Ti Gobierno a Mangiyegto iti Paraiso

Idi adda ni Jesus ditoy daga, imbagana kadagiti ad-adalanna nga agkararagda a maipaay iti Pagarian ti Dios: “Umay koma ti pagariam. Maaramid koma ti pagayatam, kas sadi langit, kasta met ditoy daga.” (Mateo 6:9, 10) Kankanayon met a nagsarita maipapan “ti naimbag a damag iti pagarian.” (Mateo 4:23) Kinapudnona, ad-adu ti panagsaritana maipapan iti Pagarian ngem ti aniaman a banag. Apay? Agsipud ta ti Pagarian isu ti instrumento nga usarento ti Dios a mangrisot kadagiti parparikut a mamagbalbalin a narikut ti panagbiag ita. Babaen iti Pagarian, ipatingganton ti Dios dagiti gubgubat, bisin, sakit ken krimen, ken isu iyegnanton ti panagkaykaysa ken ti talna.

Kayatyo kadi ti agbiag iti lubong a kasta? Ngarud, masapul a basaenyo daytoy a broshur. Ditoy, maammuanyo a ti Pagarian maysa a gobierno, ngem dayta nasaysayaat ngem ti aniaman a gobierno a nangiturayen iti sangatauan. Makitayonto met ti nakaragragsak a pamay-an ti main-inot a panangilawlawag ti Dios iti pangpanggepna maipapan iti Pagarian kadagiti ad-adipenna. Mainayon pay, makitayonto no kasano a ti Pagarian matulongannakayo uray pay ita.

Kinapudnona, mabalinyo ti agbalin nga iturayan iti Pagarian ti Dios itan. Ngem sakbay a pilienyo daytoy, masapul ti panangammoyo ti ad-adu pay maipapan iti dayta. Gapuna paregtaendakayo a mangusig iti daytoy a broshur. Amin nga ibagana kadakayo maipapan iti Pagarian ti naadaw manipud iti Biblia.

Umuna ngem amin, kitaentayo no apay a kasapulantayo unay ti Pagarian ti Dios.

Idi pangrugian ti historia ti tao, inaramid ti Dios ti tao a perpekto ket inkabilna iti maysa a paraiso. Iti dayta a tiempo saan a kasapulan ti Pagarian.

Nupay kasta, ni Adan ken Eva, ti immuna a nagannaktayo, immimdengda ken ni Satanas, maysa a managalsa nga anghel. Nangibaga iti ulbod maipapan iti Dios a namagbalin kadakuada nga umalsa met iti Dios. Gapuna rumbeng a matayda, ta “ti supapak ti basol isu ni patay.”​—Roma 6:23.

Kas imperpekto, ti managbasol a tao di makaipasngay kadagiti perpekto nga annak. Gapuna amin dagiti annak ni Adan naipasngayda nga imperpekto, managbasol, matmatay.​—Roma 5:12.

Nanipud idin a nagtultuloyen, kasapulanen ti Pagarian ti Dios a mangsubbot kadakuada manipud iti panangilunod iti basol ken ipapatay. Dalusanto met ti Pagarian ti nagan ti Dios manipud kadagiti ulbod nga imbaga ni Satanas a maibusor iti dayta.

Inkari ni Jehova a Dios ti naisangsangayan a “bin-i” (wenno kaputotan) a maipasngayto a mangisalakan ti sangatauan manipud basol. (Genesis 3:15) Daytoy a “bin-i” isunto ti Ari iti Pagarian ti Dios.

Siasinonto dayta?

Agarup 2,000 a tawtawen kalpasan a nagbasol ni Adan, adda matalek a lalaki a managan Abraham. Imbaga ni Jehova ken Abraham a panawanna ti siudadna ket agnaed kadagiti tolda iti daga ti Palestina.

Inaramid amin ni Abraham ti imbaga ni Jehova nga aramidenna, agraman ti nakarigrigat a banag. Imbaga ni Jehova kenkuana nga idatonna ti anakna a lalaki a ni Isaac iti altar.

Ni Jehova pudno a dina tarigagayan ti natauan a daton. Kayatna a maammuan no kasano kapasnek ti panagayat ni Abraham kenkuana. Ngangnganin papatayen ni Abraham ni Isaac idi isut’ pinasardeng ni Jehova.

