Ti Nasapa a Bumangon

KADAGITI agbunga a kayo iti deppaar ti Mediteraneo, ti almendro ti maysa kadagiti makaatrakar unay. Iti naladaw nga Enero wenno Pebrero​—kasakbayan ti kaaduan kadagiti dadduma pay a kaykayo​—agriing manipud pannakatuglepna bayat ti panawen ti lam-ek. Ket anian a pannakariing! Naarpawan ti sibubukel a kayo kadagiti narasi a sabong a maris-rosas wenno puraw, ti naud-udi umarngi iti uban dagiti natataengan.​—Idiligyo ti Eclesiastes 12:5.

“Managsalukag” ti pangawag dagiti nagkauna a Hebreo iti kayo ti almendro gapu iti nasapa a panagsabongna. Inusar ni Jehova daytoy a kababalin a mangiyilustrar iti napateg a mensahe. Iti rugi ti ministeriona, nasirmata ni Jeremias ti maysa a sanga ti almendro. Aniat’ kaipapananna? Inlawlawag ni Jehova: “Siak salukagak toy saok tapno aramidek.”​—Jeremias 1:12.

No kasano a nasapa nga ‘agriing’ ti kayo ti almendro, kasta met a ‘nasapa a bumangon’ ni Jehova, no ar-arigen, a mangibaon kadagiti mammadtona a mamakdaar iti ilina maipapan iti pagbanagan ti panagsukir. (Jeremias 7:25) Saan nga aginana​—‘agtalinaed a siririing’​—agingga a matungpal ti naimpadtuan a saona. Idi 607 K.K.P., iti naituding a panawen, dimteng ti panangukom ni Jehova iti apostata a nasion ti Juda.

Impadto ti Sao ti Dios ti kasta met laeng a panangukom maibusor iti dakes a sistema a pagbibiagantayo. (Salmo 37:9, 10; 2 Pedro 3:10-13) Maipanggep iti dayta a panangukom, impanamnama kadatayo ni mammadto Habacuc: “Ta ti sirmata agpaay pay laeng iti nadutokan a panawen . . . Isu urayem; ta pudno nga umayto. Dinto agbayag.” (Habacuc 2:3) Ti napintas a sabong ti almendro ipalagipna kadatayo a ni Jehova agtalinaed a siririing agingga a matungpal ti saona.

[Picture Credit Line iti panid 32]

Pictorial Archive (Near Eastern History) Est.