nalinteg a nasion agsipud ta isu dayta ti kakaisuna a nasion iti rabaw ti daga nga agpaspasakup ken ni Kristo nga Ari, ngarud, saan a paset ti lubong ni Satanas. (Juan 17:16) Gapu ta kasta, agdindinamag dagiti kamengna gapu iti ‘panangtaginayonda iti nasayaat a kababalin iti tengnga dagiti nasion.’ Sursurotenda ti wagas ti panagbiag a pakaidayawan ti Dios. (1 Pedro 2:12) Maysa pay, sadinoman ti yanda iti lubong, paset ida “ti kongregasion ti sibibiag a Dios, maysa nga adigi ken sadiri ti kinapudno.” (1 Timoteo 3:15) Kas panangsuportar iti kinapudno, laksidenda dagiti pinapagano a pilosopia nga isursuro ti Kakristianuan, ken itantandudoda ti “awan lalaokna a gatas a kukua ti sao”—ti Sao ti Dios, ti Biblia. (1 Pedro 2:2) Kanayonanna, sireregta nga ikaskasabada ti naimbag a damag ti Pagarian “kadagiti isuamin a parsua nga adda iti baba ti langit.” (Colosas 1:23) Mapagduaduaan kadi a daytoy a nasion ket buklen ti natda iti “Israel ti Dios,” ti kongregasion dagiti napulotan a Kristiano? Saan a pulos!—Galacia 6:16.
Naipasngay ti Nasion
3. Iladawanyo no kasano a naipasngay ti “nalinteg a nasion.”
3 Kaano a naipasngay “ti nalinteg a nasion”? Naipadto ti panangrugi daytoy iti libro ni Isaias. Idiay Isaias 66:7, 8, mabasatayo: “Iti sakbay ti panagpasikalna [ti Sion], nagpasngay. Iti sakbay ti yaay ti tuokna, nangipasngay iti anak a lalaki. . . . Apaman a ti Sion nagpasikal, isu impasngayna dagiti annakna.” Naisangsangayan unay, mangipasngay ti Sion, ti nailangitan nga organisasion ti Dios, iti “anak a lalaki” sakbay ti panagpasikalna. Idi 1914, naipasdek ti Mesianiko a Pagarian iti langlangit. (Apocalipsis 12:5) Kalpasan dayta, immadu dagiti nasion a nairaman iti umuna a sangalubongan a gubat, ket nagsagaba iti nakaro a rigat ken pannakaidadanes dagiti napulotan a Kristiano. Kamaudiananna, idi tawen 1919, naipasngay iti rabaw ti daga ti naespirituan a nasion, ti “anak a lalaki.” Iti kasta, ‘impasngay [ti Sion] dagiti annakna a lallaki’—dagiti napulotan a kamkameng ti baro a “nalinteg a nasion”—ket naorganisar dagitoy maipaay iti trabaho a panangsaksi nga agtultuloy a sumaksaknap.—Mateo 24:3, 7, 8, 14; 1 Pedro 2:9.
4. Apay a nasken nga ikarigatan ti nalinteg a nasion ti Dios a salimetmetan ti kinatarnawna?
4 Sipud panangrugina, maipaspasango daytoy a nasion kadagiti nakaro a pakasuotan ti kinatarnawna. Apay? Idi naipasngay ti nailangitan a Pagarian, napaksiat ni Satanas ken dagiti demoniona manipud langit ket naitappuakda iti daga. Inwaragawag ti natbag a timek: “Ita napasamaken ti pannakaisalakan ken ti pannakabalin ken ti pagarian ti Diostayo ken ti kinaturay ni Kristona, agsipud ta ti manangidarum kadagiti kakabsattayo naitappuaken, isu a mangidardarum kadakuada iti aldaw ken rabii iti sanguanan ti Diostayo! Ket isu pinarmekda gapu iti dara ti Kordero ken gapu iti sao ti panangsaksida, ket dida inayat dagiti kararuada uray pay iti sango ni patay.” Kasta unay ti pungtot ni Satanas iti daytoy a panagbalbaliw dagiti kasasaad “ket napan nakigubat kadagiti natda ti bin-ina [ti babai], isuda a mangtungtungpal kadagiti bilin ti Dios ken addaan iti trabaho a panangsaksi ken Jesus.” Iti sango ti nadawel nga iraraut ni Satanas, nagtalinaed dagiti napulotan a Kristiano a natibker. Agpapan kadagitoy nga aldaw, al-alagaden dagiti naregta a kameng ti nalinteg a nasion ti Dios ti pammati iti makasubbot a dara ni Jesus ken agtultuloy nga ipapaayanda ni Jehova iti sungbat iti karit ti dakkel a manangumsi babaen ti panagtalinaedda a natarnaw “uray pay iti sango ni patay.”—Apocalipsis 12:1, 5, 9-12, 17; Proverbio 27:11.