Gapu iti dakkel a pammati ni Abraham, inkari ni Jehova ti panangitedna iti daga ti Palestina kadagiti kaputotanna ket imbagana a ti naikari a Bin-i agtaudto iti lineana, ken iti anakna a ni Isaac.​—Genesis 22:17, 18; 26:4, 5.

Ni Isaac addaan iti singin nga annak a lalaki, da Esau ken ni Jacob. Imbaga ni Jehova a ti naikari a Bin-i agtaudto ken Jacob.​—Genesis 28:13-15.

Ni Jacob, a pinanaganan met ni Jehova ti Israel, addaan iti 12 nga annak a lalaki, ket amin dagitoy kamaudiananna addaanda metten kadagiti annak. Gapuna nangrugin nga immadu dagiti annak ni Abraham.​—Genesis 46:8-27.

Idi adda nakaro a bisin iti lugar, immakar ni Jacob ken ti pamiliana idiay Egipto babaen iti panangawis ni Paraon, ti agturay iti Egipto.​—Genesis 45:16-20.

Idiay Egipto naipalgak a ti naikari a Bin-i agtaudto iti kaputotan iti anak a lalaki ni Jacob a ni Juda.​—Genesis 49:10.

Kamaudiananna natay ni Jacob, ket dagiti annakna immadun ti bilangda agingga a kasladan maysa a nasion. Idin dagiti Egipcio nagamakdan kadakuada ket pinagbalinda ida nga ad-adipen.​—Exodo 1:7-14.

Kamaudiananna imbaon ni Jehova ni Moises, maysa a matalek unay a lalaki, tapno kalikagumanna iti Paraon iti dayta a tiempo a wayawayaanna dagiti annak ni Israel.​—Exodo 6:10, 11.

Nagkedked ni Paraon, gapuna inyeg ni Jehova dagiti sangapulo a saplit kadagiti Egipcio. Kas maudi a saplit, imbaonna ti anghel a mangpapatay kadagiti amin nga inauna nga annak iti Egipto.​—Exodo, kapitulo 7 agingga iti 12.

Imbaga ti Dios kadagiti Israelitas a no mangpapatayda iti karnero a maipaay a pangrabiida ken ikabilda ti dadduma iti darana iti baotek ti ruanganda, ti anghel labsannanto dagiti balbalayda. Gapuna dagiti inauna nga annak dagiti Israelitas naispalda.​—Exodo 12:1-35.

Kas banagna, imbilin ni Paraon kadagiti Israelitas a pumanawdan idiay Egipto. Ngem kalpasanna nagbaliw ti panunotna ket kinamatna ida tapno pasublienna ida.

Nangipaay ni Jehova iti pamay-an ti panaglisi dagiti Israelitas a lumasat iti Nalabaga a Baybay. Ket idi pinadas ni Paraon ken dagiti buyotna ti sumurot kadakuada, nalmesda.​—Exodo 15:5-21.

Inturong ni Jehova dagiti annak ni Israel iti maysa a bantay a managan Sinai idiay let-ang. Sadiay, intedna kadakuada ti Lintegna ket imbagana a no tungpalenda dayta, agbalindanto a maysa a pagarian dagiti papadi ken maysa a nasantuan a nasion. Gapuna, bayat ti panaglabas ti tiempo, dagiti Israelitas naaddaanda iti gundaway nga agbalin a maysa a napateg a paset iti Pagarian ti Dios.​—Exodo 19:6; 24:3-8.

Kalpasan ti panagnaed dagiti Israelitas idiay Bantay Sinai iti agarup nakatawen, inturong ida ni Jehova idiay Palestina, ti daga nga inkarina ken Abraham nga inapoda.

Idiay Palestina, pinalubosan ti Dios dagiti Israelitas kalpasanna nga iturayan dagiti ar-ari. Idin, ti Dios addaanen ti maysa a pagarian ditoy daga.

Ti maikadua nga ari iti Israel isu ni David, maysa a kaputotan ni Juda. Pinarmek ni David dagiti amin a kabusor ti Israel, ket inaramidna ti Jerusalem a kabisera a siudad iti nasion.

Dagiti paspasamak iti panagturay ni David ipakitada a no suportaran ni Jehova ti ari, awan ti naindagaan nga agturay a makaparmek kenkuana.

Imbaga ni Jehova a ti naikari a Bin-i maysanto a kaputotan ni David.​—1 Cronicas 17:7, 11, 14.

