• “Ti Babilonia Narban!”
    Ti Padto ni Isaias—Lawag nga Agpaay iti Sangatauan I

    • 8. Kas naipadto, ania ti aramiden dagiti taga Babilonia, nupay addan dagiti kabusorda iti ruar dagiti pader?

      8 Idi sumipnget iti dayta a nakaam-amak a rabii, di pulos pampanunoten dagiti taga Babilonia ti mamagkullayaw kadakuada. Agarup dua a siglo kasakbayanna, ipadto ni Isaias: “Adda koma naurnos a panangidasar iti lamisaan, panangurnos iti lugar dagiti tugaw, pannangan, panaginum!” (Isaias 21:5a) Wen, adda padaya nga angayen ni napalangguad nga Ari Belsazar. Mayurnos dagiti tugaw para iti sangaribu nga opisialna, agraman ti adu nga assawa ken kamalalada. (Daniel 5:1, 2) Ammo dagiti agramrambak nga adda armada iti ruar dagiti pader, ngem ipapanda a narigat a maserrek ti siudadda. Dagiti dadakkel a paderna ken ti adalem a kanalna isudat’ mamagbalin a kasla imposible ti pannakaparmekna; di nakappapati dayta gapu ta nagadu ti didiosenna. Gapuna, agtultuloy ti “pannangan, panaginum!” Mabartek ni Belsazar, ket nalabit saan laeng nga is-isu. Maipasimudaag nga agdungdungsan gapu iti bartek dagiti nangato nga opisial gapu ta kasapulan a mariingda, kas naimpadtuan nga ipakita ti sumaganad a sasao ni Isaias.

      9. Apay a nasken a ‘sapsapuanda ti kalasag’?

      9 “Tumakderkayo, dakayo a piprinsipe, sapsapuanyo ti kalasag.” (Isaias 21:5b) Pagammuan, malpasen ti padaya. Masapul a riingen dagiti prinsipe ti bagbagida! Ayabanda ni lakayen a mammadto a Daniel iti dayta a lugar, ket makitana no kasano a pinagsidduker ni Jehova ni Ari Belsazar ti Babilonia nga umarngi iti panangdeskribir ni Isaias. Mabuak dagiti opisial ti ari bayat a serken dagiti nagtitipon a buyot dagiti Medo, Persiano, ken Elamita dagiti depensa ti siudad. Marba a dagus ti Babilonia! Ngem ania ti kaipapanan ti “sapsapuanyo ti kalasag”? No dadduma tukoyen ti Biblia ti ari ti maysa a nasion a kas kalasagna gapu ta isu ti mangikaluya ken manalaknib iti pagilian.b (Salmo 89:18) Gapuna, nalabit ipadpadto daytoy a bersikulo iti Isaias a kasapulan ti maysa a baro nga ari. Apay? Agsipud ta mapapatay ni Belsazar iti “dayta a rabii.” No kasta, nasken a ‘masapsapuan ti kalasag,’ wenno madutokan ti maysa a baro nga ari.​—Daniel 5:1-9, 30.

  • “Ti Babilonia Narban!”
    Ti Padto ni Isaias—Lawag nga Agpaay iti Sangatauan I

    • b Adu a komentarista iti Biblia ti mangipapan a ti sasao a “sapsapuanyo ti kalasag” tukoyenna ti kadaanan nga ugali dagiti soldado a manglana kadagiti lalat a kalasag sakbay ti gubat tapno kumaglis ti kaaduan nga armas. Nupay posible daytoy nga interpretasion, rumbeng a tandaanan nga iti daydi rabii a pannakaparmek ti siudad, gistay awanen ti tiempo dagiti taga Babilonia a lumaban, ket ad-adda manen nga awan tiempoda nga agsagana a makigubat babaen ti pananglana kadagiti kalasagda!