5. Ania a nasayaat a kababalin dagiti Saksi iti agdama a panawen ti nakatulong kadakuada nga agtalinaed a natarnaw?
5 Idi 1919, idi a nairusat ti pannakaikaskasaba ti Pagarian ti Dios iti agdama a panawen, manmano ngem natibker ti pammati dagiti Estudiante ti Biblia, kas pannakaawag idi kadagiti Saksi ni Jehova. Isuda ti nagbalin a pundasion a kameng ti ‘maysa nga ili a nalagda, a nabakudan ken nasarikedkedan iti pannakaisalakan.’ Nagtalekda ken “ni Jah Jehova [a] Bato nga agnanayon.” (Isaias 26:1, 3, 4) Kas ken Moises idi ugma, inwaragawagda: “Ti nagan ni Jehova yawagkonto. Ipakumityo ti kinadakkel iti Diostayo! Ti Bato, naan-anay ti aramidna, ta amin a dalanna kinahustisia. Maysa a Dios ti kinamatalek, a kenkuana awan ti kinakillo; isu awan pagkuranganna ken nalinteg.”—Deuteronomio 32:3, 4.
6. Iti ania a pamay-an a pinaraburan ni Jehova ti ilina kadagitoy maudi nga al-aldaw?
6 Manipud idin, nagtalinaed a silulukat dagiti ruangan ti urnos ti Pagarian ti Dios bayat ti pannakaurnong nga umuna ti natda kadagiti 144,000 a napulotan a Kristiano ket ita tumiptipon ti maysa a dakkel a bunggoy ti “sabsabali a karnero” iti panangiwaragawag kadagiti panggep ti Pagarian ni Jehova. (Juan 10:16) Gapuna, maikunatayo a sirarag-o: “Pinadakkelmo ti nasion; O Jehova, pinadakkelmo ti nasion; intan-okmo ti bagim. Pinalawam amin a beddeng ti daga.” (Isaias 26:15) No sukimatentayo ti sangalubongan a tay-ak itatta, makitatayo a pudno unay dagidiay a sasao! Babaen ti bileg ti nasantuan nga espiritu, naikaskasaban ti um-umay a Pagarian ni Kristo “agingga iti kaadaywan a paset ti daga.” (Aramid 1:8) Marukod ti kalawa dayta a panagsaknap iti Report ti 1994 a Tawen Serbisio Dagiti Saksi ni Jehova iti Sangalubongan, nga agparang iti pinanid 12 agingga iti 15.
Baro a Kangatuan a Bilang Dagiti Agibumbunannag
7, 8. (a) Aniat’ mangipaneknek a ‘pinaatiddog [ti ili ti Dios] dagiti lubid ti toldada’? (b) No kitaenyo ti Report ti 1994 a Tawen Serbisio, ania dagiti lugar a makitayo a ‘mangpalpalawa kadagiti beddengda’ iti naisangsangayan a pamay-an?