Ni Salomon, nga anak a lalaki ni David, ti nagturay kalpasan ti panagturayna. Isut’ nasirib nga ari, ket rimmang-ay ti Israel iti sidong ti panangiturayna.

Nangibangon met ni Salomon ti nagsayaatan a templo a maipaay ken Jehova idiay Jerusalem. Dagiti kasasaad idiay Israel iti didong ti turay ni Salomon ipakitana kadatayo dagiti dadduma kadagiti bendision nga iyegto ti umay a Pagarian ti Dios iti sangatauan.​—1 Ar-ari 4:24, 25.

Nupay kasta, adu kadagiti ar-ari kalpasan ni Salomon ti saan a matalek.

Ngem idi a dagiti kaputotan ni David agturturayda pay laeng idiay Jerusalem, inusar ni Jehova ti mammadtona a ni Isaias a mangipadto maipapan iti Anak ni David iti masanguanan a mangiturayto iti isuamin a daga a buyogen iti kinamatalek. Daytoy isunto ti naikari a Bin-i.​—Isaias 9:6, 7.

Ni mammadto Isaias impadtona a ti Turayna nadaydayag pay ngem ti turay ni Salomon.​—Isaias, kapitulo 11 ken 65.

Itan, nangnangruna ngem idi, pinampanunoten dagiti ad-adipen ti Dios no siasino daytoy a Bin-i.

Sakbay ti isasangpet ti Bin-i, nupay kasta, dagiti ar-ari ti Israel nagbalinda a nakadakdakes ta idi 607 K.K.P. pinalubosan ni Jehova ti nasion a parmeken dagiti taga Babilonia, ket kaaduan kadagiti tattao ti nakayawan a naipan idiay Babilonia. Ngem saan a nalipatan ti Dios ti karina. Ti Bin-i kaskasdi nga agparangto iti linea ni David.​—Ezequiel 21:25-27.

Ti napasamak iti Israel ipakitana a numan pay dagiti nasirib, matalek a natauan nga ar-ari makaiyegda iti gunggona, dagitoy a gunggona limitadoda. Dagiti matalek a lallaki matayda ket dagiti sumuno kadakuada ti mabalin pay a saan a matalek. Ania ti solusion? Ti naikari a Bin-i.

Kamaudianna, kalpasan ti panaguray a rinibribo a tawtawen, nagparang ti Bin-i. Siasino dayta?

Maysa nga anghel manipud iti Dios ti nangipaay iti sungbat iti di pay naasawaan a babai a managan Maria. Imbagana kenkuana nga isu maaddaanto iti anak a managananto iti Jesus. Adtoy ti kinuna ti anghel:

“Isu natan-okto ket managanto Anak ti Kangatuan; ket ni Jehova a Dios itednanto kenkuana ti trono ni David nga amana, ket agarinto.”​—Lucas 1:32, 33.

Gapuna ni Jesus isunto ti naikari a Bin-i ken kamaudiananna ti Ari iti Pagarian ti Dios. Ngem apay a ni Jesus naiduma kadagiti matalek a lallaki a nagbiag idi?

Ni Jesus naipasngay babaen iti milagro. Birhen ti inana, ket isu awanan ti natauan nga ama. Nagbiagen idi ni Jesus idiay langit ket ti nasantuan nga espiritu ti Dios, wenno aktibo a puersana, ti nangiyalis iti biag ni Jesus manipud langit iti aanakan ni Maria. Gapuna, dina tinawid ti basol ni Adan. Iti isuamin a panagbiagna, saan a nagbasol ni Jesus.​—1 Pedro 2:22.

Idi 30 ti edadan, naubautisaran ni Jesus.

Impakaammona kadagiti tattao ti maipapan iti Pagarian ti Dios ken kamaudiananna impakaammona ti bagina met laeng a kas ti Ari dayta a Pagarian.​—Mateo 4:23; 21:4-11.

Nangaramid met kadagiti adu a milagro.

Nangagas kadagiti masakit.​—Mateo 9:35.

Simimilagro a pinakanna dagiti mabisin.​—Mateo 14:14-22.

Pinagungarna pay dagiti natay.​—Juan 11:38-44.

Dagitoy a milagro ipakitana no anianto dagiti bambanag nga aramidento ni Jesus a maipaay iti sangatauan kas Ari iti Pagarian ti Dios.

