MAHER-SALAL-HAS-BAZ
[Darasem, O Samsam! Isu Nagganat iti Samsam; wenno, Agdardaras iti Samsam, Isu Nagganat iti Samsam].
Naipanagan iti maikadua nga anak ni Isaias sigun iti bilin ni Jehova.
Binilin ni Jehova ni Isaias nga isuratna daytoy naimpadtuan a sao wenno nagan iti dakkel a tapi ket patalgedanna dayta babaen kadagiti mapagpiaran a saksi. Kalpasanna, binilinna ti mammadto a daytoy met laeng a termino ti ipanaganna iti kappasngay nga anakna, nga imbagana a sakbay a makabalikas ti ubing iti, “Amak!” ken “Inak!” parmeken ti ari ti Asiria dagiti kabusor ti Juda—nga isu ti Damasco ken Samaria. (Isa 8:1-4) Ti naimpadtuan a kaipapanan daytoy a nagan a nayawag iti maikadua nga anak ni Isaias ket natungpal iti uneg ti naituding a kawatiwat ti tiempo. Bayat ti panagturay ni Ari Peca ti Israel, rinaut ti Asirio a monarka a ni Tiglat-pileser III ti Israel, innalana ti adu a siudad, sinamsamanna ti daga, ken kinautibona ti nakaad-adu nga agindeg. Kalpasan dayta, napapatay ni Peca. (2Ar 15:29, 30) Kinautibo met ti ari ti Asiria ti kabesera a siudad ti Siria nga isu ti Damasco, indestierona dagiti umili ti siudad, sana pinapatay ni Ari Rezin ti Siria. (2Ar 16:9) Iti kastoy a pamay-an, agpada a dimteng ti kanibusananda dagitoy nga ar-ari a nagkumplot maibusor iti Juda. Kalpasanna, idi 740 K.K.P., pinarmek dagiti Asirio ti Samaria, nga inikkatda dagiti apostata nga Israelita iti dayta a siudad ken iti dadduma pay a paset ti makin-amianan a pagarian ti Israel. (2Ar 17:1-6) Gapuna, daytoy nga ubing a lalaki nga impasngay ken Isaias ti asawana (nga inawaganna iti “mammadto a babai”) ket napaneknekan a napudno ken mapagtalkan a ‘pagilasinan ken milagro’ iti Israel manipud ken Jehova.—Isa 8:3, 18.