7 Usigenyo ti sumagmamano a tampok daytoy a report. Dimmanon iti 4,914,094 ti kangatuan a bilang dagiti agibumbunannag ti Pagarian! Anian a makaparagsak a makita ti agtultuloy a pannakaurnong ti “dakkel a bunggoy . . . manipud kadagiti isuamin a nasion ken kadagiti tribo ken kadagiti il-ili ken kadagiti pagsasao, a sitatakderda iti sanguanan ti trono ken iti sanguanan ti Kordero, a sikakawesda kadagiti puraw a pagan-anay”! Wen, napaneknekan a natarnaw met dagitoy. “Linabaanda dagiti pagan-anayda ket pinapudawda ida iti dara ti Kordero,” a maibilangda a nalinteg gaput’ panangalagadda iti pammati iti daton a subbot ni Jesus.—Apocalipsis 7:9, 14.
8 Nangruna manipud idi 1919, mayaw-awag iti organisasion ni Jehova: “Padakkelem ti disso ti toldam. Ket pabistradmo kadakuada dagiti bengbeng ti naindaklan a tabernakulom. Dika medmedan. Paatiddogem dagiti lubid ti toldam, ken patibkerem dagiti pasokmo.” (Isaias 54:2) Kas sungbat, sipipinget nga agtultuloy ti trabaho a panangasaba, uray idiay nayelo a Yukon, iti beddeng ti Alaska, a sadiay ib-ibturan ti maysa a grupo dagiti naandur a payunir ti temperatura a mabalin a bumaba agingga iti -45 wenno -50 degrees Celsius iti las-ud ti sumagmamano a lawas iti tunggal gundaway. Kadagitoy kallabes a tawen, umadu la nga umadu dagiti tattao a tumiptipon iti natarnaw a nasion ni Jehova. Limmawa ti pannakailukat dagiti ruangan tapno makastrek dagitoy manipud kadagiti pagilian ti Asia iti ruar ti Kakristianuan, manipud kadagiti sigud a Komunista a lugar, manipud iti adu a pagilian ti Africa, ken manipud kadagiti Katoliko a pagilian, kas iti Italia, España, Portugal, ken Makin-abagatan nga America. Manipud kadagiti naiwarwaras a tattao, naluktan ti sabali pay a tay-ak. Kas pagarigan, idiay Inglaterra, as-asikasuen dagiti Saksi ti kasapulan dagiti 13 a ganggannaet-pagsasaona nga etniko a grupo.
“Itultuloyyo nga Aramiden Daytoy”
9. (a) Aniat’ ipasimudaag ti bilang dagiti timmabuno iti Panglaglagip idi 1994? (b) Ania dagiti dadduma a pagilian nga addaan iti nangato a bilang ti timmabuno iti Panglaglagip?
9 Ti maysa pay a tampok iti tinawen a report isu ti bilang ti timmabuno iti Panglaglagip. Sakbay la unay ti ipapatayna, inyussuat ni Jesus ti Panglaglagip iti ipapatayna ket kinunana kadagiti pasurotna: “Itultuloyyo nga aramiden daytoy kas panglaglagip kaniak.” (1 Corinto 11:24) Makaparagsak a makita idi 1994 ti 12,288,917—nasurok a mamindua a nangatngato ngem ti bilang dagiti aktibo nga agibumbunannag—a naguummong tapno tungpalenda dayta a bilin, kas mannakiraman man wenno managpaliiw. Iti dadduma a pagilian, nangatngato pay ti bilang ti timmabuno iti Panglaglagip ngem ti bilang dagiti agibumbunannag. Naragsakan dagiti 4,049 nga agibumbunannag idiay Estonia, Latvia, ken Lithuania a naaddaan iti 12,876 a timmabuno iti Panglaglagip, nasurok a mamitlo a nangatngato ngem ti bilang dagiti agibumbunannag. Ket idiay Benin, 16,786 ti timmabuno iti Panglaglagip, a dandani maminlima a nangatngato ngem ti bilang dagiti agibumbunannag. Iti maysa a kongregasion nga addaan 45 nga agibumbunannag, 831 ti timmabuno!
10. (a) Ania a responsabilidad ti ipabaklay kadatayo ti nangato a bilang ti timmabuno iti Panglaglagip? (b) Iladawanyo ti mabalin a mapasamak no makaawat iti kanayonan a tulong ti maysa a timmabuno iti Panglaglagip.