Malagipyo kadi no kasano nga inaramid ni Ari David ti Jerusalem a kabisera a siudad iti pagarianna? Inlawlawag ni Jesus a ti Pagarian ti Dios saanton a ditoy daga, no di idiay langit. (Juan 18:36) Dayta ti makagapu no apay a ti Pagarian maawagan “nailangitan a Jerusalem.”​—Hebreo 12:22, 28.

Imbinsabinsa ni Jesus dagiti linlinteg a tungpalento dagidiay nga agbalin nga iturayan ti Pagarian. Dagitoy a linlinteg addadan idiay Biblia. Dagiti kapapatgan a linlinteg a ta dagiti tattao masapul nga ayatenda ti Dios ken ayatenda ti maysa ken maysa.​—Mateo 22:37-39.

Impalgak ni Jesus a saan nga agmaymaysa a mangituray iti Pagarianna. Addadanto tattao a mapili a mapan idiay langit ken agturay sadiay a kaduana. (Lucas 12:32; Juan 14:3) Manonto dagiti mapan sadiay? Sumungbat ti Apocalipsis 14:1: 144,000.

No 144,000 laeng dagiti mapan idiay langit a makipagturay a kadua ni Jesus, ania ti mabalin a namnamaen ti dadduma iti sangatauan?

Kunaen ti Biblia: “Ti sililinteg tawidennanto ti daga, ket agtaengto kenkuana nga agnanayon.”​—Salmo 37:29.

Dagidiay nga agbiag nga agnanayon ditoy daga maawaganda “sabsabali a karnero.”​—Juan 10:16.

Gapuna addada dua a namnama. Addada 144,000 nga inawis ni Jehova a Dios a mapan idiay langit a makipagturay a kadua ni Jesu-Kristo. Ngem minilion a sabsabali pay ti addaan iti sigurado a namnama nga agbiag nga agnanayon ditoy daga kas iturayan iti Pagarianna.​—Apocalipsis 5:10.

Ginura ken binusor ni Satanas ni Jesus. Kalpasan ti panangasaba ni Jesus iti tallo ket kagudua a tawtawen, isut’ pinatiliw ken pinapatay ni Satanas babaen ti pannakailansana iti istaka. Apay a pinalubosan ti Dios daytoy?

Laglagipenyo, agsipud ta nagtaudtayo ken Adan, datay amin nagbasoltayo ken maikari iti ipapatay.​—Roma 6:23.

Laglagipenyo met, a gapu iti simimilagro a pannakaipasngay ni Jesus, isut’ perpekto ket saan a maikari a matay. Nupay kasta, pinalubosan ti Dios ni Satanas a ‘sugatenna ti mukod ni Jesus,’ tapno papatayenna. Ngem pinagungar manen ti Dios iti biag kas maysa nga immortal nga espiritu. Agsipud ta isu addaan pay laeng iti kalintegan iti perpekto a natauan a biag, isu mabalinnan nga usaren daytoy a mangsubbot kadatayo a tattao manipud iti basol.​—Genesis 3:15; Roma 5:12, 21; Mateo 20:28.

Tapno matulongantayo a naan-anay a mangawat no ania ti kaipapanan ti daton ni Jesus, saritaen ti Biblia dayta babaen kadagiti naimpadtuan a padron.

Kas pangarigan, malagipyo kadi no kasano ti panangibaga ni Jehova ken Abraham nga idatonna ti anakna, a nangsubokanna iti panagayatna?

Daytoy ket maysa a naimpadtuan a padron iti daton ni Jesus. Impakitana no kasano a nagdakkelan ti panagayat ni Jehova iti sangatauan ta impalubosna ti Anakna, ni Jesus, a matay a maipaay kadatayo tapno maaddaantayo iti biag.​—Juan 3:16.

Malagipyo kadi ti pamay-an ti panangispal ni Jehova kadagiti Israelitas manipud Egipto ken ti panangispalna kadagiti inauna nga annakda babaen ti pananglabas ti anghel ti ipapatay kadakuada?​—Exodo 12:12, 13.

Daytoy ket maysa a naimpadtuan a padron. No kasano a ti dara ti kordero kaipapananna ti biag dagiti inauna nga annak dagiti Israelitas, ti naibukbok a dara ni Jesus kaipapananna ti biag kadagidiay a mamati kenkuana. Ken no kasano a dagiti paspasamak iti dayta a rabii kaipapananna ti wayawaya kadagiti Israelitas, ti ipapatay ni Jesus mangipaay met iti wayawaya iti sangatauan manipud basol ken ipapatay.

