GASELA
[Heb., tseviʹ; tsevi·yahʹ (kabaian a gasela); tsa·vaʼʹ; tseva·ʼahʹ (kabaian a gasela); Gr., dor·kasʹ].
Aniaman a kita ti nasiglat ken nalanay a bassit nga antilop. Ti Gazella dorcas, a nasalaw idiay Arabia, Egipto, Palestina, ken Siria, nalabit pagaammo unay dagiti kadaanan a Hebreo. Daytoy nga animal ket agarup 1 m (3.5 pie) ti kaatiddogna ken agtayag iti agarup 0.6 m (2 pie) a kangato iti abaga. Agpada a ti kalakian ken kabaian addaanda iti sinanlira, singsingan a sarsara a mabalin nga agrukod agingga iti 0.3 m (1 pie) a kaatiddog. Ti gagangay a maris daytoy a gasela ket nalusiaw a dapo-kayumanggi, nga addaan kadagiti natayengteng ken nakusnaw a garit iti rupa ken addaan kadagiti puraw a barukong ken patpatong. Ababa ti dutdot ken nalamuyot. Ti sabali pay a kita ti gasela a mabalin a pagaammo dagiti Israelita isu ti ad-adda a panakkelen, nataytayengteng, dapo-kayumanggi ti marisna a Gazella arabica.—LADAWAN, Tomo 2, p. 955.
Ti kapartak ti gasela, a nairaman kadagiti kapartakan kadagiti mamalia, ket naipasimudaag iti Kasuratan. (Sol 2:17; 8:14) Ti kinasiglat ti kabsat ni Joab a ni Asael ken ti sumagmamano a Gadita ket nayasping iti kinasiglat ti gasela. (2Sm 2:18; 1Cr 12:8) Ti pannakarba ti Babilonia naipadto a pakaigapuan ti panagtalaw nga agturong iti mismo a dagdagada dagiti ganggannaet a manangsuportana ken paspasurotna kas iti maysa a gasela. (Isa 13:14) Nadakamat met daytoy a parsua kas ulidan ti dagus a panagtignay tapno maliklikan ti pannakasilo.—Pr 6:5.
Nalabit maigapu iti kinalibnos ken kinalanayna, naitampok ti gasela iti sumagmamano a nalawag a panangiladawan a linaon ti Kanta ni Solomon (2:9; 4:5; 7:3). Nadakamat met ti gasela iti sapata nga iti sidong dayta ti Sulamita inkabilna ti annak a babbai ti Jerusalem, a kaipapananna nga obligaren ida babaen iti isuamin a nalibnos ken nalanay.—Sol 2:7; 3:5.
Babaen kadagiti kondision ti Linteg a naited babaen ken Moises, ti gasela mabalin nga usaren a pagtaraon. (De 12:15, 22; 14:4, 5; 15:22) Naibilang a maysa kadagiti kanayon a naipapaay a karne agpaay iti aglablabon a lamisaan ni Solomon.—1Ar 4:22, 23.