10 Maragsakan dagiti Saksi ni Jehova ta nakaad-adu dagiti interesado a tattao a nakipagummong kadakuada iti dayta nagsayaat nga okasion. Ita, kayatda a tulongan dagitoy a rumang-ay pay iti pannakaawat ken panagayatda iti kinapudno. Mabalin nga agtignay dagiti dadduma a kas iti inaramid ni Alla idiay Russia. Makipagad-adal idi ni Alla iti maysa a kabsat a babai nga special pioneer ngem saan unay a narang-ay, isu a naisardeng ti panagadal. Nupay kasta, pinatgan ni Alla ti awis a tumabuno iti Panglaglagip. Dakkel ti epekto kenkuana dayta a nagpateg a panagtataripnong. Idi sumangpet iti pagtaenganna, imbellengna amin nga imahenna ket immararaw iti tulong ken ni Jehova. Kalpasan ti dua nga aldaw, sinarungkaran ti kabsat a payunir ni Alla tapno komustaen no tinagiragsakna met laeng ti Panglaglagip. Nabunga ti panagsaritada. Nairugi manen ni panagadal ni Alla. Iti saan a nabayag, mangaskasaban. Ipakita daytoy a kapadasan ti kinapateg ti isasarungkar kadagidiay timmabuno iti Panglaglagip. Adu ti mabalin nga agtignay met a kas ken Alla.
“Saantay a Baybay-an ti Panagtataripnongtayo a Sangsangkamaysa”
11-13. (a) Aniat’ ramanen ti matalek a kababalin ti nalinteg a nasion? (b) Apay nasken a tumabuno dagiti pudno a Kristiano kadagiti gimong?
11 Ti Panglaglagip ket isu ti kapatgan a taripnong iti kalendario dagiti Saksi ni Jehova, ngem saan la a dayta. Linawas nga aguummong dagiti Saksi ni Jehova kas panagtulnog iti sasao ni apostol Pablo: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian dagiti sumagmamano, no di ket agpipinnaregtatayo iti maysa ken maysa, ket nangnangruna a kasta bayat a makitkitayo a ti aldaw umas-asidegen.” (Hebreo 10:24, 25) Naitimpuyogda iti nalinteg a nasion ni Jehova a mailasin babaen ti matalek a kababalinna. Ti matalek a kababalin ramanenna ti simamatalek nga itatabuno kadagiti gimong.
12 Nalawag a daytoy ket maawatan a naimbag [dagiti Saksi] iti Pilipinas, a no sadino ti promedio a bilang dagiti tumabtabuno kadagiti gimong iti Domingo ket 125 porsiento ti bilang dagiti agibumbunannag. Dayta ket maawatan met a naimbag ti maysa a grupo dagiti Saksi ken interesado a tattao idiay Argentina. Ag-20 kilometro ti kaadayo ti pagnanaedanda manipud iti Kingdom Hall. Nupay kasta, impadamag ti manangaywan ti sirkito a malaksid no adda masakit, awan a pulos kadakuada ti lumangan kadagiti gimong. Uppat nga orasda nga agdaliasat a nakakalesa wenno sisasakay iti kabalio, ket iti tiempo ti lam-ek marabrabiyanda nga agawid.
13 Bayat nga umas-asideg ti panungpalan daytoy a sistema, rumigat la a rumigat ti panagbiag, umadu dagiti parikut, ket nalabit agbalin a maysa a karit ti itatabuno a kanayon kadagiti gimong. Ngem iti sidong ti kakasta a kasasaad, ad-adda a kasapulantayo ti naespirituan a taraon ken nabara a panagtitimpuyog a masarakan laeng iti kakasta a panagtataripnong.
“Naganetgetka Koma iti Dayta”
14. Apay a sigaganat nga itungtungpal dagiti Saksi ni Jehova ti ministerioda, ket ania dagiti resulta a mangipakita iti daytoy?