Dayta ti makagapu no apay a ni Jesus maawagan “ti Kordero ti Dios a mangikkat ti basol iti lubong.”​—Juan 1:29.

Nupay kasta, idi adda pay ni Jesus ditoy daga isut’ nangurnong met kadagiti ad-adalan ken sinanayna ida a mangasaba ti naimbag a damag iti Pagarian, uray pay kalpasan ti ipapatayna.​—Mateo 10:5; Lucas 10:1.

Dagitoy dagiti immuna a tattao a pinili ti Dios a makipagturay a kadua ni Jesus iti Pagarianna.​—Lucas 12:32.

Malagipyo kadi nga inkari ti Dios kadagiti Judio a no salimetmetanda ti Linteg, agbalindanto a “pagarian dagiti papadi”? Itan addaandan ti gundaway nga agbalin a paset iti Pagarian ti Dios ken agserbi a nailangitan a papadi no awatenda ni Jesus. Ngem kaaduan kadakuada ti di nangawat ken Jesus.

Gapuna nanipud iti dayta a tiempo ken nagtultuloyen, dagiti Judio saandan nga isu ti nasion a pinili ti Dios; ti Palestina saanen nga isu ti Naikari a Daga.​—Mateo 21:43; 23:37, 38.

Nanipud idi kaaldawan ni Jesus agingga iti kaaldawantayo, ni Jehova ur-urnongennan dagitoy a makipagturayto idiay langit a kadua ni Jesus. Addada pay laeng sumagmamano a ribo kadakuada a sibibiag ita ditoy daga. Awagantayo ida a ti napulotan a natda.​—Apocalipsis 12:17.

Itan, mangrugrugin a makitayo no ania ti Pagarian ti Dios. Dayta ket maysa a gobierno idiay langit, ti Arina isu ni Jesu-Kristo, ket isut’ kaduaan dagiti 144,000 a tattao manipud ditoy daga. Dayta iturayannanto dagiti matalek a sangatauan ditoy daga ket addaanto ti pannakabalin a mangiyeg iti talna ditoy daga.

Kalpasan ti ipapatayna, napagungar ni Jesus ket napan idiay langit. Sadiay, isut’ naguray iti Dios a mangibaga no kaanonto ti tiempo ti panangrugina nga agturay a kas Ari iti Pagarian ti Dios. (Salmo 110:1) Kaanonto dayta?

No dadduma mangibaon ni Jehova kadagiti tagtagainep tapno ibagana kadakuada ti maipapan iti Pagarianna.

Idi kaaldawan ni Daniel, nangibaon ni Jehova ti kasta a tagtagainep ken Nabucodonosor, nga ari iti Babilonia. Daytat’ maysa a dakkel a kayo.​—Daniel 4:10-37.

Napukan ti kayo ket nabedbedan ti puonna iti pito a tawtawen.

Ti kayo iladawanna ni Nabucodonosor. No kasano a ti puon nabedbedan iti pito a tawtawen, napukaw ni Nabucodonosor ti panunotna iti pito a tawtawen. Kalpasanna naisubli ti panunotna.

Amin daytoy ket naimpadtuan a padron. Ni Nabucodonosor iladawanna ti sangalubongan a kinaturay ni Jehova. Idi damo, daytoy ti napasamak kadagiti kaputotan ni Ari David idiay Jerusalem. Idi pinarmek ti Babilonia ti Jerusalem idi 607 K.K.P., nasinga dayta a linea dagiti ar-ari. Awanton a pulos ti sabali nga ari iti linea ni David “agingga a dumteng ti addaan iti legal a kalintegan.” (Ezequiel 21:27) Dayta isu ni Jesu-Kristo.

Kasano kabayag manipud 607 K.K.P. agingga iti panangrugi ti panagturay ni Jesus? Pito a naimpadtuan a tawtawen. Dayta ket 2,520 a tawtawen. (Apocalipsis 12:6, 14) Ket ti 2,520 a tawtawen manipud 607 K.K.P. iyegnatayo iti 1914 K.P.

Gapuna ni Jesus nangrugi a nagturay idiay langit idi 1914. Ania ti kaipapanan dayta?

Ibaga ti Biblia kadatayo babaen iti maysa a sirmata a nakita ni apostol Juan.

Isut’ nakakita iti babai idiay langit a nangipasngay iti anak a lalaki.​—Apocalipsis 12:1-12.

Ti babai iladawanna ti nailangitan nga organisasion ti Dios, a buklen dagiti amin nga angheliko nga ad-adipen ti Dios idiay langit. Ti anak a lalaki iladawanna ti Pagarian ti Dios. Daytoy “naipasngay” idi 1914.

Ania ti sumaganad a napasamak? Ti umuna nga inaramid ni Jesus kas Ari isu ti panangitappuakna ditoy daga ken Satanas, ken dagiti anghel nga immalsa a kaduana, manipud langit.​—Apocalipsis 12:9.

Ibaga ti Biblia kadatayo ti nagbanaganna: “Agrag-okayo, O langlangit ken dakayo nga agnaed kadakuada! Asikayo pay daga ken baybay, ta ti Diablo immulog kadakayo nga addaan dakkel a pungtot, nga ammona a bassiten ti tiempona.”​—Apocalipsis 12:12.

Gapuna idi nangrugi a nagturay ni Jesus idiay langit, dagiti kabusorna nagbalinda nga aktibo unay ditoy daga. Kas impadto ti Biblia, isut’ nangrugi a nagturay iti tengnga dagiti kabkabusorna.​—Salmo 110:1, 2.

Ania ti kaipapanan daytoy maipaay iti sangatauan?

Imbaga ni Jesus kadatayo: gubgubat, kinakurang ti taraon, saksakit, ken ginggined.​—Mateo 24:7, 8; Lucas 21:10, 11.

Nakitatayo a napasamak dagitoy a bambanag nanipud idi 1914, isu a sabali pay a rason no apay nga ammotayo a ti Pagarian ti nangrugi a nagturay idin.

Addanto “panagdanag dagiti nasnasion, a dida ammo ti ruaranda . . . ket dagiti tattao agdanagdanto gapu iti buteng.” (Lucas 21:25, 26) Nakitatayo met dayta, nanipud idi 1914.

Innayon pay ni apostol Pablo a dagiti tattao “managayatdanto kadagiti bagbagida, managayat iti pirak, . . . nasukir kadagiti dadakkelda, . . . saanda a managparbeng, mangliliput, awan panagteppelda.”​—2 Timoteo 3:1-5.

Itan ammoyon no apay a nakarigrigat ti biag ita. Aktibo unayen ni Satanas. Ngem aktibo met ti Pagarian ti Dios.

Di nagbayag kalpasan ti 1914, dagiti natda kadagidiay a manginanama a makipagturay idiay langit a kadua ni Jesus rinugiandan nga impakaammo ti naimbag a damag a naipasdeken ti Pagarian. Daytoy a trabaho nagsaknapen iti isuamin a daga, kas imbaga ni Jesus.​—Mateo 24:14.

Ania ti panggep daytoy a trabaho a panangasaba?

Umuna, dayta ti mangipakaammo kadagiti tattao maipapan iti Pagarian ti Dios.

Maikadua, dayta ti mangtulong kadagiti tattao a mangikeddeng no tarigagayanda ti agbalin nga iturayan ti Pagarian.

Imbaga ni Jesus nga iti kaaldawantayo amin a sangatauan mabingaybingaydanto a mara-karnero ken mara-kalding a tattao.​—Mateo 25:31-46.

Dagiti “karnero” isudanto dagidiay nga agayat kenkuana ken kadagiti kakabsatna. Dagiti “kalding” isudanto dagidiay a di mangayat kenkuana ken dagiti kakabsatna.

Dagiti “karnero” makagun-oddanto iti biag nga agnanayon ket dagiti “kalding” saandanto a magun-odan dayta.

Daytoy a trabaho a panangbingaybingay maibambanagen babaen iti pannakaikasaba ti naimbag a damag iti Pagarian.

Adtoy ti padto ni mammadto nga Isaias.

“Ket maaramidto kadagiti maud-udi nga al-aldaw a ti bantay ti balay ni Jehova mabangonto iti rabaw dagiti bambantay, ket maibayogto a nangnangruna ngem kadagiti turturod; ket isuamin a nasion agayusdanto agingga kenkuana.”​—Isaias 2:2.

Ti sangatauan sangsanguennan “ti maud-udi nga al-aldaw.”

Ti “balay” iti panagdayaw ken Jehova “maitan-ok” iti ngatuen dagiti ulbod a relihion.

“Ket adu dagiti inilin-ili a mapanto ken agkuna: ‘Umaykayo, ket sumang-attayo iti bantay ni Jehova, iti balay ti Dios ni Jacob; ket isuronatayonto kadagiti dalanna, ket magnatayonto kadagiti danana.’”​—Isaias 2:3.

Gapu-na, adu manipud kadagiti amin a nasnasion ti umay agdayaw ken Jehova ken mangawis kadagiti dadduma a makikadua kadakuada. Masursuroda ti agtignay iti pamay-an a tarigagayan ni Jehova.

“Ket pandayendanto dagiti kamkampilanda a pagbalinen a dingding ti arado ket dagiti pikpikada pandayendanto a komkompay. Ti maysa a nasion saannanto nga itag-ay ti kampilan a maibusor iti nasion, ket didanto met adalenen iti pannakigubat uray kaano.”​—Isaias 2:4.

Dagidiay nga agdayaw ken Jehova agkaykaysada ken mannakikappia iti maysa ken maysa.

Ti nagbanagan daytoy a panagtignay ti Pagarian ti Dios a ta itan adu a milionen a tattao iti sangalubongan nga iturayan iti Pagarian.

Dagitoy naurnongda iti agliklikmut ti natda, ti natda pay kadagidiay a ti namnamada isu ti ipapan idiay langit a makipagturay a kadua ni Kristo.

Umawatda iti naespirituan a taraon babaen iti organisasion ti Dios.​—Mateo 24:45-47.

Dagitoy ket maysa nga internasional a panagkakabsat dagiti Kristiano a pudno nga agiinnayat iti maysa ken maysa.​—Juan 13:35.

Dagitoy tagiragsakenda ti talna iti panunot, maysa a namnama iti masanguanan.​—Filipos 4:7.

Din agbayag, naikasabanton ti naimbag a damag. Dagiti “karnero” naurnongdanton. Ket anianton ti aramiden ti Pagarian?

Malagipyo kadi a ti matalek nga Ari a ni David pinarmekna dagiti amin a kabusor dagiti tattao ti Dios? Bueno, ni Ari a Jesus kastanto met laeng ti aramidenna.

Naaddaan idi ni Ari Nabucodonosor iti tagtagainep a dakkel a ladawan a nangisimbolo kadagiti amin nga imperio iti lubong nanipud idi kaaldawanna agingga iti kaaldawantayo.

Idin nakitana ti maysa a bato a natagaan manipud iti bantay, ket binurakna ti ladawan. Ti bato iladawanna ti Pagarian ti Dios.

Daytoy kaipapananna ti pannakadadael ti agdama a dakes a sistema dagiti bambanag.​—Daniel 2:44.

Adtoy ti dadduma a bambanag a dadaelento ti Pagarian.

Mapukawto ti ulbod a relihion, kas maysa a gilingan a naibelleng iti baybay.​—Apocalipsis 18:21.

Dayta ti makagapu no apay a dagiti amin a managayat iti Dios maparegtada a rummuar iti ulbod a relihion ITAN.​—Apocalipsis 18:4.

Sumaganad ti Ari a ni Jesus “kabilennanto dagiti nasnasion . . . ket iturayannanto ida iti sarukod a landok.”​—Apocalipsis 19:15.

Gapuna, dagiti Saksi ni Jehova, nupay no agbayadda kadagiti buisda ken tungpalenda dagiti linlinteg iti daga, dida makiraman iti politika.

Kamaudianna, ni Satanas, ti dakkel a “dragon,” maitappuakton iti mangliwengliweng nga abut.​—Apocalipsis 20:2, 3.

Dagidiayto laeng “karnero,” dagidiay nga agpaituray iti Ari a ni Jesus, ti makalasatto iti daytoy a rigat.​—Mateo 25:31-34, 41, 46.

Ni apostol Juan nakitana ti maysa a sirmata dagiti “karnero” a nakalasat iti rigat.