14 Idi napan a tawen, tinukoy ti Iglesia Katolika idiay Italia ti trabaho dagiti Saksi ni Jehova kas “nadawel a panangkumberte.” Nupay kasta, iti kinaagpaysona, awan a pulos ti kinadawel iti ar-aramiden dagiti Saksi. Ngem ketdi, ti ministerioda ket maysa nga ebkas ti nasged a panagayat kadagiti kaarrubada. Maysa met dayta a pammaneknek ti panagtulnog iti sasao ni Pablo: “Ikasabam ti sao, naganetgetka koma iti dayta iti mainugot a panawen, iti nariribuk a panawen.” (2 Timoteo 4:2) Ti pannakarikna iti kinaganat ti mangtigtignay kadagiti Saksi ni Jehova nga agbalin a naregta iti ministerioda, kas makita iti panangbusbosda iti 1,096,065,354 nga oras idi 1994 iti panangaskasaba kadagiti kaarrubada, panagsarungkar, ken panangidaulo iti 4,701,357 a panagadal iti Biblia. Adu ti nakapagserbi kas payunir, a mangipakita a nabiag ken agtigtignay ti espiritu ti panagpayunir. Ti promedio a 636,202 a payunir iti intero a lubong ti mangipaneknek iti daytoy.
15, 16. (a) Kasano nga iparparangarang agpadpada dagiti agtutubo ken natataengan ti espiritu ti panagpayunir? (b) Iti panangusigyo iti tunggal pagilian iti Report ti 1994 a Tawen Serbisio, sadinot’ pakakitaanyo iti naisangsangayan a bilang dagiti payunir?
15 Adu kadagitoy a payunir ti agtutubo. Idiay Estados Unidos, agserserbin dagiti dadduma kas regular pioneer bayat nga addada iti haiskul, ket ti eskuelaanda ti kangrunaan a teritoriada. Nasarakan dagitoy nga agtutubo a ti panagpayunir ti kasayaatan a pangsalaknibda iti bagbagida manipud iti droga, imoralidad, ken kinaranggas nga agraraira kadagiti adu nga eskuelaan iti dayta a daga. Adu a dadduma pay nga agtutubo ti nangikeddeng iti panagpayunir kas kalatda no malpas ti panageskuelada. Idiay Ukraine, nag-auxiliary pioneer ni Irina bayat nga adda iti haiskul tapno makapagsagana para iti panagpayunir kalpasan ti panagturposna. Idi nalpasen ti panageskuelana, impanamnama ti pamiliana a tumulongda iti pinansial a pakasapsapulanna tapno mairepresentarna ida iti panag-regular pioneer. No maipapan iti kasasaad ti panagbiag, saan a nalaka dagiti bambanag idiay Ukraine. Ngem kuna ni Irina: “Ammok a biag ti kaipapanan ti ar-aramidek saan laeng nga agpaay kaniak no di pay ket kadagiti kaskasabaak.” Pudno a makaay-ayo a makita dagiti nakaad-adu nga agtutubo itatta nga addaan iti panagpampanunot a kas ken Irina. Adda kadi pay nasaysayaat ngem ti ‘pananglaglagipda iti Naindaklan a Namarsua kadakuada iti al-aldaw ti kinaagtutuboda’?—Eclesiastes 12:1.
16 Adu kadagiti payunir ti lallakay ken babbaketen. Impadamag ti maysa [a payunir] nga idi maikadua a sangalubongan a gubat, natay ti ama ken ti kabsatna a lalaki bayat ti pannakigubatda, ken napaltogan ti ina ken ti kabsatna a babai iti maysa a ghetto. Iti saan a nabayag, natay ti anakna a lalaki. Ita, bayat a bumakbaket ken sumalsalog ti salun-atna, isut’ impaayan ni Jehova, iti kongregasion Kristiano, iti maysa a pamilia a dakdakkel nga amang ngem daydi napukawna. Ket maay-ayatan a tumultulong kadagiti sabsabali kas maysa a regular pioneer.
17, 18. Kasano a maipakita ti tunggal maysa kadatayo, payunir man wenno saan, ti espiritu ti panagpayunir?
17 Siempre, saan a makapagpayunir ti tunggal maysa. Maragsakan ni Jehova a mangawat iti amin nga apagkapullotayo, ti kasayaatan a maipaaytayo, aniaman daytoy iti partikular a kasasaadtayo. (Malakias 3:10) Kinapudnona, mabalintay amin a sukayen ti espiritu dagitoy nareregta a payunir ken aramiden ti aniaman nga ipalubos dagiti kasasaadtayo a mangparang-ay iti pannakaikaskasaba ti naimbag a damag.
18 Kas pagarigan, idiay Australia, naituding ti Abril 16 kas naisangsangayan nga aldaw para iti panangasaba iti lansangan. Dayta ket sinuportaran a naan-anay agpadpada dagiti agibumbunannag ken dagiti payunir, kas nabatad a makita iti baro a kangatuan a bilang dagiti agibumbunannag a 58,780 iti dayta a bulan. Kanayonanna, ad-adu iti 90,000 dagiti magasin a naiwaras ngem iti isu met laeng a bulan iti napalabas a tawen. Kabayatan ti naisangsangayan nga aldaw, nakaipaima ti maysa a kabsat a babai kadagiti magasin iti maysa a lalaki, ket bayat nga isursuratna ti nagan ken direksion ti lalaki tapno masarungkaran ken maparayray ti interes daytoy, natakuatanna nga agkabagianda! Agkasinsinda gayam a 30 a tawenen a saanda a nagkita. Awan duadua a nagbanag dayta iti makaparagsak unay nga isasarungkar!
Agtalinaedkay a Natarnaw Agingga iti Panungpalan
19. Apay a nasken nga agtalinaed a natarnaw ti nalinteg a nasion ni Jehova agingga iti panungpalan?
19 Nasken nga agtalinaed a natarnaw dagiti amin nga adda iti nalinteg a nasion ti Dios bayat nga agturturong ti lubong ni Satanas iti kanibusananna. Iti saanen a mabayag, mangngegto ti nasantuan a nasion ni Jehova ti awag nga: “Umayka ilik, sumrekka kadagiti siledmo, ket rikpam dagiti ruangan a maipaay kenka. Aglemmengka iti bassit a kanito agingga iti masibet ti pungtot.” Saanto a maliklikan daytoy a lubong a nakabasol iti dara ti panangukom ti Dios. “Ta, adtoy! ni Jehova rummuarto iti lugarna tapno mangdusa kadagiti agnaed iti daga gapu iti kinadangkesda, ket ti daga lukasannanto met ti darana ket uray kaano dinanto abbonganen dagiti napapatay a kukuana.” (Isaias 26:20, 21) Sapay koma ta agtalinaed a natibker ti tunggal maysa kadatayo kas natarnaw a Kristiano a naitimpuyog iti nalinteg a nasion ni Jehova. Iti kasta, maragsakantayto a gumun-od iti biag nga agnanayon iti naindagaan wenno nailangitan a sakup ti Pagarian ni Kristo.
Malagipyo Pay Kadi?
◻ Kaano a naipasngay “ti nalinteg a nasion”?
◻ Apay a nasken nga agibtur ti ili ti Dios kadagitoy maudi nga al-aldaw?
◻ Aniat’ ipamatmat ti nangato a bilang dagiti agibumbunannag ken ti oras a nabusbos iti ministerio kas makita iti Report ti 1994 a Tawen Serbisio?
◻ Apay a nagpateg ti itatabuno kadagiti gimong bayat nga umas-asideg ti panungpalan daytoy a lubong?
◻ Apay a nasken nga agtalinaed a natarnaw dagiti amin a naitimpuyog iti nalinteg a nasion ti Dios?
[Tsart iti panid 12-15]
REPORT TI 1994 A TAWEN SERBISIO DAGITI SAKSI NI JEHOVA ITI SANGALUBONGAN
(Kitaem ti bound volume)
[Ladawan iti panid 18]
Dagiti natarnaw a tattao iti nalinteg a nasion ni Jehova magun-odandanto ti biag nga agnanayon iti kinanaan-anay