“Kimmitaak, ket adtoy! ti umariwekwek, nga awan ti makabalin a bumilang, a naggapuda kadagiti isuamin a pagarian ken tribo ken il-ili ken pagsasao, nga agtaktakder iti sanguanan di trono ken iti sanguanan daydi Kordero, a nagkawesda kadagiti pagan-anay a puraw; ket adda palpalma kadagiti im-imada.”​—Apocalipsis 7:9.

Ti “dakkel a bunggoy” buklen dagidiay amin a simmungbat iti pannakaikasaba iti naimbag a damag.

Dagitoy “naggapuda iti dakkel a rigat.”​—Apocalipsis 7:14.

Dagiti “palpalma” ipakitada nga awatenda ni Jesus kas Arida.

Ti panagkawesda kadagiti “pagan-anay a puraw” iladawanna nga addaanda iti pammati iti daton ni Jesus.

Ti “Kordero” isu ni Jesu-Kristo.

Ania dagiti bendision a tagiragsakendanto? Malagipyo aya ti kinaragsak idiay Israel idi agturturay ni Ari Salomon? Daytoy ti nangipaay iti bassit a ladawan iti kinaragsak ditoy daga iti sidong ti Ari a ni Jesus.

Addanto literal a talna kadagiti sangatauan ken iti nagbaetan dagiti tattao ken an-animal, kas impadto ni Isaias.​—Salmo 46:9; Isaias 11:6-9.

No kasano nga inagasan ni Jesus dagiti masakit idi adda ditoy daga, ikkatennanto met dagiti sakit manipud iti amin a sangatauan.​—Isaias 33:24.

No kasano a pinakanna dagiti umariwekwek, kasta met pukawennanto ti panagkurang ti taraon iti isuamin a sangatauan.​—Salmo 72:16.

No kasano a pinagungarna dagiti natay, kasta met pagungarennanto dagidiay a natay nga awanan iti naan-anay a gundaway nga agpaituray iti Pagarian ti Dios.​—Juan 5:28, 29.

Main-inot, isublinanto ti sangatauan iti kinaperpekto isu a napukaw ni Adan.

Saan kadi a nagsayaatan dayta a masanguanan? Kayatyonto kadi a makita dayta? No kasta, agtrabahokayo tapno paiturayankayo itan iti Pagarian ti Dios ken agbalin a maysa kadagiti “karnerona.”

Agadalkayo iti Biblia ken ammuenyo ni Jehova a Dios ken ni Jesu-Kristo.​—Juan 17:3.

Makikaduakayo kadagiti dadduma nga iturayan met ti Pagarian.​—Hebreo 10:25.

Ammuenyo dagiti linlinteg iti Pagarian ket tungpalanyo ida.​—Isaias 2:3, 4.

Idedikaryo ti biagyo nga agserbi ken Jehova, ken mabautisarankayo.​—Mateo 28:19, 20.

Liklikanyo dagiti bambanag, a kas ti panagtakaw, panagbartek, imoralidad, ken panaglangsot, isu a di makaay-ayo ken Jehova a Dios.​—1 Corinto 6:9-11.

Makiramankayo iti panangasaba iti naimbag a damag iti Pagarian.​—Mateo 24:14.

Kalpasanna babaen iti tulong ti Dios, makitayonto ti Paraiso a napukaw ni Adan a maipaay kadagiti kaputotanna a naisubli, ket makitayonto a matungpal daytoy a kari: “Ket nangngegko ti maysa a dakkel a timek a naggapu iti trono nga agkunkuna: ‘Adtoy! Ti tabernakulo ti Dios adda kadagiti tattao, ket isu makipagnaedto kadakuada, ket isudanto dagiti tattaona. Ket ti Dios met laeng addanto kadakuada a Diosda. Ket punasennanto ti amin a lulua kadagiti matada, ket awanton ni patay, ket awanto metten ti sasaibbek wenno sangsangit wenno rigrigat. Ta dagiti immuna a bambanag napalabasdan.’”​—Apocalipsis 21:3, 4.

[Tsart iti panid 20]

(Para iti aktual a pannakaurnosna, kitaem ti publikasion)

607 B.C.E. 1914 C.E.

B.C.E. | C.E.

500 1,000 1,500 2,000 2,520

[Dagiti Ladawan iti panid 11]

Ni Abraham

Ni Isaac

Ni Jacob

Ni Juda

Ni David

[Ladawan iti panid 14]

144,000

[Dagiti Ladawan iti panid 16]

Ni Adan

Ni